Siamsinna Leh Vakiangbu

Siamsinna Leh Vakiangbu te’n website bawl sawm ahihdan uh Kikim apan FB in ka zakha a, huai nung sawtlou in a website ua thugelh ki post a simnuamte sim ding chi’n FB Group tuamtuam a ahon phoukhiak chiang un website bawlkhin uh ahih ka thei hi. A website uh ka va vehpah kha kei a, zanlam zek, zansawt nung in ka va lutkha hi. Ihmut hunta ahihman in thugelhte ka sim kei a, website sunga kikoihte ban et zualzual in ka lumta hi.

Himahleh ihmuthei pahlou in bangbang hiam ka ngaihtuah a, gelh tuak ka sak bangbang hiam a hong pawt zungzung hi. A zing khong in lah ka gelhkha kei a, kha khat apha diam vel a pai nung in kon gelh sin ding. Huai ni a ka ngaihtuahna a hong lutte a vek in gelhkhe thei nawn kei mah leng, bangzah hiam bek gelhkhe thei lai ding in ka ki lamen hi. A website lam toh kisai gelh ka sawm kei a, a thutun leh bangbang hiam ngaihtuahna a hong lutte gelh sawm ka hi zaw hi.

A FB group khong ua pan SSLVB te hi khangthak – nungak leh tangval- lailam a lunglut leh tui ngen hi ding ua ngaihdan ka na neihsa ahi hi. FB khong leh a lemna na ah ka gen sek a, i pau leh i lai khansakna ding in laigelh, mi simnop ding tampi i neih angai hi. Ka na gal ngaihtuah sek dan in ei lak ah laigelh thanuam ki tamlou hileh kilawm ka sa a, awlmoh kichi zen sam in siamkei mah leng ngaihtuahna a honglut khenkhat thulimlou chikchik khong ka na gelh tei sek hi. Tu’n  hiai SSLVBte website ah khangnou laigelh lunglutte’ laigelh tampi om ka muh chiang in lungmuan huai kasa mahmah hi. Nungaknou, tangvalnou khong himahle uh laigelh siam taktak leh thu-leh-la thei taktak hi ua ka ngaih in kipahhuai ka sa hi.

Himahleh a laigelh hoihtakte uh mipi tamsem in a simtheihna ding lampi zonbeh zek le uh ka chisim hi. A website  uh a omlam a theilou mi tampi om ding in ka gingta a, huaiban ah  inlam khong a internet zanglou mi tampi in website-a a koihte uh simtheilou ding chihte ka ngai poimoh pah hi. Huaiziakin a website ua sim ding tampi a omlam hon tangkou (advertise) deuh laile uh deihhuai kasa a, a nihna ah inlam a khateng a suak magazinete khong toh kitheihsiamna khat nei in a laigelhte uh suah gige dan om thei leh chih ahi. A tangpi a etin laisim  taima lua hikei le kilawm sak in om mahleh  alehlam ah a lungluthuai leh mihip ding eipau a laigelh a omlouh man asim taima lou aki hi diam chih bang a omzel hi.A laigelh hoih uleh lungluthuai taktak, mihip thei dingte mi tamsem simtheih ding a koihdan hon ngaihtuah le uh chihna ahi pen hi.

Laigelh siam taktak tampi om ahihna uah, fiction khong ah a character, a mun (background) khong leh a story khong bang ah le insung a tua i gelhna pau zang hilele pauthei leh simtheite i unau India a om hi in gamdang a om hitaleh, huaite khong zeplut in amau hip thei ding leh amau a dia lungluthuai ding khong ngaihtuah detdet kawm in hon gelh tam semsem lai uh a deihhuai hi. Mgaihtuahna thuk zanga, lungsim zautak pukawm a i pau leh i lai a khan, a dalh semsem na ding ngimna toh hon gelh tam semsem le uh i chi ahi. Huchidan khong a i pau leh i lai ana zuak a nasa tak a ana thehlar thei dinmun ahihlam uh ana haih hetlou in ana thei kiukiau le uh deihhuai hi.

A website uah thugelh chi tuamtuam (category) tampi a om a, a hon sutzop zel ua thugelh tamsem, chi tamsem a hong om ka ding leng i lamen hi. Amaute PLS in laigelhdan a bawl MIL a simkhate ngen hi ding in ka koih a, a website ua kisuah peuhmah PLS laigelhdan bikhiah bang a ana bawl dik ding, a editor chih dan bang le kisep uhen la, a website ua omteng laimal zatdan leh laigelhdan kibang vek a bawlthei ding dinmun hi un ka koih in muanhuai leng kasa hi. Huaiban ah den a Magazine khat toh sepkhop ding chihpen a lemkei leh PLS lamte toh ki thuzak uhenla, anih ua pangkhawm in PLS Journal chihdan regular tak a suak ding khat hon bawl thei ding un ka gingta in ka muang nawn hi.   
     

Atawpna ding in ka genutluat zaw ahikei na a, kon genlut mai ding. Amau laigelhte thutuam ahi a, a mau gelh hilou, a kigelhsa a laksawnte uh, gentehna in tangthu khong, a source diktak kanchian in a gelhtute mah credit piaktheih sawm le uh a hoih mahmah ding.