Khovel mundang khantouh dungzuiin i gam ah leng kong khenkhat ah khantouhna a om sam hi. Mundang, gamdang va pai kei lele media tuamtuam zangin khovel mundang a thil omdan i mu theia, i gam dinmun toh i tehkak chiangin i gam khangtou lou sakna i nei hi. Mimal’ bawlhoih theihmai lah hilou ahihna ah awlmoh a ki ngaihsiat rumrum theih ton om mah hi.
Hichibang khovel ah a sang zaw sem delhin lai/pilna sin ding, sumbawl dingin mundang i naih phakna chiang chiang i naiha, sepna leng i inmun, i khua, i gam polam a septheih omom i delhin i bohta. Huchia mundanga i om khiak chiangin i nu-le-pa, i u-le-nau te’n hon mupha kei ua, eima sia-le-pha theihna i zat a ngai diak hi. Huchibang huna mahni sia-le-pha theihna zanga tangtaka din theihna dingin neu apan insunga kietkol leh kichiilna hoih poimoh mahmah ding hi.
Tutung nungak leh tangvalte toh kisai deuh ahi a, nungak-tangvalte issue tampi a om ding. Khat en deuh le. N.E. mi (including ei Zosuante) nungak leh tangval mundanga omkhete a kingai deuhte bangin inluahkhawm (living together) ching simta uh hileh kilawmin lang hi. Hiai thilchin in lemtanna tampi kengtel leng ahi maithei. Khopi a inluahman tam, in luah ding muh haksa ahihmanin luahkhop pih ding a oma i ki share theihleh a hoih mahmah khat ahi.
Ahhihhangin nungak leh tangvalin in va luahkhawm pen gen ding om zek leh kilawm hi. I ngeina danin unau/tanau hilou, nupa le hilou numei leh pasal tengkhawm chih a om lam ki thei khollou hi. Nidanga i khosakna, khoneu (village) ah huchibang a kulna om khalou le himah in teh. I nu-le-pa leh i society in a approve louh ding banah i kimkianga kol leh vaite muh dingin le kilawmlou hi. Hichi khonga i gamtat ziaka vaite khongin hon simmoha, i numeite bang ngamthoh uh ahi diam chih khong a ngaih tuah theih hi.
Kimkiang hon muhdan i gen lailai in theih dinga hoih khat om hi. Airport apan hiam Silchar apan hiam Mizoram i lut chiangin pasal/tangval in numei kai gawigawi hiam nungak leh tangval kinel taka kimawl, kidelh, kikawi muh ding a om zeuhzeuh. Vaite khong toh i tuankhawm leh muh a nuam kei diak. Huaipen lamlian a tailaia muhzual hitaleh, a takin i society free a numei leh pasal kineel lawtel a kithuahdan khong i gama vai hong omte’n a muh chiang un amau le gintak sanga i numeite neel suk pah vanglak uh hileh kilawm hi. Duham zek lai le, pasalin kingaihna suanlama banglou teng ahihpih nungin numei pen a dang ah pemsanta leh huai numeiin a theihlouh theita, zonsangta in vaite peuh na mitsuan mai bang leng ahi thei. Pasalte kiet kul ahihna a om mai thei. Numeite’n leng a man uh a tamsak ua, a pawnga vaite khong a ki neelsak pahpah louh uh a poimoh. Gamthuk lama om numeite leng vaite sumhauh khong enlaha a nuamtaalna ding ua a zat lel dingin kiphal hetkei le uh. Ki-it, kingai taktakte bel thuthuam, i genphak ding a om kei chi ni.
I thilgen ah kik anwn le. Sahkhuana lam ah enta le, Kristian i kichi. Kris sinsakna in nupa hilou numei leh pasal kipawl a deih kei. Inluahkhawmte a va lum khawm khelkel ding uh chihna hipah samlouin, nungak leh tangval sisan hatlai midang omlouhna ah sun leh zanin om khawm gige le uh Kristian hoih mahmah leng khemna a puk a baihlam ding. Huchia omkhawmna ah taksa utna hih buchinna omtheia, aban ah huailam kia vei leh buaipih a laisim hiam nasep hiam ngaihkhawk nawnlouhna in zui thei a mundanga omkhiakna san pen a bahloh hiam mangngilh hiam a om theih tham ding hi.
Huchia nu-le-pa, pi-le-pu, ni-le-gang, u-le-nau leh society muhphaklouh a tengkhawmte’n a khosakdan uh nu-le-pate a theisak khol dingun a gin huai kei. Nu-le-pa theihsak ngamlouh chih banghaim fellou om chihna a chihtheih ding. Nu-le-pa’n hon awilou ding chih theihsa ahihmana theihsak se louh awlsam pen hi kha ding hi. Nu-le-pate’n lah tate lohchin leh hoih ding deihna a zil ding, sep ding neia a neihval uh hilou seenga tate mundang a omsak uh ahi ngal a.
Sapgam khong ah le a hih thou ve ua le chia ki siamtan a baihlam kha ding. Tulai khovel ah media tuamtuam apanin sapgam hindan leh chindan muh/theih baihlam diak ahihmanin mahni kithuzohna a poimohna lian semsem hi. Mi gamtat leh khosakdante asia leh apha, zuih ding leh zuih louh ding hoihtaka khentel gige kul ding hi. I ngeina leh i sahkhua in hon phallouh, i society in a pomlouh, i kimkianga mite muh a a kilawmlou leh hon simmoh theihna ding uh chindan ah i pilvan kul hi. Huai i chih culture kibatlouh ziaka midang, namdangin hon muhsit leh i culture i taihsan pah ding chihna hilou hi. Ahimhim thu in sapgamte chindan teng zui ding in ei economy in le a zou kei. Film shooting bawl hi silou, lemchinna (i hihna hi loupi) hinkhua uang bawl ding chi i hih kei leh mi gamtat teng va zuih pahpah sawm ding hi khollou ding hi.
Living together tungtang hoihtaka suuta gelh i hi keia. Hiai thil a ana lutkhate mohpaih hiam hiai thil kham ding ahi chi le i hi tuan sam kei. Nu-le-pa tamzaw in hiai thilin eilak hon phata ahih a phawk nailouh uh gintakna a om a. Amaute leh mipi in i society a hong lutta ahi chih phawka, i bildoh deuh leh i ngaihven deuh hunta maithei i chihnopna ahi zaw.
No comments:
Post a Comment