Pu J.Thang Lian Pau’ khutsuak map neiding i hi ta a, review i chi diam, hiai map tungtang neukha gen sin ni. A masain hiai map i neih hi nam masawnna melsuang (milestone) khat ahi a chih theih ding.
Communication gina omlouh mana unau sanggam tuamlua dana kimuhna neite i hi a, Lamka a om khatin Laituite khat mukha leh laitui chih bang a omna thei ngeilou ahihmana, gamdang, gam lapi a mi dan in koihna nei in a unau et di bang in enlou kha thei hi. Huchimah bang in Tedim mi khatin Singngat khomi khat muleh gamdang mi, chihdanin muhdan khat nei thei ding hi. Hiai map i neih chiangin Lamka pa leh Tedim pa in map le uh Laitui/Singngat khua omna thei in chiangpah ding ua, Zosuante i tenna, i luahna gam a ki zomvek, i kala gamgi tuamtuam kikhung tawm lel ahih leng a chiang tuan mahmah ding uh. Pu Thang Lian Pau in ama hih theih khomkhom a, gim-le-tawl khoksa loua gam-le-nam a dinga a contribution dan a ngai a abawl ahihman in pahtakhuai mahmah hi.
A min. A map min ZOGAM MAP hiam Zomite tenna map hiam chi ngamlou in CHAMPHAI DISTRICT, LAMKA DISTRICT, CHANDEL DISTRICT, TEDIM & TONZANG TOWNSHIP, KALAY & KABAW VALLEY MAP chi in a tung ah a gelh hi. Zomi, Zogam chih khong huap zaupi ahih mana, Zogam Map hiam Zomite tenna map hiam va chi leh a dawkkha lou tampi om thei dinga a gintak man a amin a huchi vuah hiding in ka koih hi.
A mel. A man tawm a bawlzoh ding deihna in a map background multi colour a bawllou ahih Pu Pau in a gen hi. A laipek zat paper quality leng a hoih thokhat a, a nal zetzette ahi hi. A size pen a dimension chiah ka tehlouh man in ka thei kei a, mawltakin Calender chia a pha a chih theih ding.
A map a omte. India gam sunga omkha, Champhai, Lamka, Chandel Districts leh Burma gam sunga omkha Tedim, Tonzang Township leh Kalay, Kabaw Valley teng a map in huamkha hi. International, State leh District boundaries leng chiangtakin kilanga, lamlian (road) poimoh teng leng kilang hoih mahmah hi. Khua 600 val minte tuanga, mual leh lui poimoh teng leng tuang kha hi. Khua, mual leh luite sea level a pan a sandan leng a langsak hi. A map nawl khat ah mun kigamlat dan (kilometer in) in a taklang a, Lamka leh Tdeim ki gamlatdan bang 199 kms kia ana hi lel ahihdan hiai map in hon hilh thei hi.
General Comments. Amah Pu Pau in a gendan in hiai map hi map bawldan diktak a bawl hikei mahleh a scale lam ah leng a dikthei pen ding a bawl hi a, huaiziakin map a scale dan a tehin leng dik huntawk mahmah ding a a ginthu a gen hi. Huaibanah, a size lianlua ki zoulou ding ahihman a a neu theitawp dia kaihchip ngai ahihna ah a telkhalou leh a duhthusam tungzoulou deuh ahihna leng omtham mahleh, a khatveina ding in bel huntawk mahmah a sak thu a gen hi. March 31, 2007 khong a release dinga geel ahihman in a ki release khit chianga muhdan leh suggestions khong a petheithei in pe le, a suahkik lam chianga update leh puahphat na dinga tosawnna hoihtak ahi ding in a lamet huai hi.
No comments:
Post a Comment