Vangsiatna, natna leh sihna chihte mihing in deihtelna a i tel theih hilou ahih i thei tek hi. Sihna pen kuapeuh tunga tung ngeingei ding ahihlai in adangte bel tungthei, tunglou thei leh kiven theih ahihna tan om hi. Mihingte’ hiaite tunga thuneitu hilou i hihmanin bangchi tukin deihlou in tunsaklouh sawm in kiveng lele a hong tung thou thei ahihna om gige hi maimah hi.
Accident i chih khong fraction of a second sunga hong tunga mihing poihlong sak, si sak mai thei ahi hi. Hou chik leh awm hetlou a accident a si hiam poihlong chih bang a om theih lai-in, sih ngeingei na dia kilawm khenkhat ah bangmah chi hetlou a suakta bang om thei zel hi. A issue tak ka thei keia (hausa supporter leh support lou khong a diam ah) ka neulai in Kaihlam khua ah kitualsualna a om ngei hi. Piching hon kisual chih mah nasa mahmah ahi ngei ding a, huai kisatzakna a telkha khatin hichia a gen lamtak ka thei hi: “Mihing tuh ki si mawkmawk hetlou dan eive, heiga gawp zen a i kikhet lele ki silou ahi.” Lehlam takah lah “tapkuang tunga kia bang le si” chih khong om zel.
Vangsiatna i chih bang le huchi dan mah ahi hi. A vangpha a omlai in a vangsia, a kamsia om sese a bang hi. Vangsiatna chih hial di zaw ahi kei dia, neulai thu khat mah gen nawn zual le. Khatvei ka lawmpa toh “taat” gah lou dingin taat kung lianpi khat ah ka kal uhi. A kung lian ahihmanin a hawng, a hiang khong kang bekbuak hi. A hiang lianpi khat, a danglam ah khuaisia bu omin a kung rong toh kibang mahmah ahihmanin khuaisebu muh hak sim hi. Hilele ka mu pah vanglak uhi. Huai khuaisia omna hiang ah ka lawmpa awlawlin kaltou khiankhian a bangmah chilou in kaltou thei mai hi. Kei leng huchi mah a kal tou khiankhian ka chih leh huai khuaibu apan khuai tengteng hong lengkhe zozen uh a diam ah dawm hetlouin a dehin hon deh souhsouh mawk uhi. Lawmpa toh dinmun kibang hetlou maimah hi.
Natna leh damlouhna chih khong le huchi bang deuh ahihna om a chih thei dingin a gintakhuai hi. Pilvanlouh ziak leh kikeplouh ziaka natna leh damlouhna om mahleh huchilou le om veve a bang. Khenkhat in a taksa uh kemsiangthou leh kidekzou mahmah napi in natna lauhuai cancer chih khong a vei thou lai un khenkhat lah nek-le-tak, tep-le-muan kidek hetlou, utut ne a dawn lah damlou tuanlou chih bang om thei zel hi.
Huchi ahihna ah khenkhat a hinkhua ua a thiltuahte uah vangse tuam kisa in Pathian bang fair lou chi-in mohsa nuam hial uhi. Bang le hihkhial ka hi zozen a, hichitel a gawt leh haksa ka thuak tuam peuh chi thei zel uhi. Haksatna, vangsiatna, tuahsiatna, natna, damlouhna chihte tuah hun oma, a tuak oma, a tuaklou le om hi. Hiaite laka tampite mihingin pilvan ziak a kiven theih ahihlai in eithu hilou a le tuah theih, Pathian vanzat leng ana hithei gige mawk hi. Natna, damlouhna, haksatna, buainate bang le Pathian in a vanzat, Ama thupina a latsak leh puanzakna dinga a omsak hi thei tham hi.
Hiaite tung, a diakin hinna tunga thunei Pathian ahi chih phawk gige in amah ah kinga zou le bangkim a zangkhai-in i hinkhua nuam leh thoveng pen ding hi. Huchilou a mihing hatna muang hiam a om ahihkeileh muangloua lungkham hiam a i ngaihtuahtuah chiangin mihing ngaihtuahna paihat lawtel ahihmanin taksa siatloh tana le ngaihtuahna zat khak theih hi mawk hi. Natna, damna, sihna chihte Pathian a ahi chih a Psalm gelhtu in “This is the day that the Lord hath made, we will rejoice and be glad in it” a chih kha nitenga zuih sawm gige ding hihtuak zaw hi chi phet le.
No comments:
Post a Comment