KAPNEIKHAI-TE' KHUA

Selam khua leh Mizoram Government (nuai a Environment & Forest Dept.-te) buaina thu facebook group tuamtuam a kigelh vengvung a, sorkal lubawkte kampau leh gamtat zia apan nam leh pau ziak khong a Selam khote musit uh hi a ngaihna khong om in hiai buaina tungtang facebook group tuamtuam ah kinialna tam hi. Sorkal lam mohsa a Selam panpih pawl leh sorkal panpih pawl kinialna group tuamtuam a omte ka na sim sekna a Selam khomin a hong gingin chiang in neulai a ka lawm ngaih mahmah Kapneikhaite pemna khua hi in ka hon thei thak hi. Himahleh hiai buaina thu gensawm hizawlou in Selam buaina ziak a neulai hun phawkthak leh a kisaikha bangbang hiam neukha gen zek ding chi i hi.

Selam, lawm Kapneikhaite khua pen Mizoram sung, India leh Burma gamgi zul a om inn 200 val, Golden Jubilee bang ana lawmkhinta uh ahihdan ka simkha a, huchi ahihleh khothak lua hilou peuhmah chihna hipah hi. A khosattu leh a sat kum chih khong ka kan/zong man kei a, huaite zaw huchi in koih mai ni. Neulai, kum simdan khong le ana ki thei nai khollou ahihman in Kapneikhai-te pem kum theikei mah leng 1970 leh 1975 kikal hi ding in ka koih hi. A pem nung uh kum 40 bang phata ding chihna ahi. A pem lai un Selam khua koi a om ahia chih le ka theikei hi. Ei pawl a pempemte i hih ziak mah hiding hiven, huailai in pem chih omzia bel kithei mahmah zel hi. Kho gamlapi khat hi ding in ka na koih top mai hi. Tua kon ngaihtuah chiang in lawm Kapneikhai melpuak ding le ka theichian nawn keia, a inkuan uh leng hoihtak in ka thei chiang nawn kei. A inn uh omna mun, a inn ua ka kimawl lamtak khong uh leh a pem lai ua ka ngaih mahmah khong bel ka thei chiang lai hi. 

A pem nung un ki ngai in a tanchin uh kiza nuam mahmah himahleh a tanchin uh, a thu uh zakna ding leh zak dingdan bangmah omlou hi mai hi. Amau pem nung kum bangzah hiam in inkuan dang khat leh nih hiam va pem beh om hileh kilawm in ka thei a, 1997 tualgal lai in le ka pute lam bangzah hiam va pem om hileh kilawm in ka za hi. Hilele huaite Selam khua chiah a va pem uh ahi hiam chih ka chiang fekfok kei zel hi. Huchi dan khong ziak a Mizoram sorkal lubawkte’n Selam khua pen Burma leh Manipur apan a pemkhawm khua chi a ZRA-te khong genlut hi kha ding uhi. Huailam gensawm i hikei a, i gensawm zawk ahihleh Selam khua Paite kia hilou a Vaiphei khong le om tham dia, Mizoram ahihna ah a Lusei lam le bangzah hiam om ngeingei ding chinuam a kinei i hizaw hi.

Kapneikhai’ pa min Bulzakam ahi in ka thei a, a nu bel a pem ua damlai hian dam nawnlou chih leh amin le ka ngaihtuahkhe zou nawn kei. A u numei nih, a min uh - Tingniang leh Dimngaihkim hi in ka thei. A dik diam ah. Ei ute, a lian lamte lah khualgam a laizil a omkhia, ka nu leh ka pa lah sun chiang a nasem a buai, ka u Ching heu a a neute inngak a ki omsek hiven. Ka u Ching leh amah Kapneikhai u numeite nungaknou simta, kivual leh kilawmta ahihman un sun chiang in amau inlam khong ki tung phei gige sim hi. Amau numeite amau utut kimawl, kou Kapneikhaite toh kou utut ana kimawl a nuamsa in khovel dang phawklou in ka om sek uhi. A khenchiang in a inn uah nupi, papi zu-ne bang a om sek a, huihpi bang a hong nun chiang in amau inn a i omkhak kei lele piching om zaw deuh ahihman in amau inn khong ah va kitai zel hi. Huihpi nun chiang mahni inn muanglou a mi inn a tai nainai chih khong chindan khat ahi hi. Amau inn bel khosung a inn dangte mah bang a lap-in ahi.

Lap-in chihpen tu hun a atheilou bang omta kha ding ahihman in gensau zek sin le. Singtang a innte (kou khua pansan in) a khuam vongsing, zikngal sing, a tak, a gil khong hideuh in ka thei a, khuam poimohlou deuhte bel sesing ahiam sing dangdang khong kizang thou hi. A tuang (floor) ding in gova ten kiphah a, a khenin singpek phah chih le om sam hi. A bang (wall) pen mau ten (dap) khong hi deuh nawn hi. Atung ah singzawl  bangzah hiam kizang a huai tung ah innah kigan in innah tung ah mauten kiphah suak a huai tung ah availam in gova pum in ki chih nawn hi. Akhuamte lei thukpi kikhuak a kiphut himahleh huihpi hong nung a hon mut chiang in inn pen kisawi puak zotzot mai hi. Tulai building hoih taktakte zinling a a chip ding lauhhuai a, huailai inte bel zinling sang mah in huihpi mut chip ding lauhhuai zaw ding hi.

Huchia huihpi in inn a hon sawi ling zotzot chiang in nupi/pitekte bang in “Pathian, Pathian, Awl in.. Awl in..” khong chi in hong thum ngaungau sek ua, huihpi mut in inn kisawi zotzot mahleh huai khong i zak chiang in ei naupang ana ki khamuang mahmah hi. A huai chikei le uh le nupi,papi, mi piching ana omna himhim ah naupang ki khamuang mahmah hi. Ka pate khong in a theih chiang un bel hon awi kei sek uhi. Ka pa’n ngaihdan kiptak a neih leh a gen gige bel “I sih lele i inlum mah ah i si kei ding hiam” chih ahi hi. Ahuailam lou zawng a et in (lakkawi louh ding in) le singtang khua a om himahle i pate khong “awjapu” khat hisam ahihna uah inn ki lamdan leh a vanzat ah leng amau inn sang in ei inn na muanhuai zaw deuh a, huihpi in mutling tawk lele huchi tel in kisawi zotzot lou deuh hi. Tu’n le ahithou lai kha diam ah, huai hunlai in singtang khua ah huihpi sawi zohlouh inn kiptak om khollou a, huihpi a nun chiang in huihpi in intung teng a hawkkhiak sak, a mut lengmang sak chih bang a om deuh gige hi. 

Khosung mi in inn kisiate luahtheih ding in a kinthei pen in bawlpih sek ua, a kibawlkhitma in inn kisia inkuante invengte inn hiam, khosung a atanaute inn hiam khong bel in om mai sek uhi. Huihpi a nunlouh chiang in le inlui deuhte bang intung apan vuahtui hong keh/va (leak) in insung koilai hiam, lupna tung ahiam  kawtsak zezu in insung a om nuamlou sak hi. Huchih chiang in vuahtui  intung apan hong luta a hong takkhiatna mun pen a sunglam a gaw phel khong siat in huai gaw phel kuak tui in zuia a polam intung a luangkhe nawn ding dan in thuap/hubit in zan nung bang a buai a buaipih khong om sek hi. Sing-at in, a tung bii kikhuhte bel a detdou leh a muanhuai deuh dan a ngaih ahi hi. Singtang khua a inn luisimta mahleh va lamthak pen baihlam hetlou hi. Thachial a khosung mi in hong panpih ding himahleh, a sing a gua leh a poimoh teng gamlak a ava kaihkhawm uh ngai a, thachial chiang in inteekte’n sun-an huan ngai, a meh ding ak hiam bang sa ahiam goh ngai ahihman in huai le miteng a dia haksapi, hihzohlouh ahi hi. 

Tulai a khopi a inn sunga electric vak a sun leh zan bang le ki theikhenlou phial, polam a vuah a zuk lele vuah zu ahihlam le kithei tuan selou chih khong toh bel kikhai mahmah hi chih ding ahi. Naupang chik i kisak sung in hun na paipai a, Pathian zal in tuni tan kidam a, i ngaihtuah kik chiang in neulai, Kapneikhaite khong toh kithuahlai sawtpi ana hita mawk hi. Ei theihphak chiang ah le khang lah kikhek nasa, i kimkiang, i inten-louten, nekzon dan, vanzat leh bangkim le kikhek nasa mahmah hi. Mihing in i hinna tung ah thuneihna khatle neikei mahle, lawm Kapneikhai a dam ding in ka koih a zi leh ta bang neitham ding a, tulai Selam buaina toh kisai a facebook khong a commentte bang le ama tate khong a omkha de aw peuh ka chi sek hi. A u numeite khong koi ah bang a chi om di uam ah..

28|05|2014