Lock Down 2

Zan in ei bial lam, Assam bang ah positive hong pung thut abang a, tuni in Manipur in a nihna ding neita chihleh Arunachalten a bul hon panin khat honneita uh chi zak in om hi. Sunnitum phial in utube ah la tuamtuam ka ngai a, covid lam ka ngaihven kei. Ki kailou miau ahih chiang in office nna lamle ka buaipih kei, phone call thum hiam ka donga huaite ahi mai ding official nasep. Inna office nasem chu ki hi buang. Sir Langchinkhup, DGP hia IGP, ka gelh leh ka chiang kei thak, amah zing chiang khong in a ki dong ngam diam ah. Whatsapp in ka kihou zek ua, i gam bharat thu  lamlam peuh ka gen uhi. College kaikhawm khit kimukha nawnlou ka hi ua, kum 30 val ahita. Eh! Ka zuau, Imphal a a office a tualgal nuai lai va vaklut kha zual, amah buailua ahih chianga kihou le kihou man manglou a ka kikhen pah uh ka mangngilh kha a hi. A tawplam in kou omna a a canteen lamlam khong ka genlut kha ua, van leinopte leina dia mi khat ana houpih a, ka min leh phone number ana pia, huai pan hon contact di ahi a chi a.

Ka inkuan li un kou tuina lam chiat ka buaipih ua, asun azan in kihou man in le ka ommang kei phial uhi. Ahihhang in ka omkhop uh kinoptuam in nuam bel kasa chiat ua, ka khamuang uhi. Inn khat a mi li khong om ding, insung a le social distance maintain ding a chih uh, tup le hi khollou a ana zui sim khat le ka bang zozen uhi. Kei chu a kallak in intung ah ka va diangtou a, ka pot plante khong ka va ensek a, ana hing dipdip lai tadih uhi. Anteh china dia pot plan khong ka buaipih leh deihbang in ka lohching ngei kei hi. Ka bawl masak kum in lengmasel, malta, phulun, pasikhawm, aithanglou chih khong ka suan a, a tung in hong hoih thei mahmah uhi. Himahleh, a lei hoihlou a diam, verandah a ka koih nisa mulou ahi di uam fuh theilou hi. A suakta leh lamethuai deuhte bang a the, a zik ah thil kang hong om a, tulai pau leh amau virus ahi mai di chu. Huai virus in subuai in amau ana ki surrender sek uh abang hi.

Tukum chu pot 5 intung ah a zu a sa leh original huih dongkha ding in ka koiha, tomta neute chu gahpha mahmahta, minsan nailou deuh chih di hi. Sipi a teh mehdia ka pawi le hoih mahmah thithet tadih a, lockdown sung a ki neman dia beiseih chu ahi. Adang malta – eilam malta, vai malta tuamtuam laka hoih kasak deuhte, psaikhawm leh aithangloute chu a neu lolai ua, tui buah zel di himai. Phulun a zung kinete leh eilam a phulun ngatte nikum a ka tuh phalbi lai a sigai ka sak leh khua hong lumpat leh bangzah hiam hong khangkhe thak phing ua, pahtakhuai khat a hong suak uhi. Kholum sung chu survive nalou di uhia ka chi mai a.Lengmasel nihvei ka theh leh khatle poulou hi. A chi diklou ahia bang ahia ka thei kei. Tomato gahpha mahmah pen in duat a ngiat deuh abang a, nikum lam a alei lak a piaunel tamsim ka koih leh, nisat chia huaite sa a zoulou a diam, nisat ni chianga ni nih bang tui piakkhak kei leh ana nuak in ana vuai dek pah mawk seka, tui I piak lebel kintakin hong nou thak in hong normal zel tadih uhi.

Pot plant hih chihbang le a lei khong, tui, nisa leh huih a muh ding zah uh om a diam ah, sui zek ngai leh kilawm. Ka lawmnun chu Ghy a a bawlna ding in huailam toh kisai utube ah a enen sek a, ken bel ka ngaihsak pih khol kei. Himahleh compost (spelling compose hizaw hia leh), vermilion chih dandeuh khong a gengen sek a. Tukum chu hiai a aki omlai di leh ken le huailamte utube a etzek tak di ka chih hiven. Aman inn a pak leh incheina ding chih lam a buaipih deuh a, bonsai khong le ama utdandan in bawl a sawm sek a, himahleh inn mun nih a ki om ahihna ah a zinsan chiang in a pi uh tuipia leh a duat di omlou chi a di uam ana buaizak sek uh. Ken bel huailam hilou a anteh, mehding chihlam khong ngen ahi deu, ka buaipih. Lungtunhuai taka ki success nailou chu hisim. Enle sawtpipi I zinsan hun bang om zel  a, hithei taktaklou le hisim mah hi. Mahni in a om hile chu hoihdeuh a hih uthuai pi di abang.

Tuni khong in inkong khong a mehzuak hong pai zeuhzeuh ua, allu, mai, phulun, umnek, tomato, sing chihte pawl chu lei di hong om zeuhzeuhta. Dal khong kia nei lel a chu ki om nai tadihlou in ki hampha lai suak hi. Lockdan kipat tung in hiai ah le police lam in mi a zepthou ua, a local pau I naallouh toh pawtse louh hoihzaw ka sa hi.Corona lam hong chetou zel a tuni ang a le India pumpi a +ve thak 500 phial om ahihleh lockdown bang le ki extend thei ding a ginhuai ahihman in tuni in Big Bazar ah antang leb bangbang ahiam ka order beh ua, zing chiang ahihkeileh thai chiang in hong pethei ding in kigen uhi. Hichi di kisa le zaw Pu Sama (UPC Pastor) in sahouna machine a bawl ka lei uah muslimte bawngsa lei in tampi ana kihoukha leh phatuam mahmah ding hiven chihthak in a om. Vaite kobi soda toh a pok, bai khong a I huan chia damdawi gim nam a kine ngamlou sek, zan a ka lei pen ka pokhuan uleh nam hetlou in high school kailai a Lamka khong a kobi pok khong I meh ziahziahte toh kibang in mehpok pakta khat ka hihna ah kitai sim hi

Pu Di inzingkal chia gam mipi address nawn di ahihleh bang lam hon manoh pih diam ah. TV News a ka na galzak dan un tuni a state CM te toh a VC na ua, CMte ngaihdan leh suggestion dong hileh a kilawm a, kou Health Minister pa Himanta Biswa Sharma in Pu Di in Diwali tan khong hisap in ana ki ginbawl un chi ahi chih whatsap khong a muhdi hong om zengzung zel a, bang hon gen ta phet diam ana ngak ni. Huai Sonia tepawl le bangmah laktak hihkhe theilou khat thil teng ah soisel leh gen ana nei deiduai sek kei uhenla hiai hileng thu khong ah ki nungthuap suk le uh chihsim in a om aka. A tapa pa bek sakhi hawk thoh lou in zuihtheih ding in panla leh makai thei hileh zaw hiai tua thunei kisa a banghiam bangte hichitan tung hetlou di uh hiven. Iplah le huaisimta abang ua, bangmah hihsuahlou di khat ana om maimai sukta le uh le kibang hilel mai lou hia chihsim ton a om. Panpih utle le panpih taklou uh chih di bang aka hia.

Gam thunei kisate lah covid  in zou mahmah bang a, chinate mah in thu hon neipen mai di uam ah. Ahihziak hiate le kihatsaklua a a om uleh a koilai hiam a hong lungvei a, amau leh amau kipalpai in a hong omkei di uh chihle gentheih hikei. Pathian in geldan leh hihfel dank hat hon nei mahmah in the. Huaima in eilam khong le pul zengzung a I buaizak di uh ana kiveng peuh lle.

Khai.. nitak dak 12 bang gingta mawk veh.. zingchiah ettak a akul dan a bawldik, belh leh paih din hunsakta hi.