Vai film ki kham pen local filmte a ding a opportunity hoih a suah deihna leng hitham ding hi. Film bawlna lam toh kisaia zil ngaite leh a technology poimohte thei leh nei in bawl le market hoihpi khat houh hilou ding a diam...
Meitei film bang dinmun a om ahia, bang chituka mipi in ennuam uh ahia chih ka thei kei. Himahleh opportunity hoihtak bel kihong hi dingin a gin huai. Pune, Mumbai lam khonga film leh drama toh kisai zil theih bangbang om ahia chih dap kual a va ki tathiam zek pawl om henla, huaite’n story, dialogue, location leh moral hoih taktak nei in hon bawl khe le uh. Meitei paua va bawl pen hih theilou i hih lele English subtitle toh bawl le phaizang lam market a zat dan om thou lou ding hia... Mi film bawlsa a theihlouh kal ua a thu le la ana khek gawpa i nitum tum sangin i nahloh peek zaw dingin a gin huai.
Meel le puama a i kibat ziak le ahi dia, a film bawlsiam u leh leh moral hoih ziak le ahi kha ding Korean film Manipur ah demand a sang mahmah chih ahi. Korea pau kuaman theilou napi, a acting leh English subtitle ziak khong a Manipur a lar thei ahi ngei ding. Korean filmte huchia a lar theih leh ei Zo suante’n le hoihtakin bawl le lar theilou tuanlou ding hi. I challeng ngam diam? I kisak ngapa, phaizang lam i mitsuan ding leh vai film bang deuha nungak leh tangval kithohna la, a kaih, a lam leh a music bang phaizang lamte taste a khum deuh ding ngaihtuah bel a ngai ding chihthu ahi.
Zan zeka inlam ka va zin lai un a gang in Meitei video (film) CD bangzah hiam hon pia a, ka etzual leh amau ngeina lui lamte khong nak phorhsuah ut sim uh abang kasa hi. Ngeina lui i chih chiangin thil tampi ah ei singtangmite toh hong kinai kik abang. Huaiban ah amau le amau kia a munzaang neuchik sunga ki khumbilh thei tuanlou ahihna uh a kilang. Kabui (Naga) chihte bang a telkhakna uh a om hi. Huchi ahihleh en le a bawldan siamin amau toh kisai khakna nei deuh khong film bawlin amau taste ding ngaihtuah kawm le, ei bawlte le tui takin a en thou ding un a gin huai.
Vai film omlou hi phot ahihleh ei pawla dingin le opportunity hoih leh panlakna lemchang tak hong kihong ahi mai kei ding maw?
No comments:
Post a Comment