Khaih! Tangtung Hitalou A maw..

Pathian zara a i dam nak leh hun zaw ama zia a na paipai himah e. A nuam a haksa phutou hanga, ni suakte na tum zel, kumte le na kivei zel ahih chiangin naupang chik i kisak kalin tate bang a lianzaw ahihkeileh ei chia hong pha khin ua, i lusamvom bang kelsamin hon khekpian sim theita mawk hi. Nungak leh tangval i chihte bang lah zanzek dana i na koih 1980s le 1990s le hilou, 2000s tou a piangte na hi maimahta. Theihlouh kala thil ahihnatak pomdan khat le na ki neitou zel houh a diam kholai khongah tuailai khatin “uncle” ahihkeileh “ka pu” bang hon na chi guihin hon houpih leh ki zadah thei nawn khollou ding bang hi.

Lai gellouhna le a sawtsimta chia tuni February khatawpni nasep kawma thaizek chih dan ahi.

Kal masa, kaltawp (weekend) inn a om, nidanga ka hihngei le hilou banga(wall) TV apan youtube a Agape Itna Late, Vol. 1 & 2 ka ngaih leh lunglen bang huai zozen, nuam dek  vanglak hi. A late Youtube a koihten cassette apan a convert uh hihtuaka, la khat a bei chianga tape a STOP ging kiza thei hi. Tv leh sound system hoihlouhman le ahi dia cassette apan a convert ahihna toh a ging duhthu sam zoukei mahleh a late ngaih nuam hi. 1980 tuam Lamka a tape record (cassette player) neite a va ki ngai zel;  guitar chord toh kithuah cassette toh paikhawm, a labu en kawma ngaingai i hih chia a la leh music teng baihat taisa ahihna ah, huailai hun gim bang hong nam thei hial hileh kilawmin lasate aw apan a mite bang kithei mahmah a, phamsa pu Do Kham aw bang nalh leh siamlaw valval ahihdan phawkthak in om hi. Agapete music arrangement khong le ana CHK thou ahi chih theihthak in oma, lasa khenkhat bel huailai ana profe nailou deuh uh abang hi. A musiciante kuakua a de aw chih khong ngaihtuahna ah honglut a, ZOL in Pu Do Kham a houlimpihna sim thak di chile lah a website om nawnlou, houlimna gelhthoh editna’ computer lui khong lah kikol nawnlou, external disk khata thillui ka siahkhawmte vel ning ka chih lah zongkhe khalou in ka oma, tua office apan huaite ki entheilou zel hi.

Internet hong lut tung lai in a zongpeih leh  thil theideuhten tunung chia thil om dingdan -  hong huchi di, khachi di a chihte uh a taka hong tangtung khin hitalou ahiam chih hon ngaihtuahsaka, huai khong gennuam a kinei dan a  ki hi hi.

Ei laka internet leh mobile phone hong tunna zanzek dana i na koih nilouh leh kum 20 bang na valkhinta mawk hi. Hiai thilte’n khovel pumpi a khek dungzui in eilakah le thil nasa taka khekin kilamdang sak khin hi. Tulai khang bangin a khek leh kilamdanna theipha nawnlou a ahi mah, ahi ding mah ana sakkhit uh tampi om ding hi. Nidanga school kailouhni a hih ding theilou, hun zatbei haksa, insak inkhang ahihkeileh vengte inn a va mawk pawt dan khong tuni in kiching tam nawnlou bang hi. “Ka chim e”, “Nak chimhuai na e” chihchihte zak ding tawmta hi.  Weekend khonga farm, resort hoh chihte direct a internet leh mobile khongin a hon puaklut hikei mahleh, huaite apan mundang/gamdang a mi omdan i muhte utna neia, huai dia  sum deiha zon leh hahkatna a sum dinmun hong  hoihzawk chinga hong hithei ahi a, chim chia mi inn a va pawng pawt chindan(culture) khong nutsiatna lampi ahihna le a omsak nuam le om kha ding hi.

A vakkhe peihloute’n inn ah mobile/tablet/laptop apan  youtube, whatsapp group tuamtuam ahihkeileh facebook, instagram, twitter etc etc khong toh baihlamtakin nitum genlouh  zanhak thei mawk uhi. Lawmta kithuahna di bangin le hiate zat hita a, hiaite apan kithei, ki ngaizawng, kiteng ahihkeileh hiaite ziaka kikhen leng tampi omta ding hi.  Alehlam ah hiaite khonga hun ki nakzat ahihna ah taksa/thagum ki zangtawm, simbu banga zana hakin suna ihmu ahihkeileh ihmutna ding hun neilou zozen chih khong  damtheihna lam leh kong tuamtuam a challenge thak tampi om thei zel hi. A huaite mahle a tua i gente in kentel, a paikhawm pih, a gu i thuak ahihna om hi.

Computer i khoihkhakma a min bang eipau a khawlkhuaknei ana chi zozen namah ua thil teng hihthei di bang na kisa zozen sim hi.  1990s tawplamin eilak’ mitangpi in computer toh internet kithuah ki zang pan hi dingin koih ni hang. A nung  sawtlou in mobile phone hong tungtou a, service provider BSNLte a mah kihouna leh SMS na dingin hoih kisa lel hi. 2000 nung lamin smart phone, chi in internet genlouh, i paina na a camera leh bangkim keng ki himaita hi. Gendan dangin, computer neu sakhau a kuah, khutpek sungah kitawi hita mai hi.  

Gensa bangin a tung laia  thil thei deuhte’n tunung chianga computer apan thil teng hihtheih, hong kihih vek phial ding - la i deihleh mekkhiak a ngaih mai ding, movie i etut lelah huchi bok, bang(wall) khonga a mekna om dingin, anhuan kawma anhuanin bang apan  meh i deihte telin mek le hong tung mai ding chihte taksang thou mahle huai hunin ahithei taktak dingin ki ngaihtuah theilou hi.  Inn banga deihdeih mekkhiak hial tung tadihkei mahleh a gente uh a tamzaw a hithei, a tungthei, a tungkhin hita mawk hi. Agape la i ngaih i gente khong le a tangtunna hipah hi.  Insung a mobile ahihkeileh laptop, tv apan pan la i deih ngaih theih, movie le i utleh download a i utle lah online maha ettheih mai hita hi. Van lei nuamle lah dawr a va pailou a insung apan amazon, myntra ahihkeileh online shopping zatna khat  mekkhiak a order theih mai hita. A van zuaknuamten le online a zuaktheihna a dima om zel.

Tulai motor suakthakte bang lah automatic ngen hisimta, motor hek bang le baihlam tuam mahmah ding suak hi. A buaihuai zaw bel ei gama i lampite, lamliante hoihlou deihbanga motor zat haksa chihlam hizaw ding hi. A hek genlouh a motor in SIM card kengtel, internet toh kithuahsa banah i mobile phone toh kizom sakle khovel koimun peuh ah zin le’ng le mobile phone apan motor omna mun zonkhiak theiha, gutate a dia le buaihuai deuhta ding suak hi. Huai dingin mobile /internet service bel a om ngai a,  i utleh mobile apan le motor gal start theih chih khong hi zomah hi.

A hitheisa himahleh kum 2020 a hipi in khovel pumpi inn a hon khum bichilh apan inn a om kawma office kai, meeting a tel chihte hong kizangta hi. Hipi ma in sorkal office leh bank chihte khong hong computerized/online ua internet in office nasepdan nasa takin  khek khina, khangthak leh a upa lam deuhte naseptheih dan hong kikhe mahmah hi. A customer lam le technology khantouhdan ana thei a dima om veve ahih chiangun thil omdan teng bohzui in a nna uh sepzoh pahpah lamen ua kinoh leh kimohsakna bang hong pung nasa hi. Sorkal lamin le Govt. office a nna tampi employee hilou midangin a galseptheihte uh sepna ding leh sep dingdan lampi, lemtanna hon bawl ua thil tampi baihlam sak hi. Hichidan tampite eilam ah a mipi inle ki ngaihsaklou a diam ki zang tam nailou bang hi/

Huaite banah khovel koimun peuha hun zatna –  ei lama theihsiamna dingin kitenna, sivuina apan gal kidouna nangawn kua hiam khatin lim la a hon live a a khah nakleh a huntakin (live) ahihkeileh a khonungin  koi peuh ah na ki enthei mai hi. I gam vaihawm sorkal lamte bangin le koi hiama buaina a om chiangin a thu a kithehdalh leh buaina a otsem ding venna in internet service bang tawpsak geihgeih maita uhi. Mimal takin le i gam khangtoute toh tehin privacy leh security lama ana niam deuh leh mipi theihna ana kisam deuh mah ahi dinga, dan khauhtaka zuih theih hi nai tadihlou ahihmanin i omna peuh ah mi toh i thilhih khat peuh i theihlouh kalin kua hiamin a lim ana la, vdo ana la ahihkeileh i kihouna  aw ging (sound) ana record in social media khongah hong viral taleh eipawlin sukna ding ki thei mai khollou ahihna ah mualphouna nasa tak tun thei hi.  Huchi ahihna ah pilvan leh kiven siam a ngaihna le tam zel hi.

1980s hiam 1990s tou khonga computer chih bang lauhbawl, thil teng hihthei dia koihin ei neih, ei zatphak dia le i koihlouh, a thei deuhten tunung chianga hong om dingdan a gen uh hithei dia i koihlouhte a taka hong tangtung vek hi simta a, huailai a a genphaklouh dong un thil tampi hong tungkhin hi. Hiai laigeltu leh a sim khangin khovel technology khantouh leh kikhekna mu leh phattuampih banah a gu  le nak thuakkha pen maithei dingun a ginhuai.

Abanah, tunung chiangin khovel bang hong chi kikhekin bang hong chi paitouh zel diam ah..