Nidanglai Naupang

Kholai bawng-ek, sial-ek lak phalvaka,
Vasanou nekding sialkum, tangkum tou.
Sunkam kal’ innuai leivui mut in thai,
Puchil mankhia nungtawn letlet sak,
Taw mawngnai nuh dia a utlou vau.

 

Sial hong chiptai - chi tah, nahpa pia
Chip hing leng veuveu sialbohte man. 
Lawmte toh khau ki khih a sial kineih,
Khodung khovai a kithoh a tai lumlet,
Kikou, awng hulum mualkuam thawn.

Sunnitang sa, n vuahzu in daikai mahleh,

Lentual vuikhu, buannawi, tuivung taleh;
Puannak suah, kho-ul kai zena lentual 
Puanselum, sa zunbu, saisek  sial pek,
Gilkial, dangtak zong donlou a tai.

Thuang, theidam,khausil pakzu tawp,

Kelbu, akngawn gahmin vasa thangsiah,
Sainou thelnah pulhlak metang thang kam,
Khua a ginem, gam zamzing, kelbu min ne,
Vasa, kawlzal sailim kuah, gophel a beng. 

Muizul misi nakvang’  phulkhia phulun 

Sim dia khosung hong leng bak honte,
Bakchiang mong pei khuang a vankhia.
Kholai singbong, gobong tomkhawm a,
Tual mei kimvela the hing sap leh mat.

Chih khong naupang nunuam,

Khovel dang phawklou hunnuam,
Tulai mobile, computer leh tv khong;
Insung a kimawl naupangte cheplouh
Hita ei, hun leh khang kidangta.

 

27.04.2016