ITNA THU: ZOGAMONLINE A DING

Koi ‘hia, mi’n election leh politics a buaipih laitak un i na romantic deuh mai di ua, zogamonlinete a ding in Mizo Nungak leh Chinese Nungak pansan in ITNA thu kon thai sin himhim di. Tuni ofis ah le na a tamvak kei bok a. Meisel khat a lui tampi salhvak uthuai napi a sau baih tuaklua ahihmanin deihbang in thil tuamtuam a ki henlut zoukei zomah a hiven. Ana sim sin mah dih ua.

Mizo Nungak. Aizawl ka om nung function/event tuamtuam omsekte nungak-tangvalte a ding chihbawl in ka ngaihsak ngeikei hi. Nikum masa (hia le?) a PETRA in concert a hong neihlai un lawmte khatin miss lua na hi hon chihbawl leh hon sial kawmin, a ging hon zasak nuam in a mun pan hon phone a, music sangin le bengseng (noise) kia za zaw hi-in ka kithei hi. Huai nitak mahin concert limlak www.izawl.com (hi in ka thei) ah hong kitak khe ngal a; ka et chiangin a lighting khong leh a kilatdan Aizawl a thil tung ding hikei leh kilawm kasa a, Aizawl a dia pii lua sa ka hi diam, tuban international event deuh a om nawn leh a boruak va muh himhim selou ding eive ka chi lungsim hi.

November 24, 2006 nitaklam office tawp inn ka tuninn phone hong ginga, ka lak leh Khansiam (SIB) in “Pa Gin (naupang zuih dia hon sapna), Lammual ah ka omta, kintak in hong paisuk in” hon chi hi. “Bangzah mante a na lak?” hon chi nawna. “Kei 1000 man ah ka om” a chi nalai hi. Ticket ka laklouh ka hilha, ka paiding leh pailouh ding chiangtak a hilhlouin ka kihouna uh ka tawp uhi. Inteeknu’n Zokhual in le Smokie Concert etna ding ticket lei ahihlam hon gen behlap leh, Eheu! a boruak leh SMOKIE va muh himhim uthuai thou hilou hiam ka chita hi. Sun a Um inle va hoh inla a lim zogamonline ah hon takin a chih bok toh. Annek khitin inteeknu kiang ah “Ka va pawt zual ding, banghiam a chihleh concert en maithei ka hi” ka chi hi. Dak 6 lak khong ahi dinga, Treasury Square khong apan motor a na dimtou pian simpah hi. Ka tai zela, Zodin apan Canteen Kual a kihei in Lammual geiah ka kiktoua, Lammual a lutsawm gate lehlam tuaka a mipi ki line a sau mahmah hi. Endi maw, enlou ding chi in ka ki dongdong a,atawpin koi ‘hia gari park na ding zong phot himhim ding’ ka chita hi. Lammual kiang nai Vanapa Hall tan in leng a omkei a, Secretariat ka khenga a tawpin Governor kong a Traffic Point sak a singbul ah ka koihta hi. Huai panin Lammual lam ah khe in ka paitou keuhkeuh a, Lammual gate bul ka etchiang in que thuahnih a pai - a sungnung zaw pen ticket la ding a ding ahi uh chih ka thei-in ka kivualta hi. A mantawmpen, Rs300/- ka la a, ka lutta hi. A sunglam huchitelin a dim naikei.

Local news a security tight mahmah ding, nek ding, camera etc tawilut theihlouh ding chih simkha ka hihman in camera kenglouin UM hon ngetna, site a takding lim mobile a lak ding ka chih bawl hi. Chiangtaka lak theihna ding chi-in sepaih lentual ah amalam mun hoih ka zongpah hi. Trafiic jam in nawkkhain Smokie hong tungpah kei ua, khotual lasiamte’n la a saksak sung un ka zun hong suak hi. Field khanglama zunin a zuntha khin ka kiknawn chiangin mipi lakah ama a ka omna ka tungzou nawnkei, amun le ka theizou nawn kei hi. Huchi in a awngna deuh, a gamla zaw ah ka omta a. Smokie hong lut ua, mi hong tam mahmah hi. Ka kiang ah nungak khat leh pasal khat a hong ding tei uhi. Nungak pen Zolianu, i chi mai ding.

La hon sapan ua, Mobile in lim kala zela, himahleh mial leh gamla ahihman in ka lungkimna limlak ka la thei kei. Zogamonline a post taak omsa lou in tuni dongin ka koihdapta hi. Zolianu in a mobile a mi phone zel mahleh network busy chih kia ngah in phone kizang theilou ahihdan hon gena, ke'n leng ka lawmpa Khansiam koia om hiding ahiam chih theinuam a ka phone chianga lohching lou ka hihlam ka hilh hi. Huaizan area neuchik sunga mipi tam paikhawm lua, mobile zang tamlua uh ahihman a mobile traffic jammed vek ahih tuak (a zinga newspaper khong in mipi 50000/- khong paikhawm dana gen uh hiven ). Sahdah hon muama, na muam hiam chia hon pia ahihman in ka sangta hi. Raja lah hilou, bang brand a diam ah, mui zozen khat hiven. Bei zomah! Huchi in Zolianu toh a kulchiang in ka ki hou zeuhzeuh uhi.

“Sahdah pangai, altawk kava duh ee” hon chih chiangin “ka nei alom” chi-in sawkkhiak leh piak ka thuah a, ama a muambei a kipang kha ahih mawk chianga chi-in na deih leh khen ve ka chi hi. A khonunglam in a lawmte toh phone in hong kihou thei ua, a kihou khitun, concert ending Lammual gate a lutsawm mi tamlua kinehbuai ua, a liam pawl oma, Civil Hospital tung om ahihlam hon gen hi.

Mipi tam mahmah, leivui lah tunglam a khutou ngeingoi mai; a malam lut sawma hong phuphu lah beilou, nungak-tangval, nupi-papi, naupang nangawn tam mahmah lak ah hiai chu, damdawi kham ahi ding, zu kham a hi ding, KS ahi ding chih ding tampi a kimu thei hi. International Level Concert a a zatte mah uh ahi a chih uh Sound System, NE India a ahoihpen a agen uh (a specification zaw ka thei kei) a a zang ua, Lammual sepaih lentual, a lei nangawn khawng dupdup mai ding kasak leh (huai khong experience ut himhim kawma hoh ki hi) huchi khol hetlou hi. Power bang dakkal kimkhat khong hong mit zomah! A khonunga a gendan un generator 2 kizangte laka khat hongsiat ziaka power a buaina oma, a sound system le a full capacity ki zang theilou suak ahi a chi uh. Smokie te’n gamneite ki deihkhop mahmah le uh le, gam zawng - infrastructure bangmah omlou chi in hon hehpih luat thu uleh ala sakte uh mipiteng in na sakpih suausuau ana lampih theih vek mawk uh lamdang asak thu uh a uagngen uh a chi uh. Huai Lammual a concertna ding stage a bawltawm ua, toilet a bawl uh, a pipe a a polama zawlkhiakna khong kitol va mukha ua chitchiat ua en-en a nuinui mai uh chi uh hiven.

Pautam khollou leh pau sunsun apan a pausiam ngellou honsa a diam ah (polam mi ahi duat deuh ngai chia), Zolianu in hon pawlbawl leh hon protect riau hileh kilawm kasa hi. Mellatdan ah tangvallai houh bang ka de aw peuh a chih theih dekdek hi. :) Zukham kidelh, hongpai, hon phukha dek sim khong a om chiangin a khut vanin a na sawnkhe zel hi. A numei zawin a hih in ah… chi-in huchibang a hong om chiangin kintakin kana dal sekta hi. Huihkhua ah condom mutpuak peuh hong leng dongdonga, nungaknu’n “Ava han zahthlak vee aww.. lo tipuak rawh uu” peuh chithei zel hi. Smiokiete lasak sakpih toh, a kham toh, a lam toh, a leivui khu toh, abang toh, bangchi hiam a ka ngaihtuah leh bomb khong hong puak maizen le zaw peuh chi-in mulkim huai bang kasa dek mawkmawk a. Hou maimai, huai khong ngaihtuah ding hikei chi-in kei leh kei ka kinem hi. Living Next Door to Alice a sak lai un mipite’n banghiam khat ana chi nainai nak ua, ka ngaih chiang in lah a gen uh ka theichiang thei keia, “Engnge an lou sawi ziah?” ka chih leh “Who the fuck is Alice an ti anih kha” hon chi hi. Tulel a Smokie memberte a original member khat kia telkha, a dangte a thak ngen, Smokie taktak hilou uh ahi. Living Next Door to Alice bang a sak chiang un "Who the fuck is Alice" chih a behlap ua, a Smokie kei lua uh chi a dem leh gense pawl a om ua. Huai khong theikha a mipi in huai chiding a ana ki fuih uh ahih tuak hi.

Zolianu amel muchiang nailou chia ka et dek chiangin, kinai law sim a kihih manin nuam khinlou sain ka en hoih thei kei hi. Tuni-in a mel muleng le, bang mel pu ahia chih ka thei nawn kei, aman hon thei diam ah.. Asam mam leh sau in NU mahmah a, khosakna ah leng a niamlua hihtuaklou, mingou lam ahi hi. Jeans khekol teng in Jacket a silh a, a gawnglua leh sanglua bel ahi kei. A tonpihpa, kum 40 vel mi ding, mineu lampang, “ka pute” (punou) ahi achih lah lam chihdi hia, tawm ziahziah lel in nuamsa mahmah hi. A puteek penpen hot na mahmah ei chi-in ka nuihsan sek uhi. Atunga hiai gel - nungak leh tangval concert enkhawm, bangchi dan a de aw a nungakin midang(kei) houpihpih mawka… ka na chihsim pen e! huchi hiding eimah ve, ka chi theita.

Mipi hong ki nawkkhawm chiang in ka omna uh hong tight deuhdeuha, a nunglam a thoveng deuhna a kisuan ding vai a pute toh hon hawmta uhi. Zuih sawm kholkei mahleng Zolianu in hongpai in huailam ah i ki suantou mai ding uh, a nuamzaw ding hon chih chiangin kava zui tou hi. Kisuan fel khin phet chih dingin, a music inle zil bok ahi dinga, "Have You Ever Seen The Rain" a saklai uh hi in ka thei, ka kisuanna lamte uh hong limsangin hong zaakta ua, akua abang chih om nawnlouin anainai khut hong kilen in lamta uhi. Zolianu’n: “Hong pai ou chih leh ka khuta a let leh kaih thoh thuaha; second bangzah hiam chu Smokie concert a ana lam khin ka hi der mai a. Taksa fit khollou ahihtoh va huchi lam mawk chih himhim nuam kasa keia, ka ki sutkhe nawn pah hi. Huainung keile kisuanglah sim ka diam ah ka kihou mang nawn kei uhi. A hong tawptakin pai dingin ka ki thawi ua, a “pute” toh kilen in a paikhia ua, kalkhat nih a suan nungun ka zuihlouh a muh chiang in “Hong pai ou, paita ding” hon chi hi. Ka paia, mipi sahlua ahihman in ka kikal uah mi bangzah hiam a omman a, ka kizui kha kei uhi. Bangteng hileh gate a pawtkhiak chiangin “mangpha” bek ka khak di chu ka chi lungsima, himahleh gate a ka suahkhiak chiang in amau ana gamla man dek sim ua, kava zalbawl nawn kei hi.

A zing khong in Zolianu in hon huai leh pawlbawl siamdan ka ngaihtuah leh fel kasa thaka, abang dia amin, a veng khong ana dong lou tel ka de aw ka chi sim hi. A mobile khong a leklek lai khonga zaw mobile number khong hon dong leh chi ana hi ding himaithei hia...

I thu ah lutdek panta le. Mizo laigelh- magazine khonga true story a gelhna uleh, buaina neite dotna a dawnna khong ua ka simkhak khenkhat ah ITNA hi, utthu leh control theih hilou, a kingai dite hong kingai mai, itna vangtah ahihleh daltu om, susia om gentheitaka kikhen, itna vangpha lah kiteng mai dan a veek uh hi in ka mu hi. Huai ITNA tuh mi zi/ mi pasalte tunga le va tuthei, mi zi/ mi pasalte va it a vangaih khak theih, va ngaite le a siamlouhna uh omlou, amau control theihlouh ITNA vatu hi mawk ahih manin chi a siamtan sawmna hileh kilawm abang hi.

Itna i chih awlawla hong piang leh khangthei, a pianma, a thuklutma a control theih ahi chi nuama ki nei a hiai Zolianu thu hon gen ka hi. Smokie concert etna dakkal 2 sung khonga fel taka hon huai eh lawmbawl (mihing khat ka hihna a respect leh importance hon pia) ahihman Zolianu pen ka theihngeilouh nungak himahleh maingalhuai leh ngaihnathuai sakna ka neipah hi. Huaitan ah numei leh pasal kala itna i chih hi naikei mahleh mihing khat leh khat kingaihnatna omkhin a chih theih ding. A identity khong ana dong chianga,a mobile number khong la a ki contact tou nilouh le ung or va vehzel in a singpi khumtak khong va dawn zel bang hileng, kineelna leh kingaihnatna a khangtou tou thei ding in a ginhuai hi. Anaute (naupang bang a omleh) kipahna ding uh hisak in kithuahneel pih nalai le, amah kia hilou, anu-le-pa, a naute khong toh leng ki neelna leh kingaihnatna hong piang zomah lai maithei hi. Huaikhit chiang in kong tuamtuama support leh dependency khong a hong ombeh thei a, huai numei khat leh pasal khat kikala relationship pen ITNA (love) i chih lam bang ah paitou thei zomah maithei hi.

Chinese Nungak. Zolianu thu apan i gennop chiang zoulou thei ahihmanin China nungak thu gen nawn ni. Computer lam ka lunglut sim mahmah a, 2000 kum, internet ka khoih tuungin CHAT chih a gen uh zaza ka hihman in experiment ka sawm hi. YM om nailou ahi dinga, Yahoo Chat a Chinese Room a ka lut sin hi. Atungin ahihdan khong kitheilou in ki gammang dekdek hi. Beijing University kailai, china nungak khat in hon houpih a, ka kihou uleh nuam kasa vanglak hi. Identity khong hoihtak a kihilh a, ahi mah a kihou, Home Ministry theihpihna nuai a thil tung ahi. Amin Han Lin ahi a, a yahoo id zaw gen dah mai ni. Zi-le-ta nei khin ka hih ka hilh a, aman le ngaihzawng a neih a gen hi.

A khatvei ni apan sawt kihou simin aban sutzop theih dinmun ahita. Nitak teng phiala ki chat khak in a oma, mel kimu kei mahle, kineelna leh kingaihnatna khat hong piangin paitou zel khat om abang hi. Huchiin hun hong pai zela, naupangte bang leng hon dong zela, naupang a ading in Chinese music video (flash a playte) khong hon khak a, a khenchiang in naupangte peuh ka kihou sak hi. Voice chat pen eia a chiang keia, zattheih taktak ahi kei a hiven ah.

A lawmpa Seatle a software lam nasem, Chinese ahihna ngaina a Chinese nungak ngat zi a neihsawm; US a khosak den ut ahi a. Amah Lin pen le utthou mahleh anu-le-pate’n a ta neihsun uh ahihman in China gam polama a om ding a ngaingam kei ua, huai in a ki ITNA uh nawngkai saka buai ahi uhi. Lin in eigam khonga unau i neih dipdip khong hon eng mahmah ahihmanin na u dan in hon ngai-in chi-in ka ki u sakin ka advice sek hi. Hon u eta, a haksatna leh buainate frank takin ngaihdan hon dong mai a. A ki itna tungtang ua ka advice nilouh dan bel nu-le-pa’n a theihtawpa hon chawm ahi ua, nang hoih ding deih a hon itpen ahihban uah khovak mu masa zaw nana na in thil thei zaw uhi. Amau deihsak khat toh kiteng lechin le na hihkhial kei ding. Mihing i kithuahtam a iki mamoh tuah chiangin ITNA hong piangin hong khang mai hi. Amau thu ngai zaw in chih lampang ka pandan ahi a, akhen chiangin dik asa a, a khenchiang in lah alungkim kei zel hi.

A tawpin Seatle apa toh akikhen ua, nungak pallun lai ahihmanin midang le a vilvil omthou hiven, adang khat toh hong ki mankha pah uhi. Huai nunglam tawlkhat lai hong kikhek sima, hong kilang vang mahmah hi. Ka muhkhak nawna ka dot leh Tianjin ( amau Tourist spot, flat luahding oma, family leh lovers khong a va giahmangna sek uh) a angaihzawngpa toh va hoh uh hih tuak. Na nu-le-pan bang a chi ngaih ding ua, chih khong dong in ki u sak in ka tai bawl hi. Huainung awlawl in ka ki mu khat deuhdeuh ua, awlawl in contact ka mansuahta uhi.

Tua nungak i gen tegel toh ka kikal ua bangmah numei leh pasal kala ITNA i chihdan om kei mahleh, mihing khat hihna a ki neelna leh ki ngaihnatna khat bel a om hi. Mun kibang a om bang hi-in huai relationship pai tou saksak bang hile bel, numei leh psal kala ITNA hikei mahle, insak-inkhang in awlmoh kisain i zite kiang bang a ana gengen mai thei uhi.I zite bangin le amau hun i piak kha hong kiam zek kha maithei ahihman in hon ngaimoh khamohlou ding uhi. Akhenchia hon hehsan khamohlou ding uhi. Eile i hehni bang hong omsam maithei dinga, huaichianga ki Zo pasal saka i hehlungsima, hmm Mizo nungak, China nungak a omna ve! Nang huchi heh gige, hon mudah ing bang kichi maithei hi. Huchi in lawmta i chi hiam unau chi a relationship siangtak i chih kha koilai hiama hekkawi khakna bang omthei maithei hi. Nungak leh tangval kingaite muntuama a omkhak chiang uh ahiam, a hong kikhen khak chiang un khat bangin nasa mahmah in buai thei hi. Huaihun chiangin a kineelpihsa palai a ana zat pen bang uh a hehneemtu hoih mahmah suaka, a kinepnep nalam uah palai leh a vuallel zaw pen bang hong kitenloh chih bang a omthei sek mah hilou hia maw..

I gennop tuh ITNA i chih bel control theih, khansak theih ahi chih ahipen ding. Vaite khong arrange marriage a kiten tangpi lai un eite bel kingai a kiteng ding chih i ngaihdan tangpi ahi. Huaiziakin arrange marriage bang vaite i piakbawl deuh abang hi.Arrange marriage advocate sawm i hikei a, Pathianin mihingte ITNA a neithei dinga in a hon bawl ahihmanin, relationship a oma,huai relationship hoihtaka maintain a i paitouh sak zel leh ITNA hong piang mai ding ahi. A kulleh, nungak leh tangvalte’n nu-le-pa deihsakte pom maile, ki hihkhial law tuanlou ding hi. Ki ITNA hong piang mai dinga, kitenna success lou tuan lou ding hi. Hiai thuidik vaite hiaizahta arrange marriage a kiteng alohchin un a prove khin hi. Alehlam ah mi zi hiam mi pasal hiam va ngaih ahihkei leh zi neisa/pasal neisa khatin nungak/tangval va ngaia kisiamtanna dinga ITNA ahi, control theihlouh ahi va chihpen suanlam leh kisiamtanna hizaw hi. A control baihlam lai tuh atuung lai, a thuk lutma a ki hepsiang hi. Control buai ngai seselou ding i chih lelah MIT KHUP sa a oma, zawlmit neihlouh mai ding ahi.