1977 kum ahi in ka thei. Lamka ah laizil ding, ka unau ua inluah in ka om uhi. Inneipa a sepna mundang a akisuan a, a kisuanna lam a inkuan a pai a sawm ziak un a inn uh awnga kou luahtheih dinga hong omkha ahi hi. A khonungin a inn uh a zuak ua, midang khatin a leikhia a tuni tannin a teng lai uhi. A inn leh a mi zaw gen dah ni.
Singtang apan khopi a laizil ding a om a ki hi a. Khopi paizia leh chezia ki thei lou hi. Taksa liansimta mahleh singtang ah bel khekol tom teng a sleeper (spelling a dik diam ah) khong ki kai maimai ahi lai hi. Ka u toh kum nih in ka ki hal ua, taksa lam bel kikim sim le ka hi mai ua, paina peuha kizui leh lawm dang pawl tuan khollou a ki thuahden ka hi uhi. Puanthak, vanthak ka neih chiang un a kibang ahihkei tawp ah leng hon leisak hun uh a ki bang tangpi hi.
Lamka a om hi buang, school uniform chihlouh khekoltawn nei manglou a om pen hi khin nawnlou hi. Tung sawnlam a ute a lui khat nih ki nei sam mahleh eima a ding liauliau a ki lei ki nei kha nailou hi. Huchibang dinmun ah terricotton ngat ka u a ding a vom lam deuh, keia ding coffee rong pian deuh lei-in huailai a puankhui siampen achih uh SM Singh Tailorte khut ah a khui dingdan deihdan tak genin ka koihta uhi. SM Singh khutsuak ngat khekol thak i hon teng bang zaw nuam kisa mahmah thou sam hi.
Khekol pen pakta leh hoih kisa ahihmanin kiteng muna, sawp hong ngaita hi. Sawpin in konga i phou leh ana mangta mai! Khatvei sawp patna hipan hia aw… Thak lawlai hia chisim in a om hi. Kua in ana gu ahi amwngmawng diam ah. Chihngaihna ki theita lou. Khekoltawn hawmthoh mahmah koia zona muhding ata diam ah. Hichibang thil khong koia va report a koia va zon, koia bangloh ding hiam chih ki theilou in ki buai mahmah hi.
Inneite tangvalpa ganza khong hih ching khat om hiven. A nu-le-pa leh u-le-naute mundang a kisuan pen aman zui utlou a Lamka a om top mai ahih tuaka. Sun khonga koia anne a bangchi om ahi diam bel ki theilou, invengte khong gendanin zan chiangin innuai khonga hong giak sek ahih tuak hi. Amahle a khua uh, a inn uh amaua dana kum tampi ana pom, a khanletna taihsan ding dinmun pom theiloua nu-le-pa zui nuamloua thamden ahi sam ding. Zana mi/lawmte amau inlam chiata paia a ihmut chiang ua paina ding om nawnlou, amau inn dana ana ngaihpen a lah kou omta ka hihman ua anuai bek ah chia hong pai sek ahi kha ding hi. Huchi ahihchiangin amah lou kua ahi dia huai khekol ana tuah ding chih ngaihdan omta hi. Khekoltawn neih masakpen, a hoihpen a i neih i phoulai ana kituah mai zaw.. ki nei nawnlou himawka. Pomtheih in ompha lou hi. Inneite tangvalpa tuh muhsawi leh koihdan khat ki neipah sim hi.
Himahleh amah ahi chih a proof na di lah omlou ahihmanin va ngohna dan om tuan lou hi. Huchia ka om leiluai laitak un ka u in:
“A latu in ei sanga poimoh zaw hi ding ahi. Ngaihsak nawn dah ni” hon chi mawk hi.
Gintak lah huai sim mahmah, poimoh zaw kisa kei leh ana la hetlou ding zaw himah. Pompha theikei mah le chih ngaihna a om keia, pom mai ngai hi. Lungsim khat ah bel hiaipa mah hi ding chihna a bei tuan kei.
[nov 8, 2009 a office a gelh zual zogamonline a ki post, a om nawnkei a, hiai a ki koih thak ahi]
Sim nop mahmah ei
ReplyDeletethanks
Delete