Facebook Ah

Internet chu keima tawk in ka na khoih nasa tei a, zite bang a felzou khop ua hikei leh kinak theih di khop in ka na khoih tei hi. Himahleh Social Networking lam Facebook, Orkut, Twitter chihdante pawl khoih ka na sawm kha hetkei mawk hi. Khoihlouh ziak mah le a diam ah a hip le a hon hip kei hi. Hun  hong paizela a kuapeuh in huaite hon gen souhsouh chiang un khoihdan theilou lua va hih ding utlou in FB, Orkut leh Twitter ah account k’on bawl teita a, Orkut leh Twitter te ka etzual dan in lungluthuai salou ka diam ka khoih ngeikei a, tuni dong in le ka ngaihsak kei hi.

FB pen kizilna ding chi a ka yahoo email account ka zat mang nawnlouh a ka hon leh, nidang a yahoo messenger a chat lai a ka lawm, Philipinete khat in hon na mukha pah a, meltheihsa ana om ahihman in azia om pah sim abang hi. Hilele FB bangchi zat uh ahia chihlam khong va dong nuam tuanlou in FB a a gamtatna khong uh ka na en sek hi. Manila lamte’n FB ah loubawl khong ana tha-it in tui mahmah ua,  Farmville khong a  a haichite uh hon phoukhe phengphang sek uhi. Lawm dang khenkhat kiang a hon introduce in Philipines lam ah ka va tlangnel man sima, huchi in ke’n le Farmville leh game tuamtuam Cafeworld, Treasure Island, Townsville, Fishville etc etc tampi ka kimawl ziahziahta hi.

Hun-awl neih chiang a ki hih, nasepna bang kisuan in family toh omlou a eikia bang a i hong om zawkmah leh FB khoihkhoih mai in hong omta a game khenkhat ah level sanglam i hong tun chiang in a fuhsem  i deih leh $ a lei ngai chih ngen a hong himawk abang a, kimawlna, lawmte a thaloh, lawmte free gift chih khong a hitheilou tan a hong om a, “Kare! Mi sumdawnna ana hi leltak ding eive”  chih ngaihdan nei ka ngaihsak nuam nawn kei hi. Huchi in FB bang le ki ngamthoh thouta ahihman in ka email tak ah account ka hon bawlta hi. Hilele ZogamOnline chihlouh a zatna di lua le a om mang tuankei a, Kawlva telawi toh ZogamOnline lam mah ah ka zang deuh hi. Huai nung lam deuh in group tuamtuam a poimoh hi a ka theihte ka ban bawl hi.

FB ah khangnou kingaihna lam leh hinkhua a banghiam ziak a haksatna nei a status ua hon gelh uh muh ding a om seka, huaite ana houpih in a khen in hon dawng ua a khen in hon dawng kei ua, hon dawngte councelling va chih zozen di lah hikei venchin, kei hihtheih dandan in ka na encourage seka a phattuampih pawl bang a om uh a de aw ka chi hi. A tak a kithei hikei lele FB a kithuah a thil kikup a ki panpih theihluat ahihna a om hi in ka thei hi. Himahleh huchia hoihtak a ka houlimpih khenkhat in hinkho tak a kitheih ding utlou ahi ding ua a haksatna khong uh a hong ven chiang in hon houpih nuam mang nawnkei tangpi uh abang hi. Amau toh long term relationship neih lunggulh a ana buaipih le a ki hi zenzen kei a, a thudan a i gen mai ahi zaw.

Atunglai in FB a ka lawmte India a om tanau, lawm leh a tak a kithei leh kitheilou ban ah kawlgam mi, gamthumna ngak a Malaysia a om pawl khat leh gamthumna tungkhinsa khong ahi tangpi uhi. Atangpi in sapte, vaite chih khong FB lawm ding in ka pom kholkei hi. Ka lawmte kawlgam suak Zomi tam ahihman in Keuhthangte pawl bang in hon chiamnuih sek uhi. Kawlgam lamte lawm ka hauhna ziak khat ahihleh Tedim pau ka kizil nopman leh amau lamte’ laka ei India a i pauzat,  hihtheih tawka exposure neihsak ding lunggulhna ahipen hi. Hiai ka chihna ziak bel a taklam deuhleh a hong zinkhate in India lam a i pau zatte thei mahle uh a khangthak deuh leh kawlte lak a kibual deuhte’n thei hetlou mawk ua ka muhman le ahi hi. Huai kamuhna mimal, group interaction ban ah music (youtube) khong hi tangpi hi.

Huchia kinel a, i pauzatte kitheituah tuak in omle Zomi min a i website neihsunte leh FB groupte uah hoihtak a ki thuah leh kinaihsemna hong piang ding a ka lamet man ahi. Internet omnung bel kizopna lemtang zaw ahihman in nidang toh the in kizopna leh interaction a tamzaw himhim a, himahleh tuni tan in ka lamet bang a thil paithei khollou ahihna ah kei mimal awlmoh ding le hikei venteh aw chihna bangle ka nei simta a, lawm bang le ka add beh nuam nawn kholkei hi. Huai kia hilou in FB friend list pumpi bang le kiamsak a FB a hunzat le cut down zawk tak ding chih bang hoihzaw ding a gelna ka neita hi. 

FB toh kisai gelh ding tampi a om ding. Khatvei thu a gelh vek theih le ahikei a, man dan, phur dan a zil a gelh nawn theih leh gelhbeh zel ding in i koih ding.