Tulaite’n nidanglai a laigelhthei masa, Britishte huzap khak, niteng a diary gelh thapthapte kiphalou ahi dinga, a ni leh a hun ka na chiamteh kha kei hi. August 2010 khong ahi ding, nikhat ka phone a hong ging a, ka lak leh Kawlva ana hi a, “Rajdhani ah ka tuang a, tu’n Bihar lak vel ah ka om lel uh” a hon chi hi. Ka kihou ua, Guwahati a hong zin dek ana hi hi. “Huchi ahihleh, Aizawl lam le na hong pha vanglak kei dia maw” ka chih leh, tutung a hong zinna toh kisai, survey khat a chi in ka thei, a N.E. lamte amah mohpuakna pe deuh uh ahihdan a gen a, Guwahati apan Delhi a kik nawn phot ding in, huai khit lam chia a tuam a Aizawl lam a hong zing sawm ahihdan a gen a, kei le Kawlva’ Aizawl a hong zing ding, a tak mel kimu ding, houlim ding le tam chi in a hong zin ding ngak in ka na phur mahmah hi.
Kawlva toh a taka mel kimu kei mahle ung, phone in ka kihou mun uhi. ZogamOnline toh kisai bang ah thil tuamtuam kikum in ka kihou mun mahmah uhi. Adiak in Biography Section, T-Shirt, ZOL (Music) Project, ZOL Facebook, ZOL amah a ki run thei ding a Advertisement khat koih ding, aman a ads ding a hawisa om chih tungtang khong ka nak houlim kha deuh uhi. Mimal thil ah lah mobile phone lei dek chiang hiam, laptop lei dek chiang hiam khong in amah ka rawn sek a, phone in ka kihou sek uhi. My Mobile magazine bang ka lei khak chiang in ka tapapa’n a pakta thei mahmah seka, ZOL a ka lawmte My Mobile a sem om ahihdan khong hilh a, a magazine a Kawlva min kigelhna khong ka etsak chiang in thupi asa mahmah in a kipak mahmah sek hi.
Guwahati a zin nung kha khat le a pha diam ah, thu zaknophuailou pi khat a hong om a, gintak hetlouh pi in Kawlva in hon omlouhsan ahihdan ka za phut a hi kasa theikei in, pom le ka pom thei kei hi. ZogamOnline lam ah tangval fel Zoson in a tanchin a hon gelh pah a, Siamsinpawlpi Net khong ah leng a tanchin leh min a sun dan uh leh poi a sakdan khong hong kigelhte beh zel a, gingta kei taleng, a taktak mah hi ding ahi chihlouh theihlouh a hong suak a, ka dah in poi leng kasa mahmah hi. Thil tampi ngaihtuahna ah a hong lut a, mihing in i hinna tung a thu nei hetlou i hihdan bang a hon ngaihtuah sak hi.
Mel kimukha nai kei mahle ung, Kawlva toh ka kitheih patna uh, ka kizopna uh leh ka kithuahna uh ZogamOnline ahi a, huai ban ah phone tungtawn in ahi nawn a, hiaite zang a kaki thuah nasat ziak un mimal tak in ka it in, ka ngai a; a nam, a Zomi zawng a ka et chiang in amah bang a tangval fel, latest technology lam a up-to-date theihna hoihtak nei in hunloutak a hon paisan pen i nam a ding a le channa lianpi hi in ka ngai hi. Hihtheih lah ka nei kei a, amah toh kisai banghiam bek gelh ka sawm ding ka chi a, Siamsinpawlpi Net a amah toh kisai hong kigelh ka muh teng ka mail ah Kawlva min vuah in folder khat ka bawl a, huai ah ka save vek hi. Banghiam gelh ka sawm chiang in ka gelh thei kei seka, SSPPnet a ka save-te tuni dong in ka kol lai hi.
Guwahati lam zuan a Rajdhani a hong tuang a, Bihar lak a tun ua a hon phone pen, phone a ka ki hou nunung pen uh ahih ding lam ka na thei kei a, huchi dingdan in le ana koih ngei kei mahleng ka kihoutawpna uh ahi maimahta hi. ZOL toh kisai ka kikupte uh bangmah bohzui leh sepsuah theih ahita kei. Phone thak, laptop thak khong lei dek chiang in phone a rawn ding ka neita kei. A khen chi’a phone a hong gin chiang in “Kawlva ahi de aw” ka chih ton bang om sek mahleh amah ahi ngei nawn kei. Nikhat ka phone a hong ginga, ka etleh a ka contact list a “Kawlva” chi a ka save phone a kipan ahi a, a inkuanpihte’n a phone zang thei ahi uh chih ka ngaihtuah kha himhim kei a, hon phone-tu min a “Kawlva” a kigelh mawk chiang in, kipahhuai kasa man a, himahleh “Kawlva in phone zanglai maw? Koi a om a de aw... A omna apan phone zattheih lai a de aw” chih khong ka ngaihtuah man a, phone bang ka la ngam zok kei dek hi.
La a ka houpih chiang in anu ana hi a, “Nou na mintak uh lah zanglou u chin a, na min uh hon kitheilou a” a hon chi pah a. Kawlva phone a contact list leh call history khong apan a hon phone hi ding hi. Ke’n le ka min khong gen in, Kawlva honna paisan na a poi kasak dan khong ka gen belbual hi. Gen belbual ka chih chiang in, huai hun a Kawlva’ phone apan a phone call ka don guih mawk leh lung bang a leng a, lamdang lah sa a, lah kipak, feeling tuamtuam in hon tuam chiang a kamsiamlouh nak-a-lai a, ngaihtuahna bang pai khollou in anu kianga ka gendi pen le theilou ka hi sim hi. Anu in puakdan asiam mahmah kasa a, nu fel tak hi leng kasa hi.
Kawlva toh kisai i gen chiang in maihtheihlouh khat, gentam ding bel ahi kholkei na dia, a lawmnu bang ka phawk in ka hehpihtha a suak hi. Pathian in amah ana pii tou leh enkol zela, hinkho nuamtak a zat ka lamen hi.
Kawlva toh phone a ka kihou nunung pen uh kum nih bang a chingta, a taka mel kimu manlou ka hita uhi. Kum nih a hong chin chiang in Kawlva phawkna a ka gelh ding in hiai thu tomchik sit sim mahleng tuzan in kon gelh theih sun ahi phot hi. “Lungsim ah na hing lai hi, Kawlva.”
Paite nungak, leh lasiam, Grace Kimhoihching, facebook a Kawlva through a ka theihkhak ahi a, aman a U Stephen a ding-a a lasak (Van Inn Ah.. In Honour of U Stephen) le koihkhe himhim ni.
25-9-2012
No comments:
Post a Comment