KAWLGAM

Kong thum hong za in Toupa

Kawlgam vai hong hawmin

Nuntak suahtak zaitha damna

Ngai ung e

Malaysia a nisa nuai a a nasepna a phuahna Nimna Dildial chih la ah Lengtong Pauno in a tunga dana sa in lawkta bangin tau ngeungeu hi. Showers Sisters te’n le a la uh khat ah Kawlgam teng Zomite, Vaigam teng Zotate chihdan khat a sak uh a om in ka thei hi. Internet a Facebook ka zat chiangin Burma lam a kipan Zomi gamdang pai leh Burma sunga om mah friend bangzah hiam in ka nei tei hi. I online chiangin huaite laka a khenin Hi! chi in hong houpih sek uhi. I kihou a omna khong i ki dot chiangin  India a om ka hi chimah leng kawlgam a na khawlui uh koilai ahiam khong hong chi thouthou sek uhi.

Burma a om Zomite’n Burma gam a gen chiang un Kawlgam a chi ua, India gam a gen chiang un Vaigam a chi uhi. India a omten bel India gam genna dingin Vaigam chih kizang khollou hi. Ahihhangin amau chihdan zui in Burma gam genna dingin Kawlgam va ki chikha zel uhi. India gama omte’n Burma gam Kawlgam i chih a, Burma a omte’n India pen Vaigam a chih u leh a kilawm thou in a awm thou hi. Himahleh Burma a omin a gam genna dinga Kawlgam a va chih nilouh chiangin a omna, a tenna leh ama  Zogam bang Kawlte piak bawl kha a batna om hileh kilawm hi.

Ei Zosuante lakah Mizoram in gam a nei ua, Mizoram pen Mizote gam chihna ahi. Zosuante laka gam nei nailou bangzah hiam ki omlai hi. Gam nei nailoute hi gam neitu hihna dinmun le la utlou, la theilou, gam nei lele enkol thei nailou ding dinmun i hihman a Pasian in le gam hon pelou mah a de aw chih theih ton a om hi. Mizoram sung ah G Group tampi i om a, huaite in Mizoram i pupa a pan i tenna hisam mahleh ei gam dana ngaihtuah khollou in i unau R Group te piak bawl i bang hi.

Huchimah bangin Manipur ate’n i gam talpakte piakbawl i batna om hi. I khopi Lamka bang le unau khenkhat in takpakte mah piakbawl in amin leng a talpak min mah deih zaw uh abang mawk hi. Huaiziak a Lamka a le khek zoulou nilouh ki hi ngei ding hi. Burma a lah i gensa banga Kawlgam chih hi. Nagate khongin ka gam uh, inch khatle kuamah pelou ding a chihchih u leh India sorkal nangawnin Pakistan toh kaal ah huai kampau hon zangta hileh kilawm hi.

Gam neitu hihna dinmun nei thei Naga leh unau Mizo in gam neita, a neitu dinmun a om thei nailou Zomite i hih mana gam le a nei nailou mah i hi mai diam?