Zomite’n vdo a music album leh movies kong i bawl chiang in i market pumpi a zuaklou in a bawlte omna kim teng khong ah kizuak lel lai tadih abang hi. Lamka lam a kibawlte Lamka leh Imphal kan ah kizuak khollou sim bang hi. Huai a kizuak lei ding le a release ni leh release khit hun bangtan hiam dawr khat leh nih khong a om lel a, inlam a omloute Lamka khong ah kha guk nung ahiam kum khat nung ahiam khong in va zin in a copy lei ding zong le uh muhzoh ding om nawnlou chihbang hileh a kilawm hi. Kawlgam ah leng huchibang hi sim thou ding hi. Kawlgam lam ate bel sawtpek apan in India ah leng a hong lut zel a azia omdeuh chih ding ahi ding. India lam a kibawlte Lamka lam a hongzin mimal khat-le-nih in a lei uh ahihkei leh zuak di hial a kawlgam lutlou ahi de aw ka chi sim hi. Ka gintak dan mai ahi a, diklou pi le ahikha ding.
Himahleh tuni chiang in tuh thil a hong kikhek zekta abang. Kawlgam lamte gamdang ah a naklut ua, kawlgam lama kibawlte USA, Malaysia, Australia, Norway leh koikoi ahiam ah kizuak panta a, India lam ate ahihleh India khopi Delhi, Bangalore, Shillong chih khong a kizuak panta in gamdang ah bel kuahiam tawmngai in pan alak ahihkei leh a zuak dingdan arrangement bawl om mang naikei leh kilawm hi. Bangtehg hileh a tangpi a gen in i marketing bawldan in masawn deuhta a a bawlte zong met deuhta ding chihna ahi i chithei ding. Marketing bawl ding dan tu a sanga kichian leh felzaw khat bel poimoh mahmah lai hi. I culture toh kisai, i nampuante, i vanzat tuamtuamte nek ding i duh i ngaihte leh ei zogam suak thil khatpeuh zuakna i tamna deuh teng ah khat chiat bek a om hunta hi. A zuak, a dawr bawlte le lawklou tuan khollou maithei dinmun ahita ding in a gintak huai.
Kum bangzah hiam paita in ah album/movie a disc neikha khatpeuh in youtube khong ah na upload in ana koih pah ziahziah sek ua, a kizuaklouhna mun a omkha a deih mahmahte a ding in phatuam mahmah hi. Ahihhang in tuhun chiang in a bawlte in le youtube a koihlou ding a ngetna bawl in ana koihkha a om zenzen chiang in le kuapeuh in mohsa in lakhe kik ding bang in kisawl zelta ahihman in album/movie suak thakte youtube khong ah muh ding a om pahpah khol kei a, a om lele trailer khong ahilel simta hi. Banghiam function lianlou khong a laksakna chihdan khongte bel aki upload pahpah a, hilele huchite hoihtak a a video ki edit hiam sound mixing hoihtak a kibawl hi khollou ahihman in huchipi in ngaihtak lou deuh abang hi.
Tuni a hichibang dinmun a i omtheih a hoih leh ahiding mah ahi a akipahhuai i chi ding hi. Ahihhang in ahihna tak ah album a ki release khit nung kha guk ahihkeileh kum khat nung chiang in a zuakna munte uah leng a deihte lei ding a copy om nawnlou in kimu nawnlou sek zel hi. A kizuakna mun a omkhaloute in a album deih in a original ngat leinuam le uh le a leitheihna ding, neihtheihna ding lampi omlou suak hi.
Huchibang dinmun ah album bawlte in a album sung a la hoih deuhte khat le nih bang a release tung a kipan in youtube ah koih pah zaw uhen la, miteng in ana mupah leh advertisement hoihtak hizaw ding in amukhate’n a deihlam uh ahihleh a copy neitheih dingdan lampi amau a ana ki zontheih zaw kha mai ding uhi. A zuak khitnung uh kha guk ahiam kum khat nung ahiam a a munpi a le lei ding a kimuh nawnlouh chiang bang in a full album youtube ah koihzaw maile uh a leitheilou dinmun a omten ana ngaithei ding ua, a la uh minthanloh, mi tamsem in theihloh leh kepchingna khat leng hipah zaw kha ding hi. Huchibang mah in movie bawlte in leng a release ma un a trailer youtube ah koih in a release khit a zuakkhit uh, a copy zuak ding a bei lam chiang in a full a koihdan khong ngaihtuah le uh a mukhalou tampi a muh ban uah a kepchinga khat hi nawn pah ding hi.
Gentehna ding in zanlam zek a Bukpi lamte’n Khupching leh Ngambawm film a bawl bang uh gamdang genlouh Lamka leh Imphal simlouh India khopite le bangmah zah tung khollou ding in ka gingta mawk hi. Khupching leh Ngambawm i chih bang a bawl uh a hoih emaw a hoihkei emaw Zosuan teng in a tangthu i neih ahihna ah English subtitle bang bawl zomah in a release ma in nasatak in trailer khong thehdalh in advertisement kibawl hileh gamdang genlouh India sung kia ah le Mizoram, Assam, Manipur ah leng Sadar Hills etc ah bangzah hiam chu kizuak thei mahmah ding in a gintakhuai hi.
Hiai i chihna ahihleh a bawlte, a zuakte’n a release khit sawtlou a a copy a bawlteng uh zuak khin pah tangpi ua, huai khit lam a lah copy bawlbeh chih bang om nawn khollou ahihna ah amau a muh ding teng uh, atam hiam atawm hiam a meetna ahihkeileh a sup ding teng uh hikhinta ahih man in youtube khong a koih pen amau ading in a bangmah pi kilamdang tuan nawnlou ding hi. I lak ah music album/movies chih khong ki copy sak in, piracy nasalua in a bawlte a ding a meetna om hetlou i chihchih sek pen a dikna tan omthou mahleh, a original mah leinuam mi tampi om veve napi marketing feltak i neihlouh man ua huaite’n leitheilou ahi zaw kha ding uhi. Gentehna in Delhi a sepna nei a original leinuam ding family bangzah a om dia, sumdawng ahiam, siamsian ahiam a leithei ding bangzah a om dia? Copy 1000 bang beizou mahmah ding in ka tuat mawk hi. Gentehna a kho khat, Delhi i gen lel ahi a, khodang leh gamdang toh hileh a hoih nanana chu copy hunkhop, a bawlte lawkna tham chu kizuak thei dingin a gintakhuai kasa hi.
A original leinuamte a ding a le leina ding lampi omlou, a mu a aleikha sunsunte bang lah quality hoihlou lua khatvei khong i play leh phe loplop pah. DVD player khenkhat in support lou, leimahle uh en thei tuanlou chih khong. Abawl a sum-le-pai, tha-le-zung, hun tampi seng thouthou i hihna ah pan lakbeh zek a a consumerte lungkimna tan ding in bawl in marketing lampi hoihtak in sial le mi bangzah hiam nekzonna tham a ching thei thou mai kei ding maw. Huchi hileh abawlte’n le quality a hon ngai poimoh deuh ding ua, competition level le a hong sang deuh dia, a leite le akipak ding ua, mun tamzaw ah a zuakna a hong omta dia masawnna khat chu ahi peuhmah ding in a ginhuai.
Saturday, 10 November 2012
No comments:
Post a Comment