DINMUN KIKHEK CHIANG

“Lal ngeilou lal ana”

A tunga thumal kigawmte’ gen i thei chiat ding hi. Unau Lusei kampau lamte apan hong kipan hikha ding hi. E’n LAL chih kammal zangthou mahle hang vaihawmte genna ding in HAUSA, UKPI chih khong ana zang zaw i bang hi. Lusei lam in hausa i chih lal ana chi deuh ua, hausa ngeilou hausa a ahong pan khak guih chiang in a dinmun hong kikhek a, thuneihna bang sangpi tawi ahihna ah huai zang siamlou sek in mipi in thuaklah a “Lal ngeilou lal ana”  chih hong om hi ding hi. 

 Hausate thu gen sawm i hi kei a, dinmun kikhek gensawm a kinei a hausate a pan kha zozen i hi hi. Liberia (Africa) gam buai ziak a Canada a galtai om uh hiven, huaite lak a mi khat tanchin a kigen ka zak ngei khat om hi. Liberia gambuai apan Canada ava tun chiang in ava tuna gam pen thoveng in nuamsa mahmah hi. Nasep khong le kithaman ahihman in na nakpi a ahon sep chiang in sum bang ama a ding a kiningching tak in hon neita hi. Huchia sum a hon neih a nuam a hon sak chiang in a Canada gam a nuamzaw seem hinkhua a hin hong utta hi.

Bar khong lut in beer bang  va dawn zel in, hong zongsangta hi. Hun sawtkhop a hong huchih nung in asum beita a beer dawnna ding nei nawnlou ahihman in,  Canada khong a credit card haksa lou chik a muhtheih ahihna ah credit card khat la in huai zang in hon dawnta hi. A sum zatte dinkik lou ahih man in a credit card limit hon pha in adang hon la nawn a, huchia credit card company thum bang a hon zat chiang in a credit card company lamte in hon theikheta uhi. A sum ditkik dingdan a hon bawl chiang un kum 30 bang a sep a alohkhiak in dinzou phet ding in tuat uhi.

Lakhipur (Hmarkholien) ah lengthei khong nasa tak in ching uhi. Bangchik kum apan a kua patkhiak a ching  adi uam bel thei khang. A gen uh ka zak khak khat, a tunglai deuh in lengthei zuakhun a hong hih chiang in lengthei huan neite in a lengtheite uh Silchar a zuak in a zuak khit chiang un a ip uh sum a dim phihpheh hi ding hiven, laizial bang filter cigarette lou tep ut nawnlou, hotel khong a ann ne in Silchar a hotel bang a giak zozen in a sum uh a zang gai pah uh a chi uhi. Hmarkholien leh Silchar a ki gamla kei a km 30 le a pha diam ah (a zah chiah ka thei kei), huchia Silchar a hotel khong a giak zozen a a om chiang un huai ah bangbang aki helkha diam chih bel thei kei hang.    

Liberia mite hi in Zosuante hitaleh, i dinmun a kikhek chiang in, a diak in economic dinmun ahoihlam a a kikhek chiang in le omlem (ki adjust) dan siamlouhna om chiat ahi i chi thei ding. Namchih tung a dik leng ahi kha ding. Eilam ah kikta le, Lamka khong ah kum bangzah hiam paita apan in a polam a  muhtheih khop in economic dinmun kikhek nasa tak om abang hi. Mi tamtak khosak haksa leh a buai omthou mahleh khosak lam a buai hetlou tampi ki om ding chihna ahi i chi thei ding. Huchibang dinmun kikhekte a hoihlam in i zangka na hiam, i society in phattuamna a neihloh hia ahihkeileh haksatna tuahloh chih khong dotna omthei ahi ding.