LA LEH A TAK HINKHUA

ZAN NITAKIN naupangte’n EURO 08 a Germany leh Croatia kimawl a en ua ka va tutpih zek hi. Half-time a channel hon khek uleh Zonet ah Thu Leh Hla hun a houlimna ana neih laitak uh ahi. A houlimte Darrokima (Mizoram a khangthak literature luhthuk mahmah khat, a neulai a khua uh Sialsuk, singtang khua a hinkhua khong uh bu nih bang gelhta) leh amin ka theihlouh ama khanvual ding mah midang nih ahi uhi.

A houlimna uh ka en sawt man keia, a gente uh ka ngaikhe vek man kei. Ka etkhak zual lai un Zirsangzela leh Vankhama laphuahte a ITNA tungtang a gen laitak uh ahi. Hiaite laphuah ah a laphuaktu in IT (ngaih) a neia, huainu midang toh a kiteng khin ua, a phuaktu a dingin beiseih ding a om nawn kei. Himahleh a it manin a kipahpih a, a it numei penin a pasal toh hinkhua nuamtak zang dingin a deihsak lailai hi. Hiai kha laisiangthou a ITNA i chih toh leng kinai ding ahi, itna taktak himah lou ding ahi hiam. I kingaihpih in midang hon ngaihsan leh tulai hun a ei khong hiaite bang lungsim ki nei nawnloua i pride, i ego in thuak zoulou dinga ki hehlaw ding ahi, tulai la e.g. A Tha Anka Nem Chu Tawk Rawh Se.. khong himai ahi chi in hiai laphuaktu nihgel thupitna khong hon gen uhi.

Huaikhitin Darrokima in ahihleh hiai la thu mihing hinkhua ah a taktak in thil hithei ding in i gingta uhiam chih dotna hon vawka. Nungak/tangval i ngai mahmaha, i ngaihluat ziakin midanga ding in i phal kei. Huchibanga i ngaihte singdang anglai a va zal mai ding dinmunin om hile uh i itna ziakin kipaktakin i sangin i pom pih thei diam chihdan ahi. Match kipan dek nawnta a, match review khong naupangte’n ennuam ahihman un a lianpen in i etnop sacrifice a ngai maia, aban lam bang a chi houlim ding uam ka enzom nawn kei.

Ngaihtuahna a honglut khat chu, literature a diakin la i chih hi a phuaktute’n a lungsim ua dimlet a sunkhiakna uh (outlet) ahih kawmin mi (leh a targette uh) lungsim neh ding, bun ding, lungsim sunkha thei pen ding ahihkei leh selphouna, enghouna khonga a phuah uh ahi tangpi dingin a ginhuai hi.

Khatvei nitak khomui kuan

Muikhua zing ding

Tullel dawna lengthete

Hongkhuan laitak

Ka ngaihin mel in theilou

Hong theiloua, keilou a dang

Tangval khat toh hong omkhawm

Ka ngaih mel in mu ing

[a la thu a kimin ka thei nawn kei. ka gelhte le a dik diam ah]

chihbang a ngaihzawng midang toh omkhawm ana engu ahih tuaka. Amah chinlou leh zeilou kisa le hi maithei, hilele huailam genlouin a nungaknu in amah ngai dana om hisi, midang toh ava lupkhawm pen uh mualphousak nuam hipen leh kilawm hi.

Nunnuam napallai vul mai ding maw

Singdang anga na zal ding ka sial chiang

Ka duang hon zen lua

Chih bang le amah lah tang zoulou, lah ngai si, midanga dinga pammai sa dinmun a a lungsim a dimlet puakkhapna hi ding hi. Hun tomchik sunga gelh zual, a la-te khong hoihtaka ngaikhia, a thute hoihtaka sui a gelh hilou i himanin in deihbangin la kon hel theikei. Kingai lah kiteng khalou dinmun a kiphuak la dang tampi mahmah i nei ding. Huaite hoihtaka ngai in sui le lungluthuai taktak houlimna ding tampi a om ngut ding. A lem leh hundang ah i chi hiam ah ahihkeileh midangin hon gelh le uh chi phot ni.

Bangteng hileh poetry gelh, la phuah chih khong vuallelhna, chihmohna nasa taka tuakin beidong dinmun a phuah, lungsim a dimte pawtkhiakna leh vei neihte puanzakna a zat ahi chile i khial law dingin a ginhuai kei. Huaiziakin la phuaktu in a laphuahte ama dinmun a genna, ama philosophy a genna khong ahih kawmin a hehna, athangpaihna etc thoihdamna dinga mi selphou, zahlak sak sawm chihbang ahi thei ding. Ngaih toh ktenglou ama dinmun pen vuallel dinmun khat suak ahihna ah heh mahmah napi a lawmngaihnu/pa lungsim natsak sawmna, a kitenpihpa/nu theih ding deihna, tangpi in atheiha ginomlou ahih taklatna ding khonga a phuaktu penin thuaksiam dana ki project (or amah pen in midangte hehpihna/pity a deihmana) a khatpen deihsak leh a hoihpen a nuampen tang dinga deih lailai dana kigen theihna ding freedom nei uhi, a phuaktu ahih miau chiang un.

Huaiziakin LA i chih a taktak a hinkhua a i zuih theihte genna ahi va chih tentun ding hilou ding hi. Thu hilou, philosophy hilou in LA ahi. Huai i chih hangin thu leh philosophy puankhiakna dingin LA zattheih zel hi. LA ahihna tak huai himai lou ding hia. Hiai thu kon gelh hi literature lam a thei ka hi ka chihna ahi zenzen keia, thu-le-la lam a i site a userte tohphur theihna ahih khak a huailam toh kisai houlimna tamsem i neih theihna uh ahih khak leh ka chihman ahi.

Phualva

13.6.08