NANG A DUAI ZOH PEUH LEH THIL KI GAKKIP THEI HIZAW HI

[Tuzan ka computer tawlam ka pheklet leh lai lui sim khat ka mukha a, ka sim leh site a post theih thou leh kilawm kasa a, kon post hi - phualva]

Eekhai! Na serious sim viau in ka thei a. Koia bang chi pat ding a hiam ka thei kei sim. Reader’s Digest hiama ka sim khak Punjabite khat tanchin gen zual ni maw (ka theih lai dan in, chih chu, a tanchin a gelhdan toh kibang chiahlou le om thei ahihman) .

Middle class Sikh tangval khat a tupguhna ziak in US ah lai a vazil a, lohching in sepna hoihtak (well paid) a nei hi.Himahleh a hihna a theia, US nungak amah deihte va mitsuan louin a Punjabi pih, Indian mah neih a sawm tinten hi. Khatvei a kholam uah ava hoha, nungak ama a dia qualify deuh teng a scan a, khat a highlight ta hi. Lungtung mahmah ahihman in leh a nungakin le lemsa ahihmanin masawn zelin kiten ding hun khong, a kumnawn a fixta uhi.

Himahleh Punjab a terroriste’n a upa ana thah sak laizang uhi. Amau culture a ute sileh a naute’n azi luah chih khong a omlam a phawka, a u-le-nau leh khopihte khong in a upa zi nei mai dia beisei ding u hia chih khong a ngaihtuah hi. A u zi a neih hial ding a angaihtuah chiang in, hmm a upa zi ava kawi ding pen hi asathei kei bilbel hi. Upa bawk si, lai siamlou zomah! A lehlam a ngaihtuah chiang in a lungtang a na mahmah maia, a upa tate tagah himai ding in a phalkeia, a u nu lah meigong ahihmai ding a phal bok kei. A upa a itna ziak in…

Bang teng hileh inn lam ah a hongpai a, hiai thu bel a genkha kei himhim. A lawmngaihnu kiang ah le bangmah gentuanlou in a kik nawnta. A ki ngaihtuah a, a nu-le-pate khong le khosakna sangtak hilou, amah leng Pathian zar-a, vangphat thu a US khong tunga, tua a dinmun a omthei hilel a. A upa in amah a om ziaka a zi-le-tate meigong, tagah lou dinga lungmuang taka a last breath toh pai hi ding hia chia a ngaihsutsut chiang in a tawp in a upa zi a phoneta hi. Ana kisa inla inlam ka hong pai ding a chita.

Ava pai a, a tonpih maia. A tate bel a kumnawn in a thruai suk ding a chi uhi. USA a tun chiang un kha bangzah hiam sung a upa zi pen mikang pau khong zil sakin, omdan leh gamtat kilawm khong a sinsak phot hi ( pawlnu lai khong le siamlou hiven). Huchi in a next year ah a tate a pii suk ua. A tate’n le nuam asa mahmah mai ua, aman le nuam honsatenta hi. A kuapeuh inkuan khat in aki pom un aki ngai vek uhi. A zi pen kha USA ah bangbang hiam social activities khong ah a ki involve saka. Kuaman a upa zi ahihlam le a thei kei. A hihfuh phian ahi di chu, a zi ki involve na lam khong ah leng, US a Indian community laka tallang leh min neipi khat hong suak hi.

Nungak siangthou tak chhaiha, bulpan kha ka hi kei chih ka pom. Himahleh family leh marital relationship ah ka success louhna ka thei tuan kei a chi top mai hi.

Hiai i pawlpa thu kon gen zenzen na ahihleh, mihing i deihbang, ei ut bang in thil a paikei thei. Ahihhang in hinkhua (life) omlou ahi tuan kei. Miteng a hinkhua uh va suut in va suui le, bangbang hiam a gaw niknek a om vek mai thei. Huchi kawmkala, thil omdan accept a decision la leh the will to go on and face life neite hong dingsuah zel dan ahi; khovel kha hichi dan ahi chih kon gennop na ahi.

Tu’n na lawmnu thu neukha genta le. Na lawmnu pen in hon ngaikei chihna ding thu a om kei. But her upbringing kha, aman decision la a, a family chihlouhte a le ki tomzak a, a ma deihdan/ utdan hihkhe teitei mi ahi kei. Huaikha amah kia hilou numei tamtak (pasal tamtak le hi) paidan ahi thou. Amah va mohsak luatna ding a om kei. Lehlam ah family kichup taka hi di uh a chih theih. Nu-le-pa tamtak in a tanu/tapate uh zi pasal ding ngaihtuah in a buai ua, a tuung apan hawisa in a koih zomah ua, a pichin zel uhi. Huchite family ki bawlte success rate a se kei. Huchibang kha society paidan khat ahi thou chih le pom siam ahoih ding.

Mi khenkhat in ki-it, ki-ngaih i chih khong i kithuah tam leh hong piang mai ahi a chi ua, huaile a diklou tuan kei ding. Vaite khong hichi zahta arrange marriage a nuamsa leh lohching a om un a gen chiang ding. Huai dan a etin na lawmnu leng a utdan hikei mahleh, “nu-le-pa thumang a nahloh a pek” chi hive hang in, successful married life a nei thei thou ding. Huchi bang bokin nang le, amah sanga fuhzaw, na kimil pih zaw na tuakkei ding chih kua ahia gen thei? Tulel in chu, huihpi leh pingpei khong in a mutlup dek khong na kisa maithei. Tunglama Pa’n exercise la dia hon deih le hi maithei. Mi lungleng leh tuak fuhloute ziaka khovela, la hoih penpen leh literature thuuk penpen te piang khe zel dan ana hi lim hi.

Ei bangle i ki ngaihtuah chiang in nidang lai khong in i lungsim hon kamte zum louin lai khong ah ana ki gelh maimai sek le zaw, hoih pipi le ana om didan eive chih ton a om sam. Tu hun khong in bel i lungsim in le thuk leh gil taktak a ngaihtuah pha nawn kei ( nuam isa chihna hi kei), bangmah ki peih zou taktak nawnlou hi. Thil bangkim ah hunlai, i hatlai a om chiat.

Na laigelh khat vei ka simsuak a; huai khit in, ofis a le nna a tamkeia, kon thai suak suk mai hi. Revise le ka bawl man se kei. Bang chi nasa diam ah. Duhthu a samkeia, na pom theihlouh om leh, kikum zel ni. Interactive deuh a, a feedback khong toh i ki respond chiang in thi a pai fuh zaw a banga.

Chidaih le! London (khomin khek ahi) a omnu kha hia? I pawlte khat kianga na address ngen hih tuak. I pawlpa’n kei pen Kamkei (min khek ahi) hongsa in, na address hon hilh in hon chi mawk dan hi veh aw.

IT’S PART OF LIFE, NOT THE END OF THE WORLD. NANG A DUAI ZOH PEUH LEH THIL KI GAKKIP THEI HIZAW HI.

9.5.08