Vaite Toh Nasep

I gam a sepna muvek theilou i hihman in mundang a vaite khong toh semkhawm pawl ki om hi. Nekzonna, inkuan  vakna ding a va sem i hihna ah sep taktak  mah ngai a,  nasemte’n nikhat a khovaklai a hun tampen a zatna mun uh a nasepna uh ahi. Nikhat a dakkal giat bang vaite toh nasem a omkhawm uh chihna ahi. Vaite chihchiang in India gam ah  -  South, North, West leh East lam ah atuam chiat uhi. Atuam chiat ahihna u’ah a vekpi un (generalize) vaite ahuchi uh, akhachi uh chihtheihlouh ding hi. India Mal-suah ei omna deuh a office nasepna ah Bengali tam deuh ding in a gintakhuai a abanah Assamese, Bihari, Oriya chih khong leh Marwari, Sardarji, South Indian etc khong le a omzek thou ding. A vekpi ua kibang chihtheih khollouh ding i chihhang in sahkhua leh culture kibang ahihna u’ah thil etdan leh nasepdan ah eipawl toh teh in amaute kibangzaw uhi.

Vaite ahoihkei uh ahiam, muhdahna ding a ngaihdan bawlna ding ahiam hilou in i kibatlouhna khenkhat gen ding in, amau theihchiang sem-a, amau chindan hoihzaw i muhlelah zil ding, ei a hoihzaw i sakte kepbit ding chihthu hizaw hi. Tampi bel i gen thei kei dinga, bangzah hiam gen ni le:

Lungsim Zat.Office kia hilou in eipawl toh teh in koipeuh leh bangkim ah lungsim nakzat zaw uh bang hi. Nasepna ah a nuamdeuh ahiam mimal phattuamna di omna deuh khong thei baih in akul leh a tuh ngam pah uhi. Ei lungsim thuah bang hoihsalou a, “Hi tuh Hi, Hilou tuh Hilou”  chidan a i pai chiang in amau ngaih in ‘a hai, a simple’ kisuak thei hi. Kam-a  a gen u leh a tak kikal om in a gen u toh ahihna uh a kibangkei nuam mahmah. Ei kammal a “doha” i chih a hahzat uhi.  Lungsim/doha zang a thu bawl in amau hamphatna ding ngaihtuah in mi tok in a philphil thei uh. Nasepna ah a septung uapan saupi ngaihtuah pahin a maban ding uh, promotion muhna ding khong in a kisakhol pah uhi. 

Kam Zat. Population tam deuh nana na neu apan kam nakzat deuh mah ahi ding ua, communication lam ah kiphalou deuh abang hi. Culture upa chihmahtak pau (dialogue) le ahau ua nemtak a thil thukpi pi gen a mi kapna ding bang a nei ua, aw sang, aw niam, kamsiam leh dangnal khong ah leng kikhaih deuh in a om hi. Na awlawl a sem in a hunchiam a zohlouh ahiam, a buai ahiam om leh a gensiam in a kam u’ah kitankhe zou zaw tangpi uhi.  Nna ginatak a semlou chih theih ngoihngoih bang le a thu a diklua, semlua dan a kigen nilouh leh suanlam hoihtak tak gen ding thei zaw tangpi uhi. Zuau gen poisalou a kam-a kitansiam diak pawl om uhi. Eipawl in bel na a hunhun a feltak a zoh thipthep a, kam a bangmah gentam ngailou a, i nasep lahkhiat mai a huai in a gen mai ding ki ut in i sepkhop chiang in a lemlou omnuam hi. Kam zat bel kizil deuh ngai a bang hi.

Hun Zat. Hun pen chillou, kinohlou in awlawl in nna sem thei tangpi uhi. Hunchiam a zoh ding nate a zohkei u leh den a i gen bang in a kam uh a zangsiam mai uhi. A kul peetmah, kam a kitattheihlouh ahihleh office hun beinung ahiam khawlni hiam a sepdan ngaihtuah in a seplam tak  uh, nakpi a sem ahihdan uh pute leh miteng theih ding in tangkou siam ua, a lampi a omliai leh office hun pelh a asep chiang un a sepman uh a sum a muh a sawm uhi. Akhenchiang in nasep hunsung a zoh dingte bang koihching a khawlni a sep ding dan ngaihtuah pawl om zozen thei uhi. Nasep pen zoh baih leh khawl baih chih hi khollou a, zoubaih le hang adang hong om/ hong ki piakbeh thei ahihlam tak thei in nasepkawm a houlim leh hun sukbei khong siam deuh se uhi. Epawl in na i va sep hehu chiang in “Na pa nasem kisa na hi hiam?” peuh a chi thei uhi.

Telephone Zat. Telephone zat khong le siam uh chih di hia, telephone phung a tut zihziah a sawtpipi  kihou bang ching in nasepna hun tampipi a beisak thei uhi. Mobile omma bang in mun gamla STD a phone na ding aneih uleh, STD kawlphalou inle akulna ah pute ngen siam mai in office phone mah zatdan a siam uhi. Mobile omnung in lah khenkhat in sepna khong a mobile bill reimbursement mu, amau table a telephone neipha chiang bang inle a mobile phone uh zang ngamlou in office telephone mah zat teitei sawm in a awnlouh chiang in le a awng  hun ngak mai pawl a om uhi. Khenkhat bang in a nuailamte uh a phone nopchiang un miscall gaih ua, nuailamte'n a phone kik ding dan in hih tel uhi. Telephone kia hilou office van himhim zattheih liai zatsawm pawl le a om uh.

Lungduaina. Atangpi in vaite lungduai deuh uhi. Nasepna ah hunchiam a zohding tuamtuam tampi a om chiang in le kinoh hehu lou in lungduai tak in omthei zaw uhi. Inlamna khong, lou nasepna khong a thagum a nasepna (labourte) khong bang ah le vaite sepdan enle awlawl a sem in sawt semzou zaw uhi. Suahdur a lei suah ding bang mi khat in suak mailou in a suahdur khau a khih in khat in suak, khat in khau a ana kai hiauhiau chih khong in hih uhi. Office bang ah leng sep ding tuamtuam, tunglam, nuailam ahihkeileh customer lam apan pressure om vengvung lele lungduai tak in hih hiathiat thei zaw in a kulleh a maivun uh le sahzaw in kisuanlahna chihbang le nei khollou uhi. I Khankhiakna leh neu a kipan ki etkoldan, nek-leh-tak khong ziak le ahihna tan a om diam ah.. Lehlam ah bel lungsim thuah bang nei zaw ahihna uah haksa sa lua hile uhle kisel siamzaw le hikha ding uhi.

Ki Poimohsak. A lian hi in a neu hitaleh amau nasep tek ah ki poimohsak dan siam  ua, amau tellou a bangmah paitheilou ding a bawl zozen pawl bang omnuam sek hi. Nasepna – organization/office interest a management deihna bangte sepkhiak ziahziah pen sang in amau mah poimoh, amau lou a bangmah pianglou dan a thil paisaktheih ut in a hih leng siam uhi. Huchi a ahihna ua nna pai ziahziah theilou in om mahleh athu a gen khong siam zel ahihman un a tung ua te’n le ava tailuat uh hiam action lak hiam hithei mawk zellou hi. Office rule khong ah "slow practice" kha dankalh, action laktheih himahleh atak in action lak chih a om khol kei. Na hoihtak a pai ding pen i va khaktan hial kei nakleh, i sepna na a i dinmun hih poimohsiam a nasepdan le siam ding mah zaw ahi ve. Kizil ding omzek ding hi. 

Maipha  Zon. “Sir”, “Sir” chihlah chibai hawm  “a kiam di om lah hilou a” i chihbang in baihlamtak in chi  thei lel ua, pute maipha zom siam uhi. Akiang uah pute va paikha leh ana din zozen theih chiang un pute mihinna, a ego uh kipaksak thei hi. Maipha zongzou a, midangte, polam mite mitmuh a pute zahlua dana a om theih chiang un pute’n le deihsakzaw thei uhi. Nasephun beinung in nna neikei mahle uh thuduh leh maipha zong kisa in pute paima bang pai sawmlou uhi. Asia-apha pute kiang tun a avil zoh gige chiang un eipawl pute maipha zong khollou a sep a septhohte sang in pute toh kinai zaw himhim uhi. Pute le mihing ahihna uah office polam, personal service piak bang le a kul leh kithalawp tak in hih thei uhi. Nasepna a a dan-leh-dun lah theizaw ahihna u’ah  pute’n khoihhak a sak deuhte uh bang suankhiak theihna ding hiam in promotion hiam bang ahiam pe lehlam in amau ana lawkpih thei  uh hileh kilawm a batton om hi.

Midangte Ngoh. Nasep ding tamdeuhna bang ah kihepkhiak siam in a pauzouloute sep ding a khinkhiak dan bang siam nawn uhi. Huai chile lah a nek ding, a muh ding, a minphatna ding om le lah a huaiham pen, a duhgawl pen, a sempen dan in om leuleu zel uhi. Nasep i chih khong a diklou a hih mawng a om ban ah hihkhelh, mangngilh khak, a paikhial a khonung a buaina nasatak omthei pawl a om a, huaite ah audit ahiam, vigilance ahiam a taang khalou ding a kilep leh kihepkhiak dan a siam un a mohkhu thei ding in midang khut suknit sak thei pah uhi. Nungak leh tangval kipawl a nuamsa tuak uh a numei pen a hong gai chianga a tangval in "kei a ahikei" chia kilepsan maimaha a naupai a a gimna teng ban ah zum leh dai teng a nungak in a thuak ngai dinmun bang deuh in amau sepkhelh, amau moh bangle midang tung a bung in sappau a Passing the buck a chih uh bawl siam uhi.

Sum Deih.”Sum deihtakna gilou chiteng bul ahi” chia ki thuhilhte toh teh in sum pathian a neite mah in sum deih deuh uh bang hi. Sum deihlou bel omkei; sum deihna a nasem ihi. Himahleh a uang deuh pawl a om uh - tanute pasal neih chiang a vanken ding leina ding khong  kholpah ngai ahia bang ahia lampi omteng dap deuh uh abang.  Official a muhtheih  - advance tuamtuam bang interest omlou chia hawi neilou a la in bank ahiam share ahiam khong ah koihpung zaw uhi. Muh ding ahihnak leh tawmchik buaipih thamlouh chihbang omsaklou in buaipih peih uhi. Official a muhtheihte bel ahi ding mah ahi a, sum kia ngaihtuah zozen a nasem, ahihkeileh amau a ding sum lepkhiak theihna ding zonna lel a sepna toh kisai a lei ding, puah ding kia zongzongte bel a buaihuai deuh hi. Hiai tungtang ah eilam khong ah le piakkhiak ding peuhmah a % chih khong kithang lua dan in a kigen a, kibat riauna om ding in a ginhuai.

Tua i gente mi tuamtuam in vaite tuamtuam i muhkhak ban ah sepna leh sepnamun a tuam dungzui a kibanglou a om tham ding a; chihsa bang in vaite tengteng le tua i gendan ahi vek kei ding uh. Tuni in eipawl bangle kong khenkhata a khokzaw i hihna le omta kha in teh. Eipawl in awlmohna leh tawmngaihna i neihte nasepna mun khong ah le chinzel a vaite tung khong ale zat a amau toh kibanglou i hih latsak touh zel hoih ding hi.  Lehlam ah bel nasep ding (function, role, job) kihawm kual vek ahihna ah midang tan, ginatak leh a hunhun a aseplouh man a a zohlouhte va sepsak (va huh) a hoihpen kei ding. Pute bang in le hon muan khak vanglak u leh nna tam leh a haksa sa ahon pe nuam ua, a semtam nana na in sepkhelh bang a omthei a, huaichiang a hon hum, hon panpih kei mawk u leh a buaihuai thei. "Ka tawmngaih ngaih nalam in sagih ve ka zawlgai" chih dandeuh in bangtan va tawmngaih ding ahia chih bang le theih hakpi a suah ton a om hi.

Bangteng hileh sepna level khat peuh ah tunglam, nuailam, kikimpihte toh kizopdan leh sepkhop siam le i maban vang deuh nak hi. Himahleh khang khatna vaite toh semkhawmte khong in a omdan uh, a lungpuak uh thei gegu a le seppih (deal) siamtuanlouh, kiven siamlouh a omthei nak hi. Ahoih khat bel hichidante kha tulai a khangthakte, a diak a vaigam a khanglian, vaite toh khang nihna nasemkhawmte a ding in a buaihuai law nawn kei deuh ding.