TE ZATNA

I pau zatdan leh gelhdan ah khat sanga tamzaw genna dinga TE i zat toh kisai neukha gen zek le chidan  i hi. Khenkhat ngaih in houchik bang le ahikha maithei, thil houchikchik a i ngaihte bangle gengen leh houlimlim a kul ton om ahi i chi ding. Min ban ah TE i belh chiang in (gtn – Sangte), Dapzar lam a TE=NEU chihna dan hideuh dinga, ki noutawina hi ding hi. Huaipen tua i gensawm toh kisailou chiphot ni.

Sappau a plural, khat sanga tamzaw ahih chianga S (leh adg) behlap dana eipau a TE i bahlap sek ahi a; himahleh eipau ah TE pen khat sanga tamzaw genna kia hilou in le kizang hi. Zi khat nei gegu a mi kianga i gen chianga “zite khong” i chih chiang in ahihkeileh  “nute khong” i chih chiang in i zi ahihkeileh i nu khat sanga tamzaw ahi i chihna hi zenzenlou hi. I pau zatdan diklou le hi zenzenlou hi. Eipau leh sappau khong a kibatlouhna hiai khong himai hi. English grammar a paipi eipau a zuihtheih mahleh thil khenkhat eipau a va zuih chetchet theihlouh pawl om chih latsakna hipah hi.

Khatsanga tamzaw genna ding ah TE i zatpen lemtang leh hoih mahmah hi. I pau diktak le ahi a, i zat ding mah ahi. Ahihhangin mun khenkhat ah TE va zat kul lai ding a diam chihna om hi. Gentehna ding in “Na inkuante toh hong pai un” chih ah “inkuan” thumal in mi khat sanga tamzaw huamkhin hi. Inkuan thumal i gen chiang in huaisung ah pa, nu leh tate omding chih theihsa hi a, akhen chiangin pi leh pu, pa sanggamte khong bang le atenkhop uleh inkuan in huamkha lai hi.  Inkuan thumal pen khat sanga tamzawsa genna hi a, TE va behlap selouh a inkuan chih a hunmai lou ding a diam chih om thei hi.  Sanggamte chih khong ahih chiangin bel sanggam khat kia bangle neihtheih ahihna ah khat sanga tamzaw ahihleh sanggamte chih ding mah ahi dinga, khat kia nei ahihleh na sanggam ahiam, na sanggampa ahiam na sanggamnu ahiam zat ding mah hi ding hi.

Inkuan chihdan a thumal khatin khatsanga tamzaw a huamkhitsa, i pau ah thumal dang tampi a omlai ding. Huaite ah le tua inkuan thu a i gendan toh hong kibang vek ding hi. Tulel a i pau zatdan/laigelh dan uah TE kizang deuh hileh a kilawm a, TE behlapselou in zang le baihlam leh felzawlou ding a diam?

23|12|2015