Khualzin, loukuan ahihkeileh gamvak a i pai chiangin lamphei kia om khollou in a suk a tou bang le na om zel hi. Kenlak, kawllak, suanghumlak khong le omthei a, khedap bang bunkei le mun khenkhatah bii in hon sun, segahling sikkhak, suanghiam suihkhak, khetaw a ling tangin nuam velvullou khong om thei hi. Mualtung gamkeu a sun nisa nuaia danghul kawma pai keukeu a ngaih ton oma, kho-ul kai niuniau kawma tawlhuai mahleh va dinkhawl theih ahih mawklouh hun bang om hi. Huchi khonga lam i pailai in vanpuak bang i neih leh hong gik diak in haksa hi. Van gik khollou i chih bang le i tawl i bah chiangin hong gikin dongkholh mai sek hi.
I khualzin, loukuan ahiam chianga amun tung nailoupi a lamkala khawl ahihkeileh nungkik lah hitheilou, ngimna nei a kipankhia, tunna ding tunma gim leh tawlin lampi haksataleh masawna i paizel kul hi. I gimluat chiangin bel khawl zel ngai mah hi. Huchibang lampi i totlaia niliapna, huihnun hiauhiauna ahihkeileh tui luangging biabia omna mun khong i phak khak chiangin khawlta keile le nuam leh tawldam in ki halhhuai thei zel hi. Huchimah bangin hinkhua khualzinna le a nuam leh a haksa om tuaktuak hi. Lam haksa, gimna, tawlna tampi i tuakin thagim, thanem, lunggim, lungkia in ki omtheia tawpsan mai uthun omthei mahleh malam nawta pai teitei ngai in hinkho lamsuk a tou i zawt ngai hi.
Tulai khovel ah media tuamtuam hatin huaite apan a nuamtalna lam muh ding tama zong ki munuamin ki nak etzaw bang hi. I muhte mah i lungsim ah leng thama, zoh leng hon zou zel hi. Adiakin khangthakte bang a thilmuh un a lungpuak uh zelin i khovel hihna taktak toh amau suangtuahna khovel ki gamla pi hithei hi. Nu leh pate in le tate it, haksatna tuaklou dinga deihin ahitheitan a nuamsa taka omsak leh haksa bang tate sika thuak a ngaih leh thuakzaw in a pumpelh omte zong thei zel hi hang. Singkung dawng leh nou thenthonte bukin gahpha mahleh huihpi a hong nun chiangin muttan ahihkeileh zungkalh nuam mahmah hi. Mualtunga pou a neu apan huihin a mutmut singkung hoih ngellou leh hi gimgemte huihin mutsuk muttou kha gige ahihmanin a zung kipin huihpi hattak a nun chiangin le kizungkalh ahiam kipuk bengbung mailou in dingtang giugeu theizaw uhi.
Tualai huna khangnou tampi guiawk (mahni kithat) chih i zakte media hata koipeuha i na theihkhak pahpah mana tamdeuh i isak le hikhinlou khathei hi. Insunga i kichildan, i khanletdan khongin thu paw mahmah kha ding hi. Ki itmana nu leh pate khazak nuaia tate bitlua, haksatna tuakkha ngelloua khangkhia khatin amah a khovel hon phut chiangin buaipah thei hi. Haksatna i chih chituam tuam om dinga, a diaka lungsim lama haksatna nu leh pate inle a sukventheihlouh uh ahihkeileh taten a hilh ngamlouh uh a om chiangin lungsim lama siamte kiang va zot hun hi ding hi. Taksa damlouhna a om mah bangin lungsimlama damlouhna leng om mah ahih pomluat ding ahi.
Lungsim lama haksatna nei peuhmah a tuai hiam, venlouhna nei hiam dana ngaih pahlouha a kuapeuhin lungsimlam damlouhna le etkol ngai damlouhna mah ahi chia theih leh pom hoih ding hi. Pathian muang ding, Amah a kinga ding, thumthum ding chihte diklua himahleh banghiam ziaka lungsim tamkham leh bahte in amau hatna Pathian naiha dingkhe kikthei vek dinmun a om khollou uh hithei hi. Pathian muanlouhna lam hi zenzenlou in Pathian muang kawma a mihinpihte panpihna poimoh le omthei hi. Kua hiam a muanngam uh a kingaktheihna ding uh, panpih leh pitu ding na poimohlua uh hithei hi.
Social animal i hih chianga mihing khat leh khat kitheihsiam, kitosawn, kihanthawn, puakgik kidawn, pankhop, kipomtuah, kihehpih, kikhongaih, kiphat (appreciate) chih khong poimohin thathak lakna, pukna apan dinkhiakna dingin midangte ki poimoh chiat hi. Laisiangthou deihdan mah leng ana hi hi. Dahte dahpih, kipakte kipahpih.
[22.07.2020]
[22.07.2020]
No comments:
Post a Comment