SIAMSINPAWLPINET SAIA pang kha ka hi kei. Bangtoh hon mekmat a di uam khenkhatin SSPPNet a membership hihna ding kei kianga hon gen bang a om sek. Huchibang a om chiangin direct a Moderator ka contact keileh SSPPNet sungah ka gena, Moderatorte’n a luttheihna ding conditionte a neih vek uleh ana pom mai ding un ka ngai mai hi. SSPPNet a hon pattung ua kana theih takin ka join paha, kei hihtheih khomkhomin mi kianga ana gensawnin mi bangzah hiam le ka na recommend a member a lakin a om uhi. Tulai-in SSPPNet a membership tungtang gen-le-sak neuhneuh a om abanga, huaiziakin hiai toh keima muhdan neukha ka gen nuam hi.
Kei muhdan ahi lel mai. SSPPNet saite toh contact nei le ka hi kei. Huaiziakin ka muhdan a dikloupi le ahi maithei. Kum 2000 hi in ka thei internet apan Zonet kana mukhia a join sawmin nasa takin kana buai hi. Huailai-in yahoote email ka zang keia a, ki register dingdan a chihdan ua ka hih chiangin yahoo mail ka zatlouh ziakin a dik theikei hi. Atawpin Ginmang Shoute (a bawltupa) mail ka khaka, a hon dawnna pen kei deihbangin a helpful tuan kei hi. A tawptawpin bangchi chi hiamin ka ki register thei khong hi. Huai nung sawtlou in SSPPNet kipan khia ahih Zonet tungtawn hiam mahin ka thei kha a, ka ki register pah ngal hi.
Ka mintakin ka ki register a, ki registerna dinga deih uleh a ngiatte uh ka bukimsak manin hon pom ngal uh hi-in le ka thei hi. Huchi in discussion leh debate ah leng kamin tak mah zangin kana ki hel zekzek hi. Website tuamtuam ah leh group dang khenkhat ah phualva chi in ka ki registera, huaite apan thil poimoh SSPPNet a forward nop ka neih chiangin phualva pen SSPPNet a member hilou ahihna ah a lem keia, a tawpin huai laia SSPPNet Moderator Pu H.Laldawnglian kiang ah ka ngena, phualva pen honna pomsak pah hi (ka mintaka SSPPNet a omsa ka hihmanin). Ka theihkhel keileh phualva id zangin SSPPnet ah discussion/debate ah ka tel kei. Forward na kia a ka zat ahi tangpi.
SSPPNet hong ki patkhiak hi Manipur a unau kala buaina i neih sawng lai ahi a. Peace Accord aki sign fel naikei in ka thei (ka chiang chiah kei). Huai sawng mahin in unau Hmarte chih khongin le a bawlpah ua, amau a dia kibawl deuh a ngaihna a om manin va ki register ka sawm kei hi. Va sawm lengle amau mi-le-sa hihlouhna ah hon pom uh ka ging tuan keia. Bangtenghileh, asaitute’n huailai boruak huzapa pilvan ngai sakna nei ahi ngei ding ua, SSPPNet join dingin i mintawn, address chih khong leh member hisa khatin a recommend ding chih khong a luttheihna dia dan ana bawl uh. Huaia dan ana bawl uh kha paitou zela, a enkoltu kikhek mahleh tuni tana ki zui tou lailai ahih tuak hi. A saitute’n a lutna dinga dan a bawl u leh a lut nuamte’n huai dan zawm mai ngai dan ahi. Himahleh huai dan pen a hun zila review a khek theih ahih le a ginhuai kasa thou.
Hun a paipaia, thil a kikhek zela, tuni dinmun ah SSPP member hi a i theih chiangte a baihlam zaw deuha ki register theihna dinga i dan bang review a puah hunta hi maithei hi. Aziak chu a ki register theilou a lungkimlou zak ding a om zeuhzeuha, tuin le My Struggle To Become Member Of SSPP Net! Chih khong a article gelh hial bang a omta hi. .
No comments:
Post a Comment