LAMETLOUH DAN A KIHUAN

Khatvei talpakte khat in nga chikhat, pan dikdek a dung zawnga gial (stripe) hon lei in Tripura mi khat inn ah hon tawi hi. Nasem khawm vek ka hi ua, inneipa a intek ahihman in huai nga huan ding mohpuakna ama khut ah hong omkha hi. Hon kang hiven, kangam lah hilou, a tui nei a masala khong toh hoihtak a kan lah hituanlou, sathau a kang in chi khong soh a minsak lel dan in a hon huan hi. Kon nektak chiang un a leitupa lemetdan leh beiseihdan nak hihlouh lotel ahihman in a lungkim hetlou in phun nilouh hi. Aman bel hoihtak a hon kanggam ding in, mui mahmah veuveu ding ahihkeileh a tui tamlou, hoihtak a masala khong toh hon huan ding, limtak a ne ding chih ana ngaihdan hih tuak hi.

Mehhuan leh  duhdan khong i neu apan i nekkhak dan, i nute hiam in ana huandan uh i theihsa leh i nek zongsangsate ki duh leh ki ngaina deuh a, a huandan ding mah in le ki koih deuh a bang hi. Anteh hi in sa hitaleh a kihuankhawm deuh, a kipawl deuh chih bang ki omsak in huan dan pomdan khat i nei deuh hi. Meh chi khat a thil tuamtuam huankhawm dan ban ah meh chi khat sang a tamzaw i huan chiang a bang mehmeh kipawl deuh hiam chih bang le ki omsak in pomdan khat ki nei nawn chiat hi. Gentehna in mehtuimawl toh mehkan a tui neilou leh maltameh chihdan khong.

Tua i gen bang in nam tuamtuam, culture tuamtuam in meh huandan, huankhawm dan, duhdan leh huandan, pomdan tuam ki nei chiat hi. Munkhat a ka nasepna ah hun bangtan hiam kei kia in ka om kha a, mess/canteen chihdan khat ah ann ka ne hi. A saite Sakechep nam ahi ua, Pathianni khong a mikhual omlouh chiang in canteen pen a huanlou ahihman un amau inn ah amau neknek hon nekpih mai sek uhi. Huchia ka nek chiang in bangthu ahiam uih vutvut khat mehlak teng ah a hel sek uhi. Aksa hi in dal hitaleh a huan peuh uah hon helvek mawk chiang un nekhaksa in hi liiliai a nek mai ngai sek hi. Bangthu hiam chia ka dot chiang in hon hilhsek mahle uh a min ka manggilh nak a, tun le kon gen thei kei hi. Dangpuithu a chih uh hi ding in tuh ka gingta hi.

Akhen in lah a kipawl deuh leh banghiam chih ngaihsaklou in omom, a utut uh helkhawm vek a huan mai pawl om tageet hi. Gentehna in a gimhat mahmah, amah gim leh a limna tuam nei chiat khenkhat va pawng huankhawm mawk ahih chiang in a bangmah in amau limna hon pokhe nawnlou leh dawk nawnlou in, a kigawm a gim leh taste tuampi nei hong suak chih bang omthei hi. A gimhat, a kha, athuk dan tuamte banghiam khat toh huankhawm a limdan tuam ahihkeileh gimnam tuam hong piang sawn a lim mahmah chih khongte a kipawl i chihte hi mai hi. Khenkhat in huai dan khuallou a tuah peuh hon huankhawm mawk chiang ua a nekhate a lungkim theilou chih bang om thei hi.

Huaiziak tak a talpakpa’n a nga lei pen Tripura pan hon huchi kan mawk chianga lungkim theilou, pom theilou a phun nilouh dan ahi hi. A nga bang le a man tawmlua hilou maithei. Huaiban ah talpak leh Bengaliten nga chi tuamtuam a limna tuam le thei deuh ua, a huandan, a hel di bang le a nga a zil a atuam tuam omsak deuh nak sek uhi. Meh di a sa ahiam, nga ahiam i lei chiang bang in le genkhe kholkei mahle a huandan ding dan leh i lametdan khat ana omkhin le himaithei ding in a gintakhuai. Huchidana a hong kihuanlouh chiang a ki lungkimlou le hi maithei.