Tuni office a lai tuamtuam ka sign leh lai khenkhat tunga ka mobile ana omkha adiam ah lai ka kaihna lam ah ka mobile table pan tuang/carpet tung ah a hong kesuk bouh hi. Neukha kunsuk zeka second khat sunga top mai ding hinapi, ka nasep lakloh chi-in ok, denchiah ka tawm na ding ka chi lungsim hi. Huchia nasep sunzom a ka om lai-in ngaihtuah khiak khat ka neia, kunsuk zokin ka mobile kia ka tawmpah hi.
Bank a ka seplai in nikhat cashierpu in leave a la hi. Cashier-cum-General clerk ka hihmanin leh clerical staff dang omlou ahihmanin huaini cash counter a tut toh a pawlam nna etkol ka thuah hi. Counter sunga ka tutlai in Meghalaya Co-operative Apex Bankte’ sum hong deposit, ahi in ka thei, bundle tampi a vum maia. Bundle khata note 100 a kimna hiam chih ki check a kisim vek sek hiven. Simnailouhte munkhat a ki siahkhawm apan bundle khat sim dinga ka dohkhiak leh Rs10/- bundle khat ka tutna chair sang nuailam ah a kesuk hi. A kiat theimah leng ka sum sim tha-it ka hihman denchiangin ka tawm na ding chi-in ka ngaihsak kei hi.
Counter polam apan substaff pa’n hon na enen mah zaw hi ding hiven, sawtsim ka sim khit nung bundle khat ka kiaksak lam theilou honsa ahi ngei dinga; Cash Counter sunga hong lutin ka nungah hong ding hi. Sepkhoppih ahihmanin leh a sumte ka malama ngena om amah ka nunga om ahihna ah ginlelhna ding khat leng ka neikei hi. Huchia ka nunga dingin hong houpihpiha, ken le sum sim ziahziah kawmin ka na houpih hi. Huchia kaki hou kawm ua ka chair nuaia bundle kia pen awlawla akhe-a ana thai pheiphei hihtuak hi. Aging huthut sim khat om in theia, ka ngaih hoih chiangin a dai zel hi. Atawpa ngaihphalou simin a nuailam ka etsuk leh pawlpan ama dinna gei ana thai tung manta hi.
Kisuanglah lawtel in hong lamdang hial hi. Koi chi-in ka laksak pah a, amah le a pawtdok pah hi. Ana gu man hiallou ahihmanin bangmah action lak chih hial zaw om sam kei. A kiattunga nak theihlua, mangngilh vual hilou, awla tawm na ding ka chih hi mahleh pawlpa hong luta hong houpih nilouh lai khongin ka na phawk nawn het kei maimah hi. Tuni nasep laitaka mobile hong kiak leh hiai ka ngaihtuah khe kha laizang ka chi. A moral chu ahithei tana thil a hunhuna hih pahpah ding chih hipen lou di hia maw..
[11.6.2009 a gelh ahih chuu]
No comments:
Post a Comment