SINGANGMITE

Nidang chizen le, kum bangzah hiam paita in Zosuante huamvek ding a i gen chiang in "Singtangmite" kichi mai sek hi. Singtang gam a teng hi thou mahle uh Naga, Khasi adg. khong singtangmi i chih in huamkha lou hi. India lam in singtangmi i chih kawlgam lam ah khamtungmi ahiam mualtungmi ahiam a chi ua, a kibang mah ahi. Huchimahbang in unau Lusei pau zangten tlangmi a chi ua Thadou pau zangte’n le thinglhangmi  a chi ua, a kibang vek hi.

Singtangmi i chihpen Zosuante’n ei leh ei kigenna dia kampau a i  zat lel ahi a, sorkal genlouh midang (Zosuan hilou) in le a hon theihpih kei ding uhi. Huaiziak khong mah a nampi min ding, kigawmna ding a taak salou a kuama’n huai ding a le ana en kha ngeilou ahi ding hi. Nampi min ding a Singtangmi hoih ding ahi chih sawmi hi kei, himahleh a chiang khat bel singtangmi, khamtungmi, tlangmi, thinlhangmi i chih peuhmah chiang in i huapsak a kibang vek chiat hi. Unau khat, lom khat i hihna chiang tak a ana pom a huai genna ding a paumal i zat ahi peuhmah chi le ki khiallou ding hi.

Kigawm ut leh sawm si a nampi min ding deihdan chiat gen a politics khong i hon sai chiang in Singtangmite kikal om deuhdeuh hong bang mawk hi. Mizo pen ana tung sangpen a state khat ana neita himahle uh Lusei pau siamloute Mizo dan a ngai phalou, a siamloute’n le hon huamkei uh chihbawl a a siamte piakbawl zel dinmun in om hi. Kuki i chih nawn chiang in huchimah ahi a, Thadou pau zangloute huamlou sakna om bang zel, Chin ahih chiang in Khalkha, Falam, Lai chih lamte ki inteksak leh piakbawl a om hi zel, Zomi i hon chih nawn chiang in le hong huchi nawn thou a bang zel hi.

Huchi in Kuki, Chin, Mizo, Zomi a pom om chiat, a pomlou omchiat in i om neihnuai a, lehlam ah lah unau khat, suangtu khat, kigawm ding, pankhawm ding poimoh ahi i chi vek zel hi. Tenna kibatlouh ziak a common politics khong i na sai theihlouh uh sawtpi ziak ahi pen ding a, tuni tan bang in tuh pau mahmah inle hon khen in gamlapi kitungta abang hi. Singtangmite i hi chih nilouh mawk u leh i maban uh bang a hong chi diam maw.. 

Hun in bang a hon pokhe diam ah, Singtangmite'n i politics saite uh a tawp in a hong kimat in pumkhat a hong suak diam ah...