SIALNEIH

I gan neih laka a lian leh manphapen a i ngaih sial hi ding hi. Gan tuamtuam –ak, ui, vok, kel, belam, bawng, lawi etc  i khoi a, a khoitu i hihmanin a neitu i hi hi. Sial pen aneitu kichi mahle gan dangte bang in va khoiluat hiam a giahna ding ngaihtuahsak hiam ngailou in gamlak, loutul khong ah a honin taa in na hing mai uhi.

Nou a hon neih chiangin sialnouluak chi in api toh anou toh a tatna gamlak hiam loutul hiam apan va khih in inlam ah ki kai a, inn ah anou pen hun bangtan hiam ki khih/omsak hi. A kulleh a nek ding nahpa khong gamlak ah va ki laksak hi. Api pen in khonawl khong ah a nek ding va kizon in a nou kiang ah hong kik lel chih bang in le omthei hi. Huchia a om sungin a noupen a chiamtehna ding, bil at ahiam bang ahiam kibawl a, a gialdan khong inle ki chiamteh hi. Huchia bangtan hiam koiha inn a azual khit chiang in ki khahkhe nawn hi.

Atal, ala, leh a dangte khong le alem chiang in a tatna ua pan va ki khih in inn ki kaitung a, bangtan hiam in ah akihen ton om hi. Aneitu i hihna a sial in hon theih ding, sial a zual ding deihna hipen ding hi. Sial khih inn, khua a a om chiangin kholai ah tangvalte leh naupangte bang in khau a khih a athoh ton uh om hi. Huchia sial a zual chiangin a haksat hun uh, gentehna in chiptai hun chiang khong in inn ah hongtai mai uhi.

Atomin genle, sial pen nei mahle gandang neih toh kibanglou in, va huchi buaipih ngailou in loutul leh gamlak khong ah amau leh amau na ki enkol in na hing mai uhi. Ka theihlouhman ahihkeileh “Sialneih” chih thumal dana kizang khollou bang kasa a, kammal thak dia zattuak hilou hiam ka chisim  hi. I van/thil neih etkol ngai khollou khat ahiam, mi van/thil neih khat enkollou uh i sak ahiam genna ding in SIALNEIH chih zang le hoih leh kilawm ding in ka um hi.

23/12/2015