Man kalin tv/youtube khong et zeuhzeuh sekin oma, huai eta pan i gama film star minthang khat sihna police lamte suidan leh muhdan deihkhoplou tv media khenkhat in amau hon ki sui uh ahihdan theih theih hi. Kipe zou leh kuhkal taka sui ahi ngei ding ua ani ani in thuthakpuan theih hon nei uh a bang hial hi. Bang bang phalna lak a ngai diam, thilsuina (detective) lam bang i gama nekzonna hoihtak, kong kihong thak khat houh ahi de aw chihsimin hong om hial hi. Gintakhuai pipi nitengin hon tangkou ua nitenga ettouh zel bang lungluthuai hong suak hi. Lehlam a etin lah a sui police lamte, kum tampi a nekzonna nasep uh hisama, suidan nak theihlaw di ua a muhsuahte uh media a puangzak khollou hi ding un, a phe vengvung tengin a gen uh dikpen ding chihna le hituanlou chihsim in om zel hi.
Tutmuna i na gal-et danin tosawntu nei tuak, politics a kibeihna houh bang saksim in om a; TV debate a neihte bang uah le guplam nei chiat, misiam leh thil thei pipi hong kilang zel hi. Tv ah bel a channel nei/hostten guplam leh guplouh lam a neih dungzui un hihtheih/daltheih tampi nei tuak le uh kilawm in eka (lehkhadena ACE) tawi mah bang uhi. Youtube ah bel viewer tam deihna ziaka mipi ngaihven thute kikoih hi masa deuh dia, tv a dana kinialna le om khollou, gup lamte nasa taka gum, a ente in a gintakh theih ding ua gen abang zel hi. Thudik deih lela kipei le zaw omkha mah in teh. A kibeite in thuaptu leh agenda nei a pangtou tou ahih ua leh a sum a pai a le deulou tuak hikha ding uh ahihmanin thubuai in hon kanglian deuhdeuh kha ding hi. Court lama thukhente a dingin le a thil tampi olsam sakthei uh ahih zahzah un nawngkaina le tunthei thou ding un gintak huailahlou hi.
Abang abang hitaleh sorkal nasemte nasep dan leh mohpuakna sepsuahna mipi duhthusam leh lungtunna tan hilou ahi chih bel phoulang uh a bang hi. Police kia hilou, sorkal nasepna teng ah ahi phial ding. Zanzeka Lamka damdawi-in a naungek sihna tungtang khong le hipah ding hi. Sorkar nasemte in semhoih in semhoihta kei le uh khatenga loh la ahihna uah hah pan luatlouh in le hithei zel mah hi. Sorkal nasem khat baihlam taka va tawpsak mawk bang hithei khollou ahihna ah secure lo zozen ua mipi in thuakloh hithei zel hi. Sorkal hoihlua, a nasemte a dia welfare hoih taktak nei ahihna ah thil pai zungzung theilou mah le ahi ding. Kum lama upa deuh, damkol deuhte bang in nasepa haksatna nei thei ua a tuailai deuh deihdeih telthei private lamte toh teh theih khollouh suak hi.
Sorkal sum kha mipite tax piakkhom khong ahi a, nasemte khaloh le huaite mah apan piak hi a amau khaloh petu mipite i hihna om hi. Sorkal a hoiha, nam tuantualte theisiamin ei lam ah khaloh apan income tax piak ngai tadihlou hi. Huaiziaka le sorkal nasemte leh sorkal thilte a paidi banga hong pailouh chia mipi in ki ngaikhawk zoulou hikha thei thei hi. Loh apan income tax pe keile le nitenga dawr a i thilleite apan tax kipe veve a, mipi in tax piapia i hih le phawk hoih ding hi. Motor taina dia poimoh a tui petrol pump a i thunte ah tax tampi pi sorkal kipia a; motor neilouten le public transport bus/autorickshaw khong a zat chiang un pekha thou uhi. Damna dia i damdawi leite apan le tax tampipi ana pia ki hi gige hi. Dawr a van i lei peuh ah tax omkeileh man tawm chikchika leitheih ding hisim hi.
I gama i chin leh ei bawlkhiak kizuak i lei chiangin bel tax kipelou maithei, chile lah kuate hiamin a kipuakna lamkala sum ana lakkhitsa uh a zuakten a punna di tan ua hon zuak uh i na lei chinga pekha na ki hi thei zel. Ahihtak leh sorkal kianga lutlou chih a kibatlouhna hilel dia, thuakkhakna bel ki nei thou, mantam deuha lei ngai ahih chianga. Sorkal van tuamtuam - building, motor, lamlian adg. khong ei sum senna hikhalou chi a kep sawmlouh theih luat ahi. Sorkalin gam puahna a sum tampi seng gige, kuate hiam in a nna zulhzau taka ana sem ahihkeileh sep le semmlou a ana negai uh le hithei. Huchi bang hitaleh i gama laisiam leh thil paizia thei le tam hanga, sorkal thilte a pai di banga pailoute ana enzui leh tangkoupih ding mimal lah ki om khollou bang zel hi. Mipi in i ngaih poimohlouh sung teng a phattuampihten phaze sa mai ding uh ahi.
Mipiten sorkal ei a ahi, a sum Ie ei sum mah ahi chithei in sorkal thilte ngai poimohin a pai di bangin paisak zou le a nuamsa ding mipite mah i hi. I kisaktheihpih Lamka khopi banga tui lah hoihlou, mei lah hoihlou, lamlian lah hoihlou, damdawi-in lah phunna di khop ki mu den, hiaite bek sorkal i hihsak zoh ding hi awm tak. Hiai louhtheihlouh a i poimohte (basic needs) ban lam ah a semsuah dinga sorkalin mohpuakna a piakte’ seplouh a om chianga va kikum ding a omlouh sek pen mipi in lauh nei houh i hi diam chih om hi. I gam a thautawi bang tam ahihna ah. Huai ahihlele thau tawite gam leh nam adia hinna pekhia a pang ngen ahi ua mipi phattuamna dia nasep, gampuah nasepna dia sorkal sum piakkhiakte zatdikna a dalna ding uh omlou hi. Ana dalkha bang a om ua lele a ki ngaihtuahna ding ua mipi in pan lak theih ding hi ding hi. Mipi leh khotang a ding, gam puahna dinga nasepte dal malaka panpihtu leh sem dinga makaih leh a semte vengtu ahih zawk ding uh kilawm hi.
Tulai media khovel a om i hihmanin media tuamtuam zanga mimal, pawl khong peuh kinak nak sangin sorkal thilte, sorkal nasepte a pai di bangin a pai na hiam, sep ding bangin a kisem na hiam, sum kizatnate dik mah ahi na hiam chihte mimal malin le bildohin gam leh nam itna ziaka media tuamtuam zat phattuam dan om tham ding hi. Mimal huatna a ki mualphousak sawm hiam hilou in gamsunga vantang leh sorkal thilte mipi phattuamna dia a pai di banga a pai leh pailouh khong bildoha a theiloute theihsakna dia media vanzat hoih nei ngen tang ki hita hi.
Mipite, check!
[Dibrugarh, 11.08.2020]
No comments:
Post a Comment