Tuni Dinmun Neukha

District Administration in zanni a Janata Curfew toh kizui in Covid-19 apan kivenna ding panlakna in business/commercial establishment, essential deuhte huamlou in khak ding thu suah a poimohlua loute kuamah vakkhiaklouh ding chih ahihman in kholai ah motor tai leh mihing tawm in dai vikvik sim zozen hi. State government in lock down puang hiallou ahihman in leh Head Office lam a le khak ding chih omlou a, office hon ngai hi.

 

Office kihong a, a gamla deuh a om mi khat chihlouh ki kaikim ahi sim. Office lam a le instruction tampi mah om a; flexi timi, 50-50 rooster, sanitizer koih ding, social distancing, special leave, do’s and don’ts zuih ding etc tampi om hi. Alehlam a lah KPA target tuamtuamte buchinsak ding a hon nor touh det uh,  KPA dungzui  a le Audited Accounts April ni 4 hiam a zohfel ding chih ahihman in statuitory audit bang kipankhin in paitou kawm zel. Thu leh la tam in a tam a, bang pen hih a bang pen hihlouh, bang hih masak a bang hinunun ding hiam chih bang a theihuai kei.

Huchi vengvung kal ah i nuailamte –Branch Office te leh ei office a staff te khong nasep ding tam chia va hihluih deuh bang hong lem hetlou in om nawn hi.  Kuahiam khat hong kai kei in ka paina lampi bitlou, public transport omlou, onlele bitlou ahi hon chileh i va genbeh leh gen teitei ding om khollou hi. Kai ding a sam, hong kai in denchia natna bang hon veikha zenzen leh khonung chia a sual utten hon ngohthei mai ding uh ahihna lai le a om zel hi.

Sorkal kumtawp a feltak a zohtheihna ding a March kha loh bang le 24.03.2020 a piak ding a chihpen uh khovel dinmun in ziltalou sa ahi ngei ding ua tuni 23.03.2020 a piak ding hon chithak uhi. Lawmte kiang ah amasa pen in lohpiak lam hihfel unla, adangte chu awl a hihtheih dandan a et ding ka chi. Kuamah kholai pawtngam manglou ahihtuak a customer le a tam mel kei a, a ommanglou ahi pen mai. Huchi ahihleh bel loh khong a bank account ua piaksiang khit phota nitaklam khong a khakbaih deuh hoih leh kilawm hi.

Delhi, Mumbai, Kerala, Rajasthan, Mizoram chih khong tuh Lock Down zanni mah in a puangkhin uhi. Akhat a khat in Assam solkal in le lock down puang ding ahi a chi ua, tu in a khen in zingchiang a kipan lock down ding a chi uh chi in antang leh poimoh tuamtuam ngaihtuah dia pawtkhiak ding hong kingen ua, tu dinmun a ding in awle.. awle.. chihmai a baihlam leh hoihpen abang hi. Ni kimkhat le a bei naikei a, na va sepluat hiam va sepvak ding le ahithei mangkei. Office a om a I om nak a banghiam thukin khat a om leh huaite ngaihven pah thei ding a om kha a poimoh pen ahimai chihdan in ki koihphot mai hi.

 Diary gelh toh a kibang sim diam, office a pan a tuni dinmun neukha i gelhkhiak zual ahi.

 

Dibrugarh

[23.03.2020]