NAWI

Facebook a kinakzat thumal khat ahi a chih theih ding. Mizoramte in a zang deuh uh. E’n numeite  “nawi” i chih ahiam bawng nawi ahiamte ahi kei. Atheilou a omleh bang a chihna uh hi ding hiam chi’n  a buai maithei uh. Eipau a a kibatpih chiah theilou ka hihman in k’on genchiang thoh sawm ding. Nawi chih hih kisangzinga naunen a om nengnung, insung bang go nengnung chihdan lam kawk hileh kilawm kasa  hi. Mimal khat nawi i chih chiang in lah mellat dan ale fel mellou a hi netnut ahihkeileh  kampau a thil bang le gen chiangthei nemnumlou chihlam khong kawk leh kilawm nawn hi. Nawi chih huchi dan khong ka genchiang theih dan ahi phot ding.

Atangpi in FB zangte’n zatdan tuamtuam anei uh abang hi. A diak in ei Zosuante lak ah a lompi a etin zatdan gentheih ding tuamtuam omleh kilawm hi. Huaite i gen sawm keia, “nawi” toh a ki saikhakna, FB zat nawina lam i gen zaw ding. Chihsa bang in FB a “nawi” deuh i chihte Mizoram lamte ahi deuh uh.  Khat in a status ah banghiam post leh a friend list aten ana bohhuan pah, like pah in a utut uh, kizom toh a kizomlou toh ana comment ziahziah ngal mai uhi. Huchi khong a kipawl, ki sulim, aheh leh a kina le om khollou in hun a zang beibei thei uh hileh a kilawm hi. A khen chiang in a status post uh Ie a nawisa mah a post khong ahi a, huchia a nawi uh i chih chiang un zahmoh ahiam kua zakdah ding gen ahiam le ahi tuan kei uhi. Bangmah laktak luatding ding leh thutaklua  genlou a chiak ahipen mai ding uh.

Group khenkhat, nawi na ding himhim a bawl bang om hileh a kilawm. Huaite a mihing a kitheisa mah, FB a amau friend circle khongte mah va nawi khawm deuh uh abang. Nikhat FB a ka lawmte khat in “ Huiha! Ka nak gim e” a chi a, “Bang a chia maw?” chia ka dot leh “Ka group uah ka nawi lotel ua, a comment  tam di  kituh a banglou teng ka comment leh” chi’in a hon dawng hi. Nidang deuh a Mizoram a mimal in personal computer a huchi neihma un Cyber Café a thang mahmah a, cyber café a chat zanhak a tam thei mahmah a kichi hi.  Nungak leh tangval ki chat in a tawp a atak a kimu chih khong a gen uh. Chiamnuih khat ah nungak leh tangval ki chatchat in atak a kimu dia kichiam ava kimuh uleh amau unau ana hi maimah uh chih chih khong a om hi, a dik leh diklouh zaw thei khang. Mizoramte kia hilou in ei Zosuante thil i hihlam lam hih a hih souhsouh maite i hi ua, huai dan a a nawi lamte le FB a nawi a ana nawi mai uh ahihtuak hi.

Tulai in PC kia hilou a mobile apat FB zattheih a hong hih zawkmah leh khangnou a nawi ding kidaih mahmah ahih tuak hi. Mizawng leh khosak haksa tampi omthou mahleh Mizoram pen state khat hi a, sorkal buhpang sawkdi nei deuh ahihna uah Zosuante lak ah sum lam bang le ana neizaw deuh a ompih khong a neih chiang ua nungak leh tangvalte’n hunawl hau deuh mah ahihna tan uh leng a om ding. Huai ban ah kimawlna ding lentual leh mun awngthawl bang gamsung a  tam louh zawkmah toh, FB khong a nawi a nawi ziahziah ding khop om gige ahi kha ding. A hoih a hoihkei chihlam hilou in khangnoute hi’n a kua hitaleh FB zang sia-leh-pha theihna nei chiat in bangtan nawi ding a bangtan nawi lou ding chih kitheih chiat ding hipen mai lou di hia...