Tuni le gelh nawn sin aw le.
Banglam gelh zozen ding le a diam ah. I hileng uh banah pingpei, khaukhup pung,
zinling chihte khong hong kiza nawn leuleu in thukhunlui lamlam bang ngaihtuah
khak in a om dek. Tuni le vuah lah zu ziahziah lai ahihmanin tui a hong lian
kei ding chih theih hilou hi. Gam khat leh khat lah hileng thu khongah kimohsa,
kikheniam ut omlouin pang toutou ua, hileng lemtanga la houh ahi uhiam gem leh
gam kingik tuah bang hong pung zela den chiah a hong kidou kei ding uh chih
bang le gen theih hilou hi.
Lawikhatin khovel tawp naita, a
genkholh teng a banban a hong tangtung ziahziahta ahi a chihdan ua chile i hi
tuankei. Tuhun bel hun nunung hita, ahihhanga a ni ding Pa lou kuamah in
theilou a kigin ding, Pathian ngaih a kum sang le ni khat toh kibang leh ni
khat lah kum sang toh kibang thei chih khong Laisiangthou a omsa mah ahi.
Pathian toh ei hun simdan kibanglou, Ama geldan en kitheipihlou chihna hi lel
hi. Mihing in utteng gel, gen leh hihsawm mahle, taksuah ding gurantee omlou
hi. A thuneitu, thil teng hihthei khatin Ama chihdan dan hong tangtung ding
hilel hi. A thupina a latsakna himai hi. Mihingin i hihdi leh mohpuaknate
sepsuaha, thil teng Ama thupina dinga i hh ding hi lel hi.
Lenna bang lengta, rail bang le
hunkhop hong tungta. Huaia hongpaiten i hiipi uh hon vei ua i gam a hong lutta i
chikhin. Khenkhat ngaih ah “a omna munmun ua omdet mai awmtak, a bang dia
hiai hii hon polut dia hong pai a hi ua” chihtheih kha ding hi. Nekzong
leh thil poimoh hiha polama va om, lockdown in lapa tangkha, hunlem masapena a
inn a lou ua hong kik ahihna uah ana mohsak mawk ding hiou ding hi. Dama inn a
hong tuntheih uh na kipahpiha, a kai a om ua lele midang i kilohsawnlouhna dia sorkal
lamte vaihawmdan zuiha kuapeuh pilvangtaka gamta leh panlak ding hizaw ding hi.
Misiamten a damdawi ding bawlkhe thei nailou ua, hipi in lah khovel pumpi zeel
a lingsak ahihmanin ei laka le a omthei mah ahihna phawk kawma i hihtheih omsun
hiha pilvan ding hi mai hi.
A hongpaite mundanga bangbang
hiam hiha nasemsa khong hi ding uh ahihmanin inlama a sep ding uh le hon muthei
pah mai ding un a lamethuai. Khualgam a ava septe uh sep ding eigam ah
mukholkei mahle uh a omom semthei pawl leh a khomuhna uh zanga a thak hon
pankhe pawl bang le a om ding uhi. Amau idea toh inlama omsate zatkhawma
nekzonna leh thil thak tampi pianna ding bulpatna le hong hikha thei hi. I gam
ah resource tama, nekzonna dia zatdan i siam nailouh leh huai dia i gama meitha,
lampi hoih leh a zuakna ding omlouh mana nekzonna dia i na hihtheihlouh tampite
hihtheihna kipatna hoihtak hihsak theih
ding hi. A nam, a beh, a veng chihdan lunggelte posiah leh khakhia a mathak lakdan om ding hi. I gam leitang leh a
resource in le hon daiha, a lei ding (customer) dingin le i ki daih. A liansem,
ei zatgaihlouh khop i pattheihleh a polama zuak theih dia panlak bulpatna hun
le hikha ding hi. A kulna na ah sorkal le phu ve ni in bohzui le hang sorkal in
le ahihtheitan hon hih mahmah dingin lamen ni.
Office khong le kaingei in kikai
chih ding ahi. Staggered timing khong chi ahihman un a kuanhak deuhte bangle
pom ahi zel maia, nitaklam lah dai pahpah ahihna ah dakkal kimkhat ahihkeileh dakkal
khat khonga baiha ki khak zel zaw hi tadih.
[29.05.2020]
Dibrugarh
No comments:
Post a Comment