LOCKDOWN 3

Lock down chi a ka gelhmatlouh sek ka ngaih apha kei a, tuni chu google panpihna la a ka etleh dictionary khat ah hon piluta, huai ah lockdown chi in ana gelhmat ua, a nung uh kon zuita ding. Ni bangzah le hita ahia, zing chiang a Pu Di in a ni 9 ni zan dak 9 a program ana khat guanggalh khin ahihleh tuni a ni 8 ni hi ding eive. Dictionary in lah suangkulh tangte.., midang toh kisaikhalou dia koihtuam  chihdan lam khong ana hoih gen sim leh hong lauhhuai thak phing abang dek hi.

Ahithei tannin zaw inn ah kikhum in om sam mah veh e. Ahihhang in nelou-talou a hinglou ding i hihchia i mehdi neng lei a kuan ahiam, banghiam i deihzual a omleh leinna di zong a va pawt khualkhual a ngaihton om hi. Naute’n kei ka pai ding a chih chiang bang un “pa” khat hive sam i hih chianga amau a kum uh le tawmdeuh lai, bang hiam hilele ei sanga pammaihzaw ding uh chi in “inn ah na om ua” chih toh diankhiak thuah  in ki-om sek hi. Huchia i va pawtkhiak hial chiang in huih bang siang in mi lah tamlou in a nopdekna khat om mahleh a pawtkhia ki hi mawk in lungsim ning khat hon kam om hileh kilawm hi. Vaite le a pawt om zeuhzeuh thou ua two wheeler a hong tai muhkhakte bang in a muk uh hoih tuam belbal geuh vanglak ua, en lah ki tuam khollou in ngaihtuahna a inn polam a pawt nin (sianglou) riau dia kikoihna khat om  in lungsim nuamkhinlou sek hi.

Huihlak a leng hilou chisi ua, misiamten le muktuam in hon vengbit zoulou chichi thou napi  mask bang dia bun ding i chihdek chia lah a veite a khuh chiang khong ua a chiltui neng uh kithehkhia dalna dia poimoh chih hizel. Enlah Pathian zal a vei tadihlou hang a i chihdek chia lah a veite le a symptom hong kilangkhe pahlou a, huaima ale midangte lawhsawn theih ahi chi zel ua,  koikuam hiam a theihlouh kala ana lalutkha bang hi zenzen le theihlouh kal maha a thehdalhtu a ana pan nilouh theih bang ana hizel. I khatvei tuahna ahihziak ahia hiai thil in mi buaisak mahmah hi, chiphet le. TV news teng, whatsapp message teng lah hiai thu kia himai, tulam bang a chu news khong leh utube khong ah le ki enpeih nawnlou lam hita. Kikham gawp ahipen di chu. Whatsapp khong ah hiai toh kisai chiamnuih lah tam, a khente bang awm pipi leh nuihzakhuai pipi hi zomah.” Lar tak zaw na ka maw nang theihngeilouh  Covid 19” chihsim in om hi

Kawlgam lam unaute in misi a om chiang a a kahtam ua “ki awi sam teh maw” khong a chih bang deuh ua “ kiawi sam teh mawn nang China gam apan hiai tantan hongpai a, zahngaihna neilou hial a leitung a mi teng zinling bang a na sawi ling a tuipi banga na hawt mai, hat le hat tak hi ve chia”  chih ding in hoihsim mai hi.

Crocs khedap (chappal) khat inpua a pawtchia ka butsek om hiven, inkong a suah inn insung lutdek chia kongkhak bula slipper ka koih ka bun ngal sek hi. I khekhol leh puannakte bang le ninngaih a inkong a va suah hial dia ah, khekmun leh sawpmun ngailaw ding bang zel. A sawpdite a ding bang le khual hong ngaisim. Inkong a i puansilh va suah ek mawk ding bang a kua in hon mu kei lele nuamkhinlou ban ah i kikhekna ding silhpuan inkong bula kikoih tuanlou ahih chiang in slipper bun a khutsil dia bathroom lam a tailut  a, polam a i but khedap khekkhin mahle ngaihphatna ding in khe bangle sillouh hong phamoh zel hi. Khutsil bang le a sildan dik omsak ua, huai va zui kholkei lele sahbon nuh a i sil himhim leh ngaihphatna khat bel omsam hi. Kisil di va chih gige dia lah hilou, kisillouh dial ah lungsim hon kamsim zel. Ei kia a i khosakna inn a lockdown zanga inkuan i hong kikhum chiang in lupna bang in hon daihlou tuang tunga lum pawl bang ki om in insung bang le kepsiang mahmah ngai ahihna ah, polam i pawtna kisillou leh puan kheklou a om bang le nuamkhinlou zel hi.

Hand sanitizer ahihleh polam a pawtkhe hiallou, gate tan khong va pai kha a gate khong i khut a i hon chiang  ahihkei leh inkong khonga thela gari a meh hong zuak uh i leikhit chiang khong in kizang tangpi hi. Inneite inn khong a va dianlut zual ding lah amau honna mullit sim bang hikhale uh chihsim in a om a kingam chiahlou hi. Ei inn ah le amau hin akua hitaleh,  a hong pai di uh le kideih tuan samlou. Lockdan taka om ki himawk ahih chianga.

Leham tak ah zaw ni bang hongsuak in i theihlouh kal a ana tum man zel, kichim khollou vanglak. Bang hih a nitum i hia chih i ngaihtuah chiang a lah i sepmel le kithei taktak khollou zel. Office lamten suti hilou, i bouruak tuah in zillou a lauhuai ahihna a inn a nna hon kisemsak ahi chih hon phawksakna ding un a vangkim in phone khong hong pai a, thil hihdi a hon sawlna  uh man leh mail check det ngai hi. Gintak sang in inn a nasem ding in mail bangle hon thohpeih thei vanglak ua, amau inn a omlou a kai tuan a di uam office kaini a mail i muhzah ding phial mah  om den sek hi. Amau le a tunglam uaten a nor ziak ua ei tung a hon khesuk nawn chu ahi peuhmah di ua, inn a om chia va ihmut hiathiat khong hithei khollou hi. I dinmun uh zaw kibang simvek hi ding hiveh aw maw pute/pite aw chihsim in om hi. Nitum  a lapton on den, thangvil bang a mail thak a om hiam chia va vil det ngai ahihman in huchi khong a ni ana tumtum hi ding hiven, ani bang le kitheitum  nawn khollou sepnawnni i sak bang kiginni ana hi vengvang maimah.

Hiai kikhum bichilh laitak a ka tate ni, ka sanggamnu nikum October lam a stroke a buaisia khophawklou a inn a kikol pen a dinmun hong hoihlou sima  damdawi in a ana ki polut zomah uh. Amau Guwahati Airport lam a om, a damdawi in lah Christian Basti G,S, Road pek, kou venglam toh kinaihdeuh ahihleh tutung inkuante kei kianga hong paitouh ua inn chabi kuamah kianga nuse khalou uhi. Lockdown lai a Airport leh damdawiin kawmtuah ding hitheilou ahihman in ka inluahna flat ua nasemte inn chabi ka khense sak ringot ua kou inn ah ka ki base sak uhi. A kuamah omlou i hih chia i pantheihna sun huchi khong hi maimah hi. Ani Hoihkim in hospital a lutni ua ana buaipihkei lele bnag a chi phet di uam ah. Amah nurse hiven, nau nawiteplai  nusia a kintaka a nurse thuam a kithuam in, a U Muan tapa Minthang a ompih koi hiam a security a sem le a security uniform silh in anih ua emergency duty hi awmtaka scootie a kipokhia a admission khong anahihfel pih uh ahi. Kua hiam khat in nou bang emergency duty na hi ua chi in ana check le uh zaw a duty na munlou di pi ua muhkhak a om di uh hiven. A huntakin Pathian in lampi zaw ana hong zel na hi.

Patate zaw thawmhau ngel un teh. A genkholkei na ua pauselou in banghiam deihlouh pen tungleh hiai lockdown nuaia amau gel kia a bang chi ding chih khong in ngaihtuahna uh subuai mahmah in teh. Hiai a District administration convince zou in zinna ding permit hon petawk le uh le, lampi safe di hia, va tung hilele district tuam ahih chiang a, Kamrup District a police duty lam in Guwahati i lutlut chianga ni 14 hon na quarantine mawk le uh i va delh omzia omhetlou ding bang zel. Lehlam ah kuamah in station pawtsan louh ding chih toh inn a office hon kaisak uh hi zomah. Patate hih theih dandan a phone tungtawn a khamuan a ahoih lam kipiak ngai mai phot ahi. Lukhu kangte Delhi khawmpi sim  va paite laka Assam hong tungkik a muhzoh teng uh a test na ua hong +ve souhsouh lai zomah uh, dammdawi in safelua himahleh a omte a dia le ngaihpha hetou zel. Damdawi inte le kiveng leh pivang lua kisa a nidang dan a ICU room sunga attendant luttheih hun a omsak sek uh hihtawp in kuamah lutsak nawnlou zel uhi. A damlou in le khua bang a phawk leh a lungzing mahmah in teh, a ta anau, meltheih kuamah mukhalou ding ahih chiang in. Anu mutheikei mahleh ICU a lum amah kia Hospital a a taisan di lah hi satheilou, Muman in hospital a Covid19 ava tuahkhak di lah lau kawm pipi in a sun azan Hospitalsung a omtheihna na a om top mai hi. Cabin a om hilou ua, ICU ahih chianga ama omna di omlou suak hi. Lung buai mahmah in teh.

Mun tuamtuam a damlou enkol doctor te bang hipi kai souhsouh uh ahihdan TV news khong ah hon puangpuang zomah ua, Madurai banga medical staffte mipi in delh in suang khong in ana kidenhuan maimah mawk uh, kuan bang ana chi fuih le a tel diam ah. en chiang in hipi vei bang in omle uh kuan amau enkol di adiam ah chih khong ngaihtuah tuak hetlou uh. Suakta chu ahi peuhmah ua, whatsapp leh tv khong ah a thituah uh doctor nu gensak mahle uh ngaih le ka ngai khol kei. Bildoh deuhle, hiai hileng toh kisai thutuam tuam nitenga zak ding a dim a om den ding, a vdo a et di leh misiamte thugen ngaihdi le tamin tam ding hi. Congress lamten le phatuamlou di pi khat opposition hihna chi uh a diam a pi  uh bangbang hiam a gensak veu sek ua. Zingchiang nitak dak 9 a pupa program bang a hong chi diam ah, a siampute un number 9 ngen toh kisaikha dia a khuatkhiak sak uh zaw hihtuak peuhmah, amau numerogy gingtalua hi ding uh hiven, a hun hong tun ding ngak di hizel mai lou di hia.

Mehzuak hong vak zeuhzeuh mahle uh sa leh nga zuak zaw om nai tadih kei. Vaite le dai khipkhek mai sam ahih chiang un eile hichi in ki omlah tua kei e. Banghiam chia lockdown hon hihsau khak zenzen u leh chia ka tanu in Big Bazar a antang bag khat leh bangbang ahiam a order beh zing chiang in hong deliver zou di uam ah. Online a leitheih a chihtak ua hiai dawrte lunthei lua hi ding uh hiven, a phone bang uh ki switch off mak mai geuh ua, a on laitak ua i call fuh khak zenzen leh kihoutheih hi. Bethsaida dil kitoh laitak a .. chih toh va the zen di lah hiken chin. Van lei mi tamlua ahihman in order nung ni bangzah hiam ngak deuh hi. Hiai mun a ei kia khong a i na khosak sekna a gas bang le hek khollou ahihleh gas  connection le nei selou a black a kilei zel mai hiven, inkuan a i hong om leh extra cylinder dim khat kivenna dia koih gige ngai ding bang ahihman in cylinder khat black in 2500 a lei mai ngai hi.

Abang teng hileh Pathian zalin a hoihlam kilamen in kipe himhim le.Hiai hii le Aman hun asak chiang in hon vengsak mai nalou di hia, ei hihtheih pawtpawt khollou a khut silsil dng hiziang. Tuktui houh hoihdeuh in hongkhe leh hitang season hon tuahmang dia hiai thil le hon tuahmang khawm mai nalou di hia, scientist ten zaw le gingta khokei na unchin.