TECHNOLOGY KHANGTOU zelin hon phata himah in teh, i gam kilkawm khong apan a le internet zattheihta chih khong a kizata. Aizawl English newspaper khat, NEWSLINK in zanlam a internet sawtsim a down lai-in news suahlou ua, a nunga a genchiangna uah Internet down ziaka news kisuahtheilou a simtute theihsiamna a ngen uhi. Newspaper khatin amau maha news kaikhawm theia a suah di uh hi awmtak, internet apan a ban laksawn ua suah ahi di uam chihsim in a oma hiven, profession tuamtuamin le internet zang phatuamta himai lou di hia…. Bangteng hileh mimalin a phatuam lua a zang hi kei lele i gam ah leng internet poimoh leh ki hahzatta ahi a chih theih di e.
Internet haichilh hiam addict hiam chih bangle lohtak theih zaw ahihna a om tham ding. Himahleh internet service lampang gen zek ni. Chihsa bangin eipawl leng tulai khovel ah internet zanga kithuzak, kihoulim, thu kikum leh kithuah chih bang ahita. Tua i site ZOL bangle huchi dan internet a mun poimoh khat a i zat ahi a, India khopi tuamtuam Delhi, Mumbai, Bangalore etc khonga nasem ahihkeileh Japan, Switzerland, Korea, USA etc a laisim khongte leh zogama omte kithuzak leh kithuah theih himawk hi.
Nidang danin tulai hun ah khopi khong ah mi inn a vapawta va kithuah chih khong hithei gige nawnlou ahihna ah mahni insung apan hiam mahni office apan hiam cyber café khonga pan kigal thuah theih himawk pen lemchang mahmah hi. Nungak leh tangval kingai, lawmta mun gamlapi a kihala om ahihkeileh tanau laina mun tuama omte bangle internet tungtawna mel kimu a ki thuzak a kithuahthuah theih hi mawk hi. Huchi khonga internet a hun i va zatkhak chiangin aban om toutou a, mun tuamtuama om mel kitheiloute kal nangawn ah ki lawmtakna leh ki ngaihnatna relation khat om hi. Hiai culture a paitou zel dinga tunung chiangin a hong uang semsem lai ding.
Himahleh tuni tannin hichibanga internet zanga mihing ki networkna ah i gam a facility duhthu sam nailou ahihmanin inlama omte deihbangin telthei nailou suak ua, mundang a omkhete’n hahzat zaw uh hi. Munteng a omte hoihtaka internet zanga kizop theih hun ding ngaklah huai mahmah!
Ei gamlam internet service dinmun mawltak in gen zek le. N.E. India a eipawl omkhakna ah internet hi BSNLte dialup ahi maia. Broadband hon panta ua, a deih teng tan zoh ahi nai kei. Huchilou option dang a om mang kei. BSNLte infrastructure in zoulou ahia bang ahia BSNLte service hi tuni tannin duhthu a sam kei in server down chih khong a ommun mahmah. Vuahbang a zuk zeka kekkia a van a ging nak chiangin a uang diak bang. BSNL thuneitute’n a service uh improve sawmlou a di uam ahih kei leh tua a omdan a lawk zaw uh ahi diam chih khong ngaihsut theih mawk hi.
Chihbel internet zangte’n connection nibangzah sung hiam hong hoihlouh chiangin bangchik chia hoih kik ding hiam ki thei lou hi. A enquiry/complaint na number a chihte uah kan sawm le pick up ngeilouh hiam ahihkeileh deihbanga dawnna gina ki mu khollou tangpi hi. Huchibang dinmun ah a hoita de aw chia va dial khak nak in a om hi. Huchia i dial chiangin conncetion mukei lele i inn apan a telephone zanga BSNL server dial i hih manin i phone ah huai i dialna man hon bill thou uhi. Pulse khat hiam zela a charge pen uh i dial sung huaizah ching kei lele connection mulou a i dial na pulse khat dan zel a hon charge uh suak hi. Huchi hileh internet line hoihkei henla, miteng in a hoihta de aw chi’n dial zihzeh le uh landline telephone sanga amau a dia nasataka lawk zaw maithei hi. Huchibang hileh, line hoihlou, server down sak gige kha lawk mahmah ding hi chih khong peuh a ngaihsut theih. Huchi dan hi hial samlou dingin beisei le.
BSNL thukhat hileh private a internet service providerte’n bang dinga N.E. khong a service provide lou lailai uh ahi de aw chih khong ngaihtuahna ah a omthei nawn. Infrastructure a investment tam ngailua a customer ding eta lawklou ding chi uh ahi diam? A technical lam dinmun i theikei a, mawltaka i ngaihtuahna ah bangchi dan a de aw tutantan internet service eilam ahichi tuantual lailai chih dotna dawnna ding a om kei. Internet culture a lutkha lakloh i hih tak manin internet service provider hoihtak i gam ah le om tei leh chih a deih huai mahmah. A omzia, a technical dinmun theilou i hihmanin a navak deuh khat in hon gen chiang leh a uthuai ngei e.
No comments:
Post a Comment