Loutul Veh

March 10, 2020 ahi a, ka ofis kompiutal ah nitaklam dak 4:11 ahihdan ki lang hi. Buai vengvung kala, tuni vaite HOLI ni ahihman ofis le thawl mahmah in customer le omlou a, sun a nekding takngial le ki mulou ahihman in gil bang kial sim mai hi. Huchi dinmun ah nasep ding tampi om mahleh sep kithawlawp huailou ahihman in ka blog a lut a ka khodak leh post thak a omlouhna sawtta mahmah hi. Blog ana tulsim a bang mai a, loutul veh houh hileng kilawm chih lamlam a hong lut hi.

 Sepna kisuan, mohpuakna kikhek chih khong leh hun kikhek dungzui leng ahi ding a, niteng in internet kizang gige mah leh ka blog lam a  lutlouhna sawtsimta hi.Internet zatdan bang hong kikhek in mobile khong a ki khoih tauhtuah maita ahihman le ahi ding e. Lungsim ah bang ahiam khat bek post hoihlou di ahia eita chih hong ging a. Hoih e, hilele bang thu gelh a post mawk ding chih dotna khong in hon zuisuk zel a. Abang abang hitaleh, diary gelhdan ahih lele hitave chin NEW POST ka mek top mai a, tua na sim teng kon type sukta hi.

Pai chianga vaite bangbang hiam kham a rong chiteng kinuh a lamlian a husa leh bike, motor khonga kidelh vengvungte ana omnawnkei uleh le, a khamdiak leh poisak neilou bangzah hiam khong kholai a ana omlai kha ding uh ahihman tuni chu paibaih deuh ding ka chih ahi a. Bangtang leh bang thu kon gelhta phet diam ah.. Gelh suksuk ding in hun sak chia post geih mai ding. Etthak leh edit chihle omselou ding ka chihdan chu ahi. Huchia deihkhopa ka post baihluat khak a pai ahun naikei le lah a dang khat gelhbeh nawn di hi ziang.

March kha khong ahihleh sorkal kum bang beikuan na hi mawk. Ofis lam target tuamtuam hon bikhiahsakte khong uh lah buchinsak vek ngaihna omlou, niteng phiala hon donng leh noh gige ahihna uah lungsim khat thoveng chiahlou khat in ki om sek hi. March kha louhal kha hi a, ni 10-15  lak vel bang louhal hun  hideuh in ka thei a. Neulai khong a louhal kha i theih toh tua i omdak nak   kikhalouh leh kidang mahmah sam e. Huailai khong in bel khua khal chihtak a khal in ni bang sa vevaw seka, gamlak a i paikhak chiang bang in nahpa keu i sikkhakte in honthuaklou leh huham honsalua hi awmtakin ging guapguap mai uhi.

Sing leh loute keu gegaw in a teh pulhgai, a pulhlou sunte le buklou leh hing dipdip lou in in kivang sengsuang in eng ahihkeileh san seksuk pian khong hi ua. Huchi kawmkal a suangkuah pak san singseng leh vaupau ngou bihbiahte khong i galmuh chiangin bel ki hinghuai mai hileh kilawm in nuam hi. Vasa hamte khong i zak behlap lai chiang bang in chu.. Dangtak sim, tui omna lui bang i va tunkhak zomah leh vot dikdik zozen, a tui lah siang kilkel zomah.

Hiai hun a lui tenga tui bang kang pian in lui a ngakua i sawk lele tampipi mattheih ton bang om hi. Khozang a makha hiam, guphok/phokgu suk a lui liandeuh khong a ngamat bang le i neulai khong a ahihlam tak uh kithei lai sam. Ei naupang hon bangzah hiam kipawl bang in le lui lianloloute a gu va kisu in nuamtak kisa zaw himah.

Climate change khong a chi ua, khuahun kikhek mahzaw hi ding aka. Louhal kha a khokhal lam le kitheilou a vuah bang hong zuzu mai mah. Vaigam ah zaw vuah a zuk lele nuamzaw khat le abang, khua lumlou deuh ahih man in. Vuah zulou in ni sa gige hileh tukum bang le lum simta ding hiven.Kum hong paizel le i dam leh ei khang in le bang hong chi kikhek lai mah diam ah.. kum tamlou i kisak leh ei theih chiang ah leng khovel nak kikhek mahmah mawk hi, Huaite sut a sut a gen tham ching tampi zom ding zaw hiven, damleh hunlem dang a ding in siit ni.

Inn tung le lah hiai blog khong ki enman di le hilou. Mobile mah mat a whatsapp ahia youtube ahia i hun hon lzatsak  nuam tam ahih chianga. Anhuan a ngaihlouh chianga le kiman zou mahmahlou, hun kidaih mahmahlou himai. Nidang khong a inn a omte'n a thunon sa mah bang a  "ka chimlua", "nak chimhuai e"  a chihchih khong uh vangpha hi na maizen uh e. I taksa bang in zou henla sun a ofis kai/nasem, zan a zankhovak in simdi, ngaihdi, etdi zong lele adim aha a om hita mai a. Nidang a zaw khovel polam toh iI kizopna omsun radio ahihkei leh cinema hall khong himai a.

Tua chu nitenga khovel mun tuamtuam a coronavirus mi bangzah in vei beh, sih beh chih khong leh inlam a nam makaite pawl nih bang pha siuhseuh geuh ua, a langtuak a gumtu ding a dim a oma, huaite "kam kungfu" a kibeihna khong sim ding nak tamlua akei maw. Huaite khong bang i va khodak zoukei a, i lunglutpih man kei zomah a hiven, va bual in va kiselkha le nuam pi di le hikha ding hi.

A hong sausimta abang a, kuahiam hiai mun a dakkha zenzen a om ua lele loutul veh bang a kisaklouhna ding un hiai teng zalhsuk ni. Gelhzoh a post mek mai ding ahihna ah PLS  bikhiah laigelhdan lam zuih leh zuihlou kuaman ana ngaituah kei ham le uchin maw.