Pupa’n “Imphal ah i va zin ding” ahon chih mawk chiang in Zorock in “Yes Sir, Yes Sir” a chih dan deuh a “OK Sir” chih mai a ngai hi. A hohnopna teng lah ka theihsa ahih chiang in ka hong ki ngaihtuaha, Lamka pen pumpelh theih dan a om de aw chi sim in, Moreh lam ka ngai poimoh zaw phot hi. Kon ngaihtuah chiang in lawmpa Khampu, Moreh ahihkei lele huai lam zau a posting ahi himhim chih a hong lut a, ka mobile contact list a amin ka zon leh ana om petmaha, ka phone ngal hi. Ka hong kihou chiang un Moreh a posting hilou a Pallel ana hi zaw dan ahih ka thei a, sawtpi ki contact kha nawnlou ka hihman un inkuan, naupangte tanchin khong ka kidong tuah ua, thukhochang ka houlim khit un thil omdan hilh in “Abang teng hileh kal nawn chiang a ka hong zin uleh, Pallel a hon tawn ding unga, Moreh lam a na hon makaih ngai ding ahi” ka chih leh a aman le lem hon sata hi. Ka kihouni uh kiginni ahi maithei, chihnop ahihleh, Pupa’n khualzin ding a gen chiang in hun a tam nawnkei seka, sawm thuthut mahleh Guwahati apan communication hoih ahi ding a zinna ding ticket muhlouh a om tuan kholkei hi. Achi namah a, “mailam hun sawtpi ka plan kholh chiang in banghiam a hong omsek a, ka plan dan in ka paithei kei”, a mohpuakna lian leh tam ahihman in thil hong om thuthtu a tam sek a, a lem dandan in a omsiam tou zel mai sek hi. Moreh a ka hoh di ni ua ke gel, sintawpni pen lawm Khampu’n le inlam (Imphal) a pai ding a ana gel kholhsa ahih man in Moreh apa’n Imphal tan kiton suak ding in ka kihou uhi.
Sunday “Pate Ni” a thugen ding ahih man a kiginkholhna ding nikhat bang poimohsa a, sintawpni a inlam a pai sawm dan ana ahi a, chiangkot leh mankhawng kituak chihdan pian in ka hun gelna uh a hong kituak kawikawi vanglak hi. Pupa North East pumpi ei sang a le nasa taka fangkual dimdem leh theizaw ahihna ah Lamka (ama theidan in Churachandpur) leh Moreh bang nak theihlua hi. Public sector khong leh government office tuamtuam a sem “Churanchandpur” mi tampi ana mukha, ana theikha, ana zakha ahihman a Lamka pen a muhnop, a zinnop gige dan ahi a, huai ban ah amah lah damthei, active leh adventurous mahmah khat hiven, khualzin bang nuamsa in, mithak toh kimuh/kithuah leh culture, ethnic tuamtuam annek khong le chiam nuam gige khat ahi hi. Lamka, i khopi a amau lawi tunna ding a kilawm ding hotel chihbang i hon ngaihtuah chiang in i theihlouh man adiam ah, ama beiseih bang sa kei khaleh chia kisuanlah huai saksim in a om maimah a, zin ding a gen khak chiang a le kup phat utlouh sek in a om hi. Huai chimahle, banghiam chia a loutheilou dinmun a om khak leh kivenna ding chi’n zanlam zek a Lamka ka va zin in a gang Sanga (mipi simdia gelh ahihna ah, denlam chia’h Pu Sanga i chizawta ding) kiang ah Angels Place-a a Guest House uh a “a kulna a om zenzen leh ka pu hong giaksak ding ka hi” chia kana genthawisa, amah le ana kihuamsa dan ahih manin tuna ding lungkham huai lou hi.
Angel Place-a a Guest Room te uh tuipi gallam mikangte khong a hong zin chiang ua a tunna uh, a giahna uh ahih ban ah, ZEPADA toh kisai hiam a IAS Officer Lamka a hong zin bang le huai a ana tungsak ahihdan khong ka theih kawm bok chiang a ka nget mah ahi hi. Pupa’ lah hailou ahih chiang in “Impal zin chiang a pai dingdan, om dingdan bang hi ding ahia chia” chia ama plan dan dotkhiak sawm a i dot bawl chiang in “Manipur ah chu nang a boss na vele. Arrangement na bawl dandan i hon zui mai ke” hon chihsan maimah ahihman in huchi ahihleh Lamka pumpelh zon zek lai ka sawm sim a, hilele a loutheilou ahih zenzen lelah 14.6.2012 a Guwahati apan Imphal boh khita, Manipur sorkal a Finance Secretary ka muhkhit chiang ua Lamka paipih touh ngal zawk a, a lungkimna dia zankhat va giahpih a hoih de aw chih lungsim ka neih man in Imphal a office-te kiang a hotel booking bawl ding pen confirm lou in a last minute tan ka ngak mai hi. Himahleh lenna ticket ana arrange pen Jet Airways zing dak 9:05 ahi a, ka mi muh dingpa uh ka muhkhit chiang ua le auto dealer bangzah hiam kimuhpih a, Imphal office a staff meeting neihpih kul ding ahihman in Lamka paisuak lemlou ding a hong banga ka pai ding ma zan un Impahl lamte hotel ana book ding in ka hilhta mai hi.
Lamka tungtang gen zek lai le. Lamka in hi minthanna tuamtuam a nei a, pawl XII tan bang ah laisimna ding a institution hoih taktak a tam hi. Polam mite in le laisimna ding a ahong naih theih ding khop ua hoih tampi om mahleh a omna, a location lemtanglou deuh ahia, min theilou uh ahia, ahihkeileh polam mite pilut thei ding a ei amite ana kiman lou i hia (inluah ding khong leh hotel khong lemtanglou a diam) state polam mi kuamah in hong naih khol tadih lou uh abang hi. Pan lakzek a state polam a kipan siamsin tampi kaihlut theih dan a om ngei ding. A minthanna dangte i sui man dah ding a, i gennop zawk ahihleh Lamka khonuam leh a hoihna le tampi om mahleh state polam mi huchitel in hong lutlou uh abang hi. Ahuaiziak mah a tuna ding hotel hoihdeuh chih khong le omthei nai tadihlou ahi ngei ding, ahihkeileh om napi a ke’n a theilou zaw le ka hi maithei. Lamka mite India gam munteng a kithehzak gawpta, Manipur a district khat lel himahleh amite kithehzak zou mahmah i hihman in i gintak sanga mi’n ana theizaw tham ua a zinnuam bang le ana tamzaw hi kha maithei ahi chih khong lem leh lemlou in i genlut hamham nuam hi.
June kha, tuklai chih mahtak Guwahati apan ka kipatkhiak ni un khua a nim in mei a tam a, a mial ngemngum sim mahmah a, airport zuan a ka pai lai un lampi ah “Tuni lenna tuan chu turbulent sim ding eive” ka kichi uhi. Khualzinna a lenna tuan le nuam, baihlam leh hun save mahmah bang mahleh, khua a hoihlouh a lenna a kisawi puak noknok chiang in a nuamkhin kei sek a, lungsim khat a huphurh sim tuak ka hi di ua aw chihsim in a om hi. Ken bel zingkal dak 8:30 a Indigo pen a pai ka utsim dan ka hi a, aman Jet Airways ngaina deuh hileh a kilawm a, Jet Connect 9:05 apen a Travel Agent-te ana book saka, ka hong tuan chiang un ATR ana hi teuhtauh maimah; mi 40 vel tuan theihna lenna ah passenger 18 khong lel ka pha ua, tawm kisa sim ka hi dinga lenna cancel kei na vanglak uh e peuh ka chi sim hi. Ka hong lenkhiak ua meipi tung a ka hong ki lapsang chiang un a tunglam khua ana siang in neulai a zan bang mial diak a diam ah khavak tangpha mahmah i sak bang in ana vak hoih mahmah sengsang a, huphulh sim dan banglou takin ka tuanna uh ATR uh kisawi chih om mawng lou in smooth tak a leng in Imphal dak 10 in ka boh uhi.
Office lamte’n honna dawn ua, Impahl a educational institution lam in bangbang program nei a chi uhiam ah, polam mi tamsim ahihtuak a tunna ding hotel ana muzou manglou ahihdan uh a hon gen pah ua. Kou le hotel book dia ana genpah lou ka hihman un “Nou mawh ahi kei. A omom ah ka tungthei ding uh. A omkei lele a kul leh nou inn a giak mai ding ka hi uh. Bangmah lunghimoh kei un” ka chi ua, Airport apan a paikhia a lamgei koitak hiam singpi hotel a breakfast ne zual ding in huai khit chiang a Secretariat a ka mi muhdingpa uh office a paisuak ngal ding chi in Tulihal Airport apan ka taikhia uhi. Breakfast pen a lemlem, a omom ne mai ding ka chih uh himahleh Imphal lamte’n lemsa lou in tunna ding hotel zong fel phot ding in, huai ahihkei leh Anand ahiam a ne ding a chih man un amau hon chih dandan ka zui ua, bangchi chi hiam Whengbam Leikai Road a chihna uh, Hotel Bheigo ah Room khat a hon ngen dok thei ua, huai a kinga phot in breakfast khong neta uhi.
No comments:
Post a Comment