VAN MANG ZON

Van khat peuh tunung chiang a hong poimoh ding ahihkei leh i deihlaite i kemhoih tangpi hi. Huchia van i kephoihluat  khenkhat i deih hun, i poimoh hun a hong om a i zon chiang in ki muzou nawn hetlou chih om nuam mahmah hi. I koihna hi a i theihna teng i zon nunga mulou, gintakna teng zong in mu tuanlou. A khen chianga kua hiam in ana la, ana peimang etc ding peuh a muangmoh in kingoh theih hi. Kingoh khelh ahih chiang in ngoh a omte bang lungkim dek suailou chih hong omthei nawn hi.

Neulai khong a gamlak a vak, i tem khong i koihna theilou, i mansak zenzen hun omthei hi. Huchih chiang in i van mang pen a omna thankik in thei ding (hon na guksak i chihna hi maithei) chia ki ngai hileh kilawm dan in ka thei miimiai sim ka chi. Khutpek tung a chil sia in, thankik ka van koilam a om hiam chih dan deuh khat kam a gen in khuttal hiam a chil pen khensuk ek in i khutsung a i chil pen hong kithehkhia in, a kithehkhiak tamna lamlam khong ban zon mai chih dan khat om hileh kilawm.

Bangteng hileh van i mansak, a omna i theihlouh zon hi lungsim nuam hetlou khat a omtheih nilouh mawk hi. Lungsim a om gegu nilouh sim, i gintaknate i zon chia lah ki mu tuanlou. Ngaihtuah gegu gige kei lele i lungsim khat a ana ki ngaihtuah mah ahi ding a, huai ah a om ding ahihkeileh huai ah a om de aw chih idea thak hong pawtpawt in i va et hial chiang a lah ana omtuan khollou zel.

Hun hong paipai in, a khenchiang a tuh gintaklouhna tak khong a ana om ki mukik chihbang om. A khenchiang a lah muhkik ding om nawnlou a mangden chih khong. I thil neih, i khut a om i chihte le a mangthei gige, a beithei ngentang mah ana himah ahi hi. Bangmah a omden omlou pi khat ana hi aka.