Moreh Leh Lamka - V

I thu hong saugawpta ahihman bottan mai in a tawpna lam naih sawmta ni. Lamka a paina genlouh phamoh ding ahihman in huailam hi ding hi. A bullam ah ka genkhata in ka thei, e’n Lamka i chih mi’n Churachandpur a chih uh pu in le ana theilua ahihman a munuam ten hihtuak hi. Huai ban ah kou sepna toh kisai a business potential bangle bangchi om ding ahia chih a mun a muleh idea neithei ding chi hi ding in ka koih mai hi. In-leh-lou tulai facility ginatak om neilou a ding in tu laitakin Lamka a pute va hohpih ding  giahkuan sang in Imphal pansan a kileh nawn lemzaw leh kilawm hi. Lamka mi chia hon muang sim mahle uh i omlouhna sawtthouta ahihman in Lamka a mi khoheizia leh koikoi phakpih kilawm ding chih bang le ki theilou sim ahihna ah Pu R.Sanga neel tak in ka man mai hi. 

Lamka muhpih lel ding, a mun a sawtpi ompihlouh mai ding chih dan ahipen mai hi. Imphal apan ka kikna ding uh lenna ticket pen nitaklam dak 5 lak ahi a, Lamka apan Airport delh mai ding a kisa ka hi uhi.  Pu Sanga le Lamka lam a ana paitouh laitak hiven, ama nitak apan in Saulim Restaurant ah lunch ding lim deuh hon na order sak in ka chi a, deihdan pen item khat ah sa tel henla a dang eilam meh a tamthei lam hileh chih ahi pen mai hi. Aman le Sauliimte ana hilh pah a, himahleh a item a bawl dingte uh ka dot leh  chiang zoulou deuh hileh kilawm kasa a, huai lungsim kilkhat ah ana lutsuk pah hi. 

A zingchiang zingkal dak 7 lak khong a Imphal nutsiat ding, Lamka a inn a breakfast nek ding ka chih uh himahleh a hun in ka kipankhe zoukei zel ua, dak 9 lak in ka paikhe thei pan uhi. Official a pai, Imphal khong a official a hihdite ki hihkhinta, holiday mood sim kawm a bangmah kinoh khollou a gamta aki hihleh ki punctual zoulou deuh abang sim hi. Lamka a ka unu kiang ah “breakfast ding ana bawl inla, a om leh patung bang maiteh khong toh ana huan le chin” ka chi hi. Ningthoukhong lak ka tun un lunch nitak a Pu Sanga toh lunch ding ka kihouna uh ka phawkkhia a, ka dotthak leh “ka gen chu hia bangbang a bawl di uam ah” khong a chihthoh a ningsim le hi maithei, a phone number uh hon pia in Sauliimte toh ka kihou uhi.

Sauliimte kiang ah ka deihdan ka gen a, eimi hilou mundang a kipan pute hon zinpih ka hihdan, a sa sang mah a le ei Zomeh tuamtuam khong chiamsak nuam ka hihdan khong leh local aksa bel item khat a atel ding chih khong ka gen chiang in amau lam a kimin hetkei mawk uhi. Amau panna le ka theihsiampih thou a, amau huchibang huan/serve ngeilou uh ahihna ziak mah a ki request thoh  ahihman in amau le lemsak mai awmtak ka chisim hi. I gen teitei chiang in ka huan siamkei ding uh  chi in hong pang zel ua, ken le Sauliim ah huchibang bawlkei le uh le inn a  a kuapeuh in ann kine, ei singtang meh kine, amau a huansiam kei uh lele a nute uh ahiam, aute uh ahiam inkuan a a huanthei khat ana huansak mai ding, a huanman bel kipe veve ding ahihdan ka gen teitei a, a tawp in convince loupi in ka ki houlemta uhi.

Hiai mun ah pial zek le. Den a Zomeh i chih a ZO i zat chiang in eilam ah aneitu deuh kisa ahiam, a neilou deuh kisa ahiam ahihkei leh piakbawl deuh leh ana sang deuh bang om hileh a kilawm sek a. Zoan, Zomeh, Zovok, Zodamdawi, Zobuh, Zotui etc dan in a kuamah kisuihkhakna di omlou a kuapeuh in ei tualsuakte tang a ZO i zattheih hun hong om pah ding in lamen hang.

Kipanhak, hattailou ka hihman un Lamka ka tun  un dak 11 lam ahita hi. Moreh a ka hohna gari mah uh  zang in Moreh party bel ka kim nawnkei uhi. Bengalipa kiang ah “Tutung nang ana om inla, a khotual deuh, Zira (Mizo staff khat) nang tang  in hohleh a hoih ding”  ka chi ua mi li (4) mah ka pha uhi. Lamka ka tun un ka ute inn ah ka lut ngal ua, Pu Sanga inle honna ngaihven ahihman in ka tun uh ka hilh a amah le a hong paipah hi. Inn ka tun hun ding uh hilh lou ka hihman un ka unu in roti leh kabuli chana khong ana bawlkhin in hotcase ah ana koih mahleh a minbaih meh huantawm ding a chih - patung, maiteh  toh tuaiki hon alhuan zok a ngakna in singpi ka na dawn uhi. Breakfast kon nek chiang un patung leh maiteh tui sa vitvit bowl a i hawp dupdup pen roti ana kituak phian hi. Gintak sang in pu in le patung meh pen lim sa mahmah a, hon hawpgai pah in a omlai hiam a chi a, ka unu’n a thukbeh hi.

Breakfast khit in Angel’s Place leh orphanage dang khat ah ka ah ka hoh man hamham ua, Sauliim a ka lunch uh nitaklam dak 2 lak in ka va ne man pan uhi. Aksa, anzou tui leh Bai (sathu tel) khong ahi a, quantity bang a tam zozen hi. Kou le banghiam thut a omkhak leh chia a extra deuh ding a ka order mah uh ahi a, himahleh ka breakfast nekna uh sawt nailou ahihziak ahiam ann bunlua ka omkei sim uhi. Bai a sathu kihel in ka thei a ana khing pian simta hi. Sathu ahihleh bawng ahihkeileh vok hi ding chihna ahimai a, a kibawldan khong pupa kiang a gentamlouh hoih in ka thei hi. Ne niauniau sam zaw hiven. Lim a sak leh saklou ka dotleh a bai pen houh “lim mahmah chita lai”.  Nekkhit phet in inlam phak chihle om nawnlou in Imphal lenna phual lam ka delh suk ngal uhi.

Amalam ah Lamka a mikhual tunna ding hotel ahiam CK deuh khat poimoh chih ka genkhata a, nek lam sai leng a poimoh khat ahi. Sauliim, Fat James chihdante a changkang mahleh tua kei mikhual dante ei Zo-an mah ki chiamsak nuamzaw ahihna ah, huchibang nektheihna ding siangthou huntawk a om poimoh mahmahta hi. Polam a nasem lah tam deuhdeuh, polam mi toh kingai leh kiteng lah pung, polam toh sumdawnna bang le hong tam semsem ding ahihna ah Lamka ah polam mi ann ne ding hong  tam deuhdeuh lai kha ding hi. Sohchiar leh chow va chih ringot hunlou deuh ding hi. Shillong khong ah Jadoh leh Khasi dish chi tuamtuam nek theihna ding a om a, Assam ah Assamese thali leh dish tuamtuam tampi a om. Kohima khong ka theikei a, Guwahati, Shillong leh mun tuamtuam ah Naga dish kizuakna a om nualta, a Zo lampangte check!