1989 DECEMBER a Napean Sea Road, Mumbai a Pu Dongzathangte inn a ka va hoh khak in a tangvalte uh khat Tennis ( hia Badminton?) kimawl a pawt khia na om hi. Huai toh kisai gena ka houlimna uah a pi un ei lama mi ki zawng lua a individual games (expensive deuhte) ki zouloua kithanglou, a expensive lou mi tampi kimawl theih football leh volley ball chih khong lar ahi chih a genkha hi. Hmmm… ka chi sima, tu nunga ka ngaihtuah chiang in dik lotel ding in ka koih hi.
Abang abang hileh kawlgam ah hi’n, Manipur ah hi’n Mizoram ah hitaleh Zosuante football ki lunglut chiat, a hihthei le ki tawm lou hi. Tripura, Assam leh Meghalaya khonga om Zosuante leng football ah a tui thou uh abang hi. Mizoram ah tulai ngial in sapgam a football peksiamte pek akmasa khuan a TV a suak hileleng nungak-tangval atam zaw in miss nuamlou in et teitei sawm uh bang hi.
A et kia hilou in fan club tuamtuam din ua, local TV message ah amau gupte gumin kinial, kitawng ua, football nitenga houlimna poimoh khat suak hi. A en ngei mangloute’n mi houlimna kum theilou in a noplouh ton om thei hi. Ka seppihte khat bangin “match poimoh deuh a om peuhmah chiangin a kipatna leh a tawpna beek ka ensek hi, huai ka ettheih keileh a highlights ka etsawm teitei” a chi hi. Huchi in a paina lamlam ah mi houlimna kumthei zek a noptuam lua a chi hi. Kawlgam ah Zosuante huap Tahan a football kidemna leh USA a Zosuante football kidemna thu khong internet ah ki simkha hi.
Jan 2, 2008 ni in Dimapur apan Imphal manoh in ka taisuk ua, naichik himahleh lamsiat ziak in ki telh hetlou hi. Nitaklam dak nih tuamin Kangpokpi lak ka tungsuk ua, huai kim ah unau Thadoute khua om zek hi. Kumthak lopna ankuang um di hi awmtak mun nih bang ah numeite’n anbel senga pua, singtutphah khuta tawi kawma field lam manoh a ki zui ka mu hi. Field lam ka gal et chiangin volley ball beng bang, football kimawl bang ka galmuha, thawnsau zanga pau ziahziah bang, mipi lasa ging bang kiza hi. Mao Gate a deihtawka Meitei Hotel a zing ann ne khin tuh ki hi, lung leng sim zumzelna kawma chiamnuihin lawmnu kiangah “i van ne ve mai d uhia le” peuh ka chi hi. Krismas, kumthak chihte a community a annek khawm leh a community a sports day (festival) a i neih ahihlam tak phawk khia a, neulai khong hong lang sim zungzung dan ahi hi.
I gennop tak bel, Zosuante kimawlna ah i tuia, i economy in a zoh tan, i khovel in a muhphak tan i na kimawl a, football leh volleyball bang i omna chiat ah ki uangbawl diak in a siam leng i siam chih ahi. High School kai laia Annual School Sports khonga volleyball siam mahmah leh Indedepence Shield kituh a Lamka mawltuala football pek siam taktakte koimah tan tung om manglou ahi ding e, mundanga minnei a thang leh nekmuhna a zang zak ding omlou hi. Pammaih mahmah! Huaiziak mah ahi, nu-le-pate’n kingakna tak leh nekzonna ching hi a ana muhlouh man ua khangnou kimawlna a tuite a na tosawn nuam ngeilouh uh. A hun toh kituak a ana et chiang un atate un laisiam u henla, sepna kip neile in khaloh saang le uh a damsung ua nek mu ding uh chih mukhol ua, deihsak taka kimawlna lam na tawsawn nuamlou ahi zaw uhi. I gam dinmun, i khovel leh economy in a zohlouh mana, nu-le-pate’n a tate uh kimawlna lama ana tuipihlouh ua ana khap bawlpen uh mohsak huai hetlou hi.
Tuni in hun a kikhekta. I khovel zauta, economy a dan omdeuhta, opportunity le tamta. Hinapi in opportunity omte ei tan vuallouha koihkha laia va naihlou, ma va phu khalou nilouh i hi diam chih ngaihtuah ding om abang. Kawlgam ah tulaiin galkap kumpi in kimawlna lam ah facility leh sum-le-pai tampi seng ngamin kimawlmite ading in maban limchi mahmah a kichi. Kawlgam hi in India gam hitaleh tulai khangthak football siamte beek in nekmuhna a zanga sangpi a tuntheihna ding uh lampi sial dan om dingin a ginhuai hi. Mizoram ate SAI, TATA leh bangbang Academy hiam khonga kitathiam in tu in national club liante ah a hong kilang panpanta uhi. Dena Lamka mawltuala Indepence Day Shield kituh chih i gen hunlai velin unau Mizoram ate kimawlna lam, adiakin football ah Lamka zaangin a niamzaw thama a muh uh ana hi hi. Tuni in amau phunna ding tampi neilai mahle uh mundang ate sangin opportunity hoih zaw leh economy hoih zaw ah aom ua, mundang ate a makhelh zungzungta uhi. I Zosuanpih, i unau mah ahihna ah i kipahpih a, a sangzaw seem a tun ding uh i deihsak hi. Zosuante lohchinna ahih manin.
Huai i chih kawmkawmin mundanga om talent hoih neite a ding lampi sial dan omlou a diam? A talent kitasam lah hikei le kilawm ahih chiangin. Kimawlmite’n leng amau taksa a ki thunun uleh maban koia vang ahia chih a nak kan zawk deuh ua pan alak deuh uh banah amau makhualsak thei ding SAI, TATA leh bangbang Academy hiam khonga talent hoihte aki tathiam ziahziah theih dingdan uh lampi a thei leh a zonpih thei om khollou i hi diam chih khong ahi.
No comments:
Post a Comment