KHILAI

Ei pawlin “Koi kuva hon khilai dih.” ki chih khong i thangsak hi. Khilai chih kammal hi vai pau apan a laksawn ahih tuak. I zatdan ah tuh i maingalte i liausak hiam a neihsa uh i neksak theihna kammal ahi a, a sum petute lam ah lah a deihsakte uh a neiksakna uh ahi leng a chih theih mai ding e. “Hon khilai in” khong neel taka i ki chi borborh a i ki neksak pih theihte toh i relationship le a hoih in a smooth chihna ahi i chih thei ding.

Himahleh hiai thil, khilai chih hi va thansak luata mi teng laka va zat ding chi ahihlouhna a om ding. Ei lakah zang mahle vaite lak khong ah va zat luat ding ahi kei maithei. Sawtlam pekin (chizen le) Silchar ah mi khat Lamka a omgnei toh ka houlim kha uhi. Zuau gen ahia a tak ahia chih zaw ka thei kei, himahleh hiai mipa’n Lamka nuam asak thu khong a genna ah “Lamka nungakte chu kuva hai khata le leitheih ahi uh” a chi kha hi. Lamka nungakte kuva haikhat le leitheih a chihpen in ka koilai hiam hon sunkha a ka ngaihdan ahi het kei hi. Ka gintak danin hiai mipa’n nungak kingaihpih/lawmpolh khong nei hi dingin huai nungakte’n le neel kichi a kuva khong ki khilai sak sek un, huchia a kithuahna lama ua a lupkhop ton bang uh le om hi dingin ka koih hi.

I gennop ah lut sukta le. Vaite khongin hon poimoh ding uh dinmun ah na om kha hi. Huchia vaite khong toh kisai khakna nei na hihmanin “Sir”, “Sir” hong chi leh hong lawmbawl pawl bang a om uhi. Huchia hong lawmbawlte ana lawmbawl suk maia a singpi uh hiam a na dawna a kuva uh hiam na na hai khak ni bang a om kha thei hi. Hong golhguk sawma thil manpha hiam sum hiam hong tah bang le a om maithei. Himahleh huai golhgukna na sia-le-pha zangin nana nial mahle chin koitak hiam a a singpi uh nou khat na na dawn khak a a kuva uh hai khat na na haikhak le tuh a lem nana ah “Huaipa maw, a neep dan chu, singpi nou khat/kuva haikhat a le leitheih ahi” khong hon na chi ek thei zel uhi. Den a Lamka nungakte i gen toh kibang thou.

Vaite khenkhatin thil hou chikchik le midang piak ahih nak leh sang nuamlou, ne nuamlou bilbel chih bang om sek hi. Huaite kha ei ngaihin hichi zozen teeptuup peuh chi in i awimoh sek hi. Hiaite pawlin midangte a bangmah a sannoplouh uh a ziak om mah hih tuak hi. Dena i gente dan khonga kichih a thansak ziak ua ana kiveng siam law dan ahi ding un a gin huai hi. Kilawmpolh chih khong om thou mahleh kipolhna, kithuahna i chihte a commercial angle a en zaw uh leng ahi mai thei. Huchi khong chiamteh maimai dingin a hoih ding hi. Vaite tengteng a huchi ding uh chihna ahi zenzen kei, mihoih lua a neihsa uh a lawmte uh a ding it hetlou leng tampi a om uh. Himahleh atangpi in vaite lak ah i nek i dawn, a diakin numeite bang kiven leh pilvan huai mahmah kha ding hi.

Khilai chih kammal, vaipau himahleh tapsak na tusak khin simta i hihmanin i lak ah zual law zozen bang le hithei ahimah ve.