VAI SOCIETY LEH EI SOCIETY

A mun zaw i gen dah dia, vaigam mun khata ka om lai in ka inluahna neitupa Brahminte ahi hi. A huang sung uh inkong ah coconut kung, kawlsing kung, pak kung leh singkung dang tamlou a pou hi. Thildang bangmah a pou keia, leilak ah loupa a pou hi. Inkong lam bang zul ah aithanglou leh pasikhawm ka suan zek ua, bangmah zaw a hong gen ngei kei uhi.

Compound umna teklei dai gei ah, a min ka thei zok keia - be chi khat chi mai ni- a gah ning li khong nei, a sial a salad dan khonga nektheihte kha ka tuh uleh hong pou in a gui bang hong hoih mahmah in kawlsing kung khonga zamin buk zozen hi. Awlin hong pak in a gah bang hong omta hi. Hong huchih takin inneite’n a gui pen hon na sattan sak mawk uhi. Bangziak hiam chih bel ka dong tuan kei hi.

Tu nunga ka ngaihtuah thak chiangin gin dan khat ka nei phing hi. Vai society hi sappau a social stratification a chih uh ah Brahmin, Khsatrya, Vaishya leh Sudra a kikhen a. Hiai kikhenna hi society a arole uh, a nasep uh dungzui a kikhen ahi. Brahminte a ansang pen leh siampu nam ahi ua, amau nuai ah Khsatriyate - kumpi leh sepaih nam, huai nuai ah Vaishyate – sumdawng leh lou nasem pawl ahi ua, huaiban a aniampen Sudras – thagum a nasem pawl, dalits, harizan (untouchables) a chihte uh ahi hi. Society a adinmun chiat uh ki theih mahmah ua, ngaih poimoh mahmah uhi. Huchibang ahihna a Brahminte compound sunga lounasemte hai zam buk lehluah pen ngai theilou a hon na sattan sak hi ding uh eive ka chi thak hi. A dik diam ah...

Hiai gen lailai in inluahnate toh kisai genbeh zek ni. Inn nung lam ah nullah a om a, a bana invengte gam sungah kuva kung pou siausuau lakah tuikulh (pond) a om hi. Vuah a nak zuk chiangin tui bang a tam a innunga nullah khong ah tui a hong vung dimin bathroom a tui pawtna vang bangah tui a hong lut thei dek phial sek hi. Nikhat nullah a tui lakah gul khat ka mu ua, bathroom vanga hong lut kha mawk leh insunga gintak louh laitaka gul muh theih mawk ding chi in ka that uhi. Inneute’n a ngaihdan uh hi khol hetlou maimah hi. Bangmah pi chu a gen kei na ua, a lungkim louh uh bel ki thei hi. “Posonous zaw hi hetlou hia” a chi lel uhi.

Brahminte inn himahleh bawngsa huan theihlouh chia dan hon bawlkhum khollou ahihman un bawngsa ka huan sek thou uhi. Intunga om ahih chiangun a gim khong zaw za le uh kilawm thou hia (a gimin a thei di uam ah),  bangmah zaw a hong gen ngei kei uhi. A guh lian, a kheguh chih khong i leikhak chiangin a paihna ding a buai huai deuh chih thu ahi a hiven. Plastic khonga  hoihtaka tunin kholai pawt chia’n lui gei khong a paih khualkhual sekin a om hi. Muslim veng khong ah ki omkha le bel a buaihuai kei dinga.

Chi daih le, gennop zaw a tuampi ahi sim hi. Ei society ah le social stratification omta - a nei leh neilou kal khong ki gamla lawta, man-le-mual leh mou vanken tungtang khong ah leng vaite dowry toh hong kibat khak ding lau huai chi in dan khong ki bawl hialta hi.  Hong om hi tawk lele vaite a dan hial zaw i tun theih hial a ginhuai kei chi mawk le. Vaite a zaw hi deuh ngallou ahi. Harizante khong a pil ding uh, lai a siam ding uh a lau namah ua, hong khanglou taktak le uh a society uh leh a sahkhua uh chimzak ding hi maimah hi.