I Ute Uh

India gamthuk lam zaw thei khang, NE sung bang ah tuh i ute uh (Manipur a om i hih chiang un i ute uh chi ngeingai mai ni) trade/line khenkhat ah kidaih mahmah uhi. Tulai in midangte le hong tamdeuhta ahihleh i chi a hiven,  tuma kum bangzah hiam paita khong ah NE sung, adiak in mun kilkawm deuh teng, Assam  a khopite chihlouh koi peuh a puankhui siam, gari mechanic, driver, sana repair, electronic vante repairna, science leh maths teacher chih khong amau ahi uh chile kikhial lawmlawm lou ding hi. Tuni dong in le Maruti, Hyundai company authorised workshop a mechanic a suanpente uh min “Singh” hi nuam mahmah hi.

A population uh a tam deuh ziak a kithehdalh zou uh ahi diam chile lah Bodo, Assamese chihte khong le tamthou bang zel ua, Bengali (a ngeina leh lukhu kangte) bel puankhui, bazaar mehzuak, hotel bawl, pan dukan bawl, motor workshop, mechanic, electronic repair etc kidaih mahmah nawn ahihman in i gen tel dah ding. (Office a sepna neite gen ihikei hi) Ei ute amelpuak khong NE suakdeuh leh  vaisuaklou ahihna uah NE sung, a diak a singtangmi lak a pomna om deuh le ahi ding; a paina lamlam uah localte zi houh nei nuam ta laitei uh. Khat le singtang khua khat a singat a va om, zi nei, local mi bang a om napi a tate singtang khua adia nungak tangval ahih nung un taimangsan zomah lai hi.

Manipur mahmah a le a mihing tamdeuh ahihna uah a laisiam lua, sum piakdi nei  ahihkei uleh sorkal nasep muh ding omlou a trade tuamtuam a a pai ua, na nakpi a asep uh a ngaihziak le zaw hi deuh kha in teh. Huaichia’ h a bul ana pan lakloh ahihna uah a pate uh trade zuih atate un thei ua, semtou thei mai uh, ahihkei leh pute (nu lamte) nasep chu tuten le neu apan ana muh uleh thei in semtou thei mai uh chihdan khong le hikha in teh. Electronics lam khong – nidang in radio, tape recorder, sana leh tunai a tv repair chihte khong ei a bawlsakte’n abangmah thei mahmah lou i hih chianga, amau abawlte kiang i va tut leh a kise manglou khong le ni bangzah hiam hon kolsak ua sum tampipi honna neksak sek bang uh leng hi kha ding hi. Lehlam ah chu kawlgam lamte chihdan tak hileh “pilna”  nei ahi mai ua, a “pilna” uh ne ahi mai ve ua. Chi nawnzen le. J 

Bangteng hileh, i gennop pen bel,  eipawl bang in le trade i siam deuh leh zuih deuh, min i nam toh le hon mekmat theih ding khop uh neihdan omlou a diam? Laisim a govt/private sector job kia a sem dia kingai nilouh mawk di i diam? Unau Mizoramte khong music leh kimawlna lam, a diak in football bang ah a hong khangtou sim uh abang a, huailam ah a hong kilang simta uhi.  Music lam ah bel nakbawl in a van khong nei hoihthou mahle uh lasiamte’n sappau, vaipau ngeingaihlou deuh uh a diam India gam sung  zeel zou ding omtuak tadihlou bang mawk uhi.

A ngaihtuah peihte’n ngaihtuah ding om zek leh kilawm ei..