DUBAI LAM AH

TUNIi’ MI khatin a tanu Dubai a va kiloh dinga pai dek ahihdan a hon gen a. Nu-le-pa’n ka phalkei ua theihtawp suah a ka khemkhem hang un a tum tintena, a mangngilh theikei. Kum khat bang a hong kiveia kap zena hon nget chiangin ka ki ngaihtuah thak ua, enkhe ding ka chita uhi. Ei neulai a Silchar zin nangawn i huphulh leh a passport ding bang Guwahati a va pai-in a lawmte toh meltheih nei le hi tuanloupi hon saifel zungzung mai ua. Khangtahkte’n thil a ngamin a ngam ua a phu ua loh le a lohching zungzung mai uh hi’n ka thei. A visa leh sepna ding ahileh ka tanaute uh Dubaia omsa khat toh ngaihtuahin kou buai ngailou in bangkim a hon sufel zel mai uhi. Huchi in a kalnawn chianga zinsak mai ding dinmun ah ka om uhi a chi hi. 

Ka houpih zel na a, a gen khenkhat gen lai le. A gendan un a sempeihte a dingin kilohna ding a tam mahmah a, himahleh ka tanu uh pen bel IGNOU a correspondence a zillai ahihmanin huchia va duhaam lua a part time a mun tuamtuam a a sep sangin Dubai a le IGNOU Center omthou ahihna ah awl deuhin om henla a lai zil le sunzom leh ka chi ua, a IGNOU Center le ka khekta uh a chi hi.

A paina ding, a fare thu ah leng gintak sangin a tam het kei a, Delhi apan Dubai tan dakkal tawmchik lenga tung mai ding ahih tuak ua, a fare le sing khat le ching lou ahi. In apan Dubai a tunna ding, a poimoh teng bangkim ka sen uh sing nih le a ching kei. Job Agency khongin a ngaihtuahsakte uh bel nuai khat bang a seng uh a chi hi.

A nasep ding uh hotel khong a receptionist ahi a, tua ka tanaute uh a omsa pen mi fel leh nunhoih ahihmanin a sepna te’n a deihsak mahmah ua nuam le a sa mahmah hi. Mi khenkhat ava paite’n a gammeite omdan khong a muh chiang un va eng pahin gamneite chetdan in ava om pah ua, zu peuh ava dawn ua huaite chu hon kiksak pah mai uhi. Kicheina ding le na lei uleh taksa dawk tawm penpen thei ding hon lei un, huchilou hiai lam ah a zatna ding a om kei chi’n hon thukhak ua. Nasem ding a kuan a kihihman in ginom taka sep mai ding ahia, kholai vakvak leh va kichei luatna ding a omkei a hon chih manun nu-le-pa ka khamuang mahmah uh a chi hi. Hialam ah om-in lai zil le u le nasep ding zonga i buai veve ngai ding, huaiban ah numei diakdiak nu-le-pa a dingin ngaihtuah ding a tam mahmah a, hilele tua Dubai chu inlam a om sangin le ka ngaihmuang zawta uh a chi hi.

Huchi ahihleh eipawl in le India khopi Delhi, Bangalore etc khong pelh dingdan in mit hakta in Dubai lam khong le nga souhsouhta le fuh thou lou di hia le. Kum bangzah hiam khong gim sima va sepa ki khol kihkeih a, hong kik nawn mai ding hi ding hi. Kerala leh lukhu kangte kia a ding i sak nilouh leh ei a dinga le hitheilou tuan lou hih tuak veh e.