Bangchik a ngai ngei le hilou pi zannitak in naupangte MP3 player a 100.7 MHz a ki broadcast Aizawl FM Radio ka ngai kha laizang hi. A hun le kana chiamteh kha khol kei hi. Ka ngaihpatna ah English la ahi a, Radio Jockey numei khat hiven (a min agen ka mangngilh), a zei mahmah maia, sappau lah a neh boka a aw lah hoih si, a ngaih nuam kasa mahmah vial hi. Huai khitin Hindi lai a hon play ua, Hindi RJ le numei mah ahi a zei mahmah thou vial hi. Huai khit lamin Mizo la ahi nawna hiai a nu pen chu a puandan apanin RJ chih sangin announcer chi le kilawm zaw leh kilawm kasa mawk hi. Himahleh a gente apan a ngaikhetute toh kipoh mahmah uh ahih akilang thou hi.
English hi’n Hindi hi’n Mizo hun ah hitaleh a ngaikhetute’n SMS a thotte uh hun kidaihlouh ziaka a veka sim manlou ahihdan khong uh a gen kawmun a lemlem hon sim zeuhzeuh ua, la a deih uh play dinga ngetna leh a puangtute a ngaihnat dan khong uh, a star dan khong uh, a aw uh a ngaihnop dan uh khong a hi tangpi hi. Khenkhat lah gamgiakin a gamgiahna ua pan ana ngaihkhia ahihdan khong uh a hi. A khenchiangin a puangtute’n pautam law le uh la tam ki play manlou ding a lauhdan khong uh hon gen ua la khong hon play ziahziah ngal uhi.Akallak lak ah AIDS khong a kiven a kul dan la tomchik leh nalh taktak advertisement khong hon play zel ua, a tom a gen in ka ngaihkhiak masak nipen himahleh a hon impressed mahmah hi. Latel ni chih bang omtuan lou a, SMS a a deih uh a telte uh a playlist ua a telkhak leh play ua a telkhak kei leh ngaisiam ding a ala play dek uh ana ngai mai dingin RJ in a ngen mai sek a. A telte’n meiawi kawma ngai khong ahihtuak ua RJ te’n a khenchiangin na meiawina ua hong tel hileng ka nak ut e, mel kimu a kihou hile ka nak ut e chihdan khongin a ngaikhetute a chhaih zel uhi.
Tuni office kaitawp mai khong phiat a ki wash-up khita mei ka awi leh ka tapa pan a MP3 player tawi in: “Pa, endih Silchar FM manpha eivoi” a chi a ka et leh 101.1MHz a ki broadcast hi a ahun 6:23 Pm ahih dan MP3 player a kigelh ka mu hi. A la ka ngaih chiangin ka nuih a hong za sim mawk hi. Silcharte a hi dek suailou in Jaintia la ahih ka theipah mai hi. Nidanglai a acoustic guitar toh singtang khua a tangvalte lasakte toh a ki unau mahmah langlang hi. Jowai FM Station a ki broadcast pen a music leh sound ging khong Aizawl a Mizo FM toh a ki khe mahmah kasa hi. Huaichiah Jowai apen ah la khat a bei chiah la dang a hong kipan nawn mai zel maia, la thum bang ka ngaih khit chiangin le announcer pau ding ka za naikei hi.
Huai laitakin ka nungaknu un Ann thuk khin ahih dan hon gen a ann ka va neta hi. Lunglei FM ka ngaikha kei a, a puangtute Aizawl te bangin a zei thou ding uam ah. Aizawl FM a SMSte ah Kawnpui a kipan chih khong a hon gen ua, Mizoram Kawnpui ahia Lamka lam Kawnpui chih lah a genchiang si kei ua, bangteng hileh Aizawl apan Jowai FM ki ngaikhepha ahihleh Aizawl FM Lamka Kawnpui ah le ana ngaipha thou ding un ka gingta tinten hi.
Huchi dana ka ngaihtuah chiangin Lamka FM a RJ nungak zei takin eipau ngei mai a hon puanga ngaikhetute hon chhaih kual vel ding khong kana ngaihtuah leh ka ngaklah law tuntun mawk hi. Lamka FM bangchita amaizen a? A pau zat ding kituh a kilem theilou i hih lele zingkal apan pau tuamtuam kikhel ziahziah a zankim tantan broadcast mai dan khong le omlou a diam peuh ka chi hi.
No comments:
Post a Comment