MAUTAM CONCERT!!

RAYBURN COLLEGE, Lamka a Concert For The Hungry a ka va siimna thu toh kisai kon gelh bilbial ding. COMFA (Combat on Mautam Famine Aid chih ahi mah hia kha?) te vaisaina, a thupi Concert For The Hungry chih ahih mah banga mautam ziaka kial thuakte panpihna ding a sum zonna a neih, Aid Zomi, Japante sponsore ahi.

Atelte.  Lasa siam a tam a, inlama ki om tamlou ahihna ah theihlouh bang a tam sim hi. A lompi a genin lasate a nuaite ahi uhi:

ZOMUS (Zomi Music Uplift Society)

MZI (Mizo Zaimi Inzawmkhawm)

ZAA (Zogam Artists Association) leh

CCpur District a tribe tuamtuama lasiam minnei deuhte

Lasiam khenkhat, gentehna in, Mimin Baite, Benjamin Thomte chih khong mel a kimu keia, lasiam kidaih thou i hi ding chi’n ahoihlam ka chi mai.

Music. A music bawlte lah siam, sound lam leng a hoih thokhat. MZI artist te’n la a sak chiang un music track a zang ua a dang teng tuh live music ahi sim. Music bawlte ahihleh:

Lead: Thanlian

Bass: Pauginmuan

Rhythm: Pauthianlal

Drums: Sonmuan Valte

Keyboard: Sia Khup

Hiai ah leng Go Hau chih bang tel ding ka na sak mawkmawk leh a mel a ki mu kei, himahleh music bawlte’n a nehsoh ua a kipahhuai lam hinawn.

Hosts. A host i chi diam a anchor te lah fel in muanhuai mahmah zel uhi. Mi thum ahi ua, Lamka a om chih mahtak a kul leh pau tuamtuam bangin hon gen thei ziahziah lel uhi. Amaute tuh kua dang hilouin:

Ginkhanlian

Lianlunching

Damhoihching

Azei mahmah ua mipi bang a tok phur zou mahmah uhi.

Sound & Lights. Sound leh lighting lam hi Mungbawi, Bungmual leh Imphal lamte a chi uh abang. Imphal lamte pen Teimeite hi dingin ka koih maia, a min uh le ka thei kei. Kuamah le lah ka dong kha tuan kei. Sound leh lighting lam a hoih thokhat chih ding ahi. MZI lamte music track a play dek chiang un Aizawl banglou in a play tupa’ Teimei lam houh a diam ah, stage tung apan a Lusei pau a track number agente uh hon play fuhlou leh mulou pahpah khasek ua stage tunga pan Jojo-i (Josephine) hong tai suk thithita, amun a ava hilh mai leh TBC le a hong kumsuk angaih nalnal khong a muh a nuamkhin chiah kei chihlouh a fuhlou gen luat ding a om khol kei.

Concert Honna.

Concert honna program a sun a YPA Hall ah neih khitsa hi a, Manipur CM in last minute a a cancel ziakin Minister Pu T. Phungzathang in Chief Guest hihna la in concert honna nei hi. Hiai program CCpur district MLA te Pu V.Hangkhanlian, Pu. Manga Vaiphei, Pu Hangkhanpau ten leng va uap lum ua Manipur Chief secretary, Relief lam enkoltu Paulunthang Vaiphei IAS chihte leng kihel ua, a kuapeuhin mautam ziaka gilkial thuakte awlmohna leh a panlaknate uh gen vek ua, COMFAte’n hichibang event zanga i gama kial toh kisaia mipoimohte leh mipite a kaihkhop uh fuh mahmah uhi.

Concert. Concert tak pen nitak dak 5 a patding chih himahleh sun a vuahzuk ziaka sound system lama buaina omzek manin kipan theilou a, 6:30 pm vela kipanin zan dak 11 tan neih ahi.

Nitak-an nek khit dak 5 pelh nungin Raburn lam ka naihtou ua, a kong lamlian gei a motor ki park ana tamsim mahleh a sunglam apan thawm zak ding om nailou hi. Mi bang leng ana phul khe sima, security lam khong leng muh ding a om thepthap hi. Etman omlou, ticket ki zuaklou ahihmanin in gate sunga i lut leh nungak fel taktakte’n form hon pia ua, huai form a min, omna veng leh kial thuakte panpihna ding i ngap zah gelha a sak deuha bucket lianpi toh na tu nungakte kianga form leh sum piak lut ding ahi hi.

A sunglam a i lut leh stage a kimuthei pah a, banner ah 5th September 2008, CONCERT FOR THE HUNGRY, Sponsored by Aid Zomi, Japan chih ki gelh hi. Agei ah screen liansim khat a oma, a nawla school building ah AIRTEL, AIRCEL ads khong kitak seuhsouh hi. Stage mai tak ah mun-awng za sim a om a, huai banah sound control na khawl, speaker lianpipi leh stage salhna ding meivak khong omin, stage tung ah leng sound box lian a size tuamtuam 8 hiam a lehlam tuak ah om hi.

Sound adjustment bawl in na phe buai vengvung uhi. Stage tunga musiciante te’n le amau vante leh microphone te a sound paidan check in buai ten uhi. A sound lam khawlte koihna tung tuipuan in kikhuha, vuah hong zu leh tuh a kawt kei ding, hilele a en dingte bang a ki chi de aw.., stage tung leng vuah in a thehkha chiah kei ding, himahleh lasate’n a perform thei thou ding uam chih khong ngaihtuah khakin om pah hi. Huai tuipuan kikhuhna leh ground ning tuak ah tau dohsang a oma, huai tau tungah cameramante tangpang uhi. Huaite ban ah concert lai in stage tung leh a nuai a closeup a lim la pawl a om ua, sound le hoihthou ahihna ah hoihtak in editng hon bawl le uh hiai concert video kha hoih mahmah ding eive ka chi lungsim hi.

Stage mai mipi lama pana eta taklam pang deuh a plastic chair san vual tamsim in ki koiha, a vual masapen ah mi poimoh diakte tutna ding bench/sofa ki koih hi. DC pa’n huai tutna hong luaha, a nungin Tipaimukh bialtu MLA leh a zite bang le hong tu uh hi. Huai chair sante ah ka tukha ua, ka nung zek uah khuam kiphut in zawl a kikham a huaiban tuh din thoh ding ahi.

Kipanta. Siamzading in Mautam leh concert tungtang tawmkim hon gena, huai khitin Lamboi vaiphei in thumna hon neia, Suman Singh Deputy Commissioner in le mipite la ngai ding a hong paikhawm leh ngaklah mahmahta te kiangah kisuanglah takin thu tomchik hon gena, a mautam ban ah zusa tam ahihmanin natna (epidemic) laka leng kiven a kuldan khong hon gen hi.

Concert kipatna ding in ZAAte’n lapawl in WE ARE THE WORLD hon sa ziahziah mai ua, siam petmah uhi. A Lionel Richie ding a Tina Turner a Stevie Wonder ding etc aw tuamtuam ana neikim vek ua a sa taktakte toh a ki lamdanna a omkei. A puangtu in hiai la phuaktu Michael Jackson ahi a, Ethiopia gama kial panpihna dinga phuah ahi a hon chih mawk leh, diklou deuh hi in ka theia, ka ngaihtuah sau chiangin lah ka chiang kei thak phinga, ahihi hita ve chin ka ngaihtuah nawn kei.

ZAAte’n a kizomin la nih a sa ua, a nihna pen tuh ZOGAM AW (Thawn Kham) ahi. Hiai la pen hon sak chiangun Zomus lam a Lengtong pauno leh Kapno, MZI lama a heutupa uh Ruata, Jojo-i leh TBC leng a tel ua. Sun a concert honna a neihlai ua (extempore speech neih bang deuha a) track om hiven extempore song i sa ding uh chia a sakna ua ana telsak sa uh ahihmanin concert na ah hiai la sasiamta a gelh enin ngaih taktak a sakhe thei in nuam asa mahmah heuhau uhi. Lengtong pauno leh Kapno in bel a saksiamsa uh ahih mela, Mizoram lamte’n phur taka hon sak pih chiang un a et hong kilawm in muh nuam tuan mahmah hi.

Huai khit in Kapno hon samlut pah ua, tutung tuh puannak san hilouin, angou bantawn silhin cotton lam pang khekol a tenga, a sam leh a mel khong kisil khin phet fresh mahmah a bang hi. A sai lamte’n a dial awhsak u toh NALUA E chih hon sa bang tuh! Mipi, a diakin a teirol nungaknoute kidek zoulou ahi ding ua sousang mahmah vengvung uhi. Kapno zohin Lengtong Pauno in NANG NA ZUANG LOU MAW chih honsa nawn a, mipi lam a thawm a ngaihdan Kapno a toh kikhe lotel lou hi. Pauno le a T-Shirt vom toh a mel leh sam khong fresh mahmah bihbiah hi.

Aban a lasa tengteng in a lasakte uh ka chiamteh seng kei hi. A ziak tuh lasiam thak a min uh ka thei ngeilouh khong tampi a oma, a puangtute’n hon puang chiang ua zak fuh louh bang a om, a khente lah a la min hiam, a la kaih hiam hon puan lel chiang un mipi in ana theikhin mai ua, e’n na ki theimai sek lou hi. Bangteng hileh a la sate ka theihtheih kon ban gen thoh mai ding. Linda Biaklun bang Kungfu(chi mai ni) kia siam ana hiloua la leng ana siam law dan ana hi zenhouh hi. Elson in honsa a, huaikhit in MZI lam apan Jojo-i leh TBC in Lusei la hot taktak honsa ua, a la a leng Mizoram chih bang tel kha deuh tei gun ahihmanin Mizoram gim hong nam pah a, Mizoram gimnam lah Lamka in a paktak lam tak ahihmanin nuam hi suk zel mai.

Son Samte in TS Khai Hit Zogam Zogam honsa bok a, Hatboi in Thangvan Asi, a min ka theihlouh khat in Zorock’ Latest Hit “Zoram Ngaih Hla” hon san awn hi. John L.Varte, Sinlung Star in kize koi ngiaungiau in a la Hit deuh khat ahi ding (mipi’n le thei mahmah) honsa a a siam vanglak hi. Kuki Artist Association lam a pan Mangboi Vaiphei chih ahi in ka thei in Phualva, Phualva – Liandoute unau chih dan deuh khat hon sa hi. S.N.Thanga, Muanbiaklian, Muanlal, Pauginmuan chihte leh mi dang dangin leng honsa uhi. A min u leh a la min ka theih kim louh manin a vekin kon taklang theikei a poi kasa.

Taklat theihlouh tawpa le a sequence dungzui a a lim uh hon tak ziahziah ding ka chih hinapi huai le ka lohsam hi. Concert lim lakna ding chizena kei camera muanglou a ka naute a zatsak ka kichihleh, a lithium battery charger a hoihlou pen pokha ahi ding ua, lim kon lakpat leh flash bang kizang ahihtoh camera a hong mial pah mawka, deihbangin lim ka lathei kei maimah hi. Akhenchiangin ka mobile peuh ah ka la a, a khenchiangin camera pen ka khoihkhoih leh hong ki ON thei nawna, bangzah hiam ka lakkhit chiangin hong mial nawn zel hi.

La bangzah hiam sak zoh tengin a puangtu lamte’n puan dan tuamtuam leh kilawm taktakin stage maia seng 2 ki koihsunga kialte panpihna ding a sum penuam te’n va khiak theih ahihdan hon puang zel ua, mi tawmngaite’n a vangkimin ava khelut zel uhi. Tipaimukh bialtu MLA pu in kial panpihna dingin 5000/- hon thoh a a zi in stage tung ah thu neukha hong gena, huai kawmin a naute uh John L.Varte (Sinlung Star) la sa dinga request ahihdan hon puang ngal hi. Program set sa om ahia, ahihkei leh mipite’n Kapno, Kanpno, Kapno chichi maimah ahih chiang ua nial zoulou kisa, Kapno “Miksi Thouvai” chih khong omna kha honsa sak ua, huaikhit Pauno in Malaysia lama a phuah pen “sou na vinveng e” chih omna kha hon sa hi.

John L.Varte hon sap chiang un a request tu ana paiman a de aw peuh ka chi a. Request theih ahih leh chi a hi dinga, Hiangtam Lamka hausapu G.Thangkhosuanmung in kial panpihna dingin Rs10000/- hon thoh toih a, stage tunga kamkhat gen ding a chi, mipi in lah lasak mah ngainuam a ana chiak zuazua uleh a gennop hon genpah theikei sima, a tawpin Kapno “miksi thouvai” lampang mah sa ding in hon request hi. Huaizah thoh chu a request lah manlouh na dan omlou, nungaknou lamte kipak mahmah uhi.

Zan sawt deuhdeuh, kuamah lai pai lou, nuam deuhdeuh, MZI leh mi dangdang hun hong tang nawn uhi. Atawpa zan dak 11 bang hong gin hial dek chiangin ZAA lapawl hon sam ua, MZI leh ZOMUS leng a lak uah a telsak nawn uaaaa, a sate’ in a mipite hileh khelah takin mangpha chih hong hunta.

Hiai conert toh kisai genbeh ding, gentuak tampi a om dinga, tuahkhakna na kon gen zek lai ding.

Lasate.A pumpi a etin lasate a lar deuh ngen, local cable khonga a late uh leh amau mipi’n a theih dimdemsa uh ahihtuak a. La honsak chiangun lasate toh mipi kipoh/kizom hoih mahmah in lasate hi’n mipite hileh nuam asa chiat uh hi. Mimal a abuk gikpen leh mipi in a paktat pen uh Kapno hi mai leh kilawm hi. Hiai i chih in midangte mipi’n a ngaina kei uh chihna hi zenzen lou hi. A thawm neukha ana za le uh chia Kawlva phone a ka ngaihsak leh Valte in le za nuam a chi a, bang teng a zamah ding uam ah.

A boruak a hun leh a mun zila sak ding mah ahi dinga, Gospel lam honsa hi a tam kei. Mizoram khong ah banghiam concert nikhua khonga gospel lampang hon sak chiang un a hun leh a boruak toh kimil chiahlou saksim ton a om thei a. Tutung bel huchi lua a tam kei.

Huai gen lailai in Jojo-i in a perform sungin a puan bang a khek mana, Jean khekol khuktan a tual teng in a tung ah dial pan te solsol thei a tenga, la a sak chiangin a mic gui a pheipi bul zawn khong ah a len deuh a, a khenchiangin a dial ten a kaitou pian sek. Ngaihtuahna ah Mizoram music industry a competition level Lamka lam sanga sang zaw deuh mah hi ding eive. Mipi ma a peform ding le dress leh gamtat ngaih poimohna sang zaw eive. Decent tak a kilang thou si in mihip thei ding, sexy takin a perform chih ding ahi.

Hiai concert a CCpur District sunga lasiam minthang pente leh Kawlgam leh Mizoram a lasiamte kaikhawm a concert thupi tak nei thei chih hi Zosuante music khovel a chiamteh tham khat hi in ka ngaihtuah hi. Zo music variety a kim a, level tuamtuam a muh theih ahihmanin. Lamka in ma lazel leh tunung chiang in leng hiai sanga thupi zaw sem music pawipi bawl theih luat ding hitah e chih ngaihtuahna ah a om hi. ZAA lamte’n ana chiamteh le uh.

Mipi. Concert sim mipi a tam mahmah a, gintak sangin mipi piching mahmah leh phattak kasa hi. Nidanga concert khong a om chianga suanga kideng, gophel a kikap, kisualzak peuh om nuam ahih a kigen sek a, huchibang thil khong a hong om maimah diam kana chi gu sim a. Huai phetlou securityte bang a om thepthap mawk u leh kuate hiamin bomb peuh hong pailut mawk le uh zaw.. chih peuh. Himahleh huchi dek suailou hi. Music hong ging a la hon sak chiangun mipi tom in lam ziahziah mai a, sakpih a ngaih chiangin lasate sakpih ziahziah mai hi. Lasate bangin le a mic uh mipi lama doh in mipi sak hun bang a bawlsak ua, a pai hoih mahmah. Mipi in a deih uh a gen ngam ua, hostte’n lasa ding a puan chiang un mipi in kipahdan siamtakin na respond pahpah a, a deih khat uh a dot chiang un le gen thei pahpah uhi. Atawpkuan in ZAA lam apan V.Siampu in kipahthu leh mipi feltak a a om man ua a pahtak thu hon gena, hichiding ahihleh tuban nitak chiangin concert dang le ki neingam ziahziahta ding ahih hon gen hi.

Amun.Rayburn compound pen zau huntawk ahihmanin open air concert neihna dingin lemtang ngut hi. New Lamka sunga om…. Kei a bangmah theilou na ngaihtuahna mawkawk ah New Lamka sunga concert om ding ahihmanin unau pau tuam deuh zangte maingal louin a hong sim kholkei mai di uam kana chi sim hi. Himahleh concert pai hoih saan laitakin zun hong suaka, ka naute khat toh zun kava tha uhi. Zun tha khin hong kiklam a nawla pan mobile a mipi lim ka lak phei dek leh “Hetah pawh. Hetah pawh” chih aw ging ka za a, ka etphei leh honna nuihsan thremthram ua, ka meltheih a de aw chia ka hoih etthak lelah ka meltheih le a hi tuankei. Huaile deihkhop louin ka naute ka tonpih pen, kiphatna hilou leh kua zakdah louh dingin melse khollou hiven, huai thoh ut piansim le ahihtuak ua, “In nu ami a?” khong hon chi ua. Ke’n le “Nilo ve. Ka nau a lawm” chih toh taihsan ka thuah hi.

Hiai kon genna zenzen ahihleh a mun a lemtan banah i Zosuan pih, unau dangte le tangnel mahmah thou uh ahi chih ka gennop man ahi. Music ngaina Zosuante a koi a koi ah tai lou ding ahih leng ka phawk hi. Kipahhuai kasa, tunung chiangin le school nei lamte’n le hichibang event khong zatna dingin ana phaltou zel le uh hoih ding hi.

Makaihna. Hiai concert, kial douna toh kisai district pumpi huap ahia a vaisaite Zomi lam hi a Zomi pomchiah nailou i unau khenkhat le tangnel taka tel thei, mipi le broad minded mahmah hi in ka mu a, makaite phathuai uh kasa. Huchi ahihleh Zomite’n kong tuamtuam ah leng i district, i khopi ah makaiin vai sai leng lohching toutou ding hitah chih ngaihtuahna ah a hong lut hi. Ka ngaihmoh sim khat bel sun hun a YPA Hall a a honna progam a neihna uah English aki nak zat mahmah a, ei local pau tuamtuam khong zang suk bilbial maile hoihzaw lou ding adiam chih ahi. Ahi a lah ngaihtuahna dang khat a sorkal lam hon aiawh Chief Secretary leh DC pute khong a khualna leh mai-etna dia a kul mah houh hi’n teh ka chi zel hi.

Mial lua hikei. Atawpna dingin a gal apan Lamka hiam Imphal hiam, Manipur chih khong i ngaihtuah chiangin kimat-kithah, gamnuaimi, thau, bomb, corruption, bandh chih khong a lut pah seka, polam apan kuapeuh in huphulh bawl leh life omlou phial dinga koiha negative taka en i batlai in a mun a i om leh huchi khol hetkei veh e chih ding bang hi. Imphal bang ah leng zan ah mi nak heisuk-heitou law thou uhi. Huchi telin a mial kei. Lametna a om nalai hi. Ministerpu T.Phungzathang in le mautam ziaka gilkial a kuamah si lou ding i hi chi hiven ah.