Pupiten Lockdown 3.0 hon pat zet u leh kholai ah thawm hong om vengvung ngala kholai dai khepkhup nawnlou in vakkhiak, office kuan leh paivel khong le hong ngeina pian deuh bangta hi. Hi khialkhual nawnlou, lampi banga le motor kipel ziahziah, a horn khong ging vingveng, traffic point a le din hong ngaita ahihmanin inn pua a i pawtkhiak chiangin lungsim thoveng leh zangkhai deuh abang hi. Ama a zaw kholai le hi vukvuk a, police lamte chihlouh muhding ommangloua ki hi dedu simin nuamkhinlou hiven. Bang hong chi paitouh zel peuhmah diam ah.
Nitaka TV debate a chihte ua khenkhatin sorkal lohching leh vualzou chihbawl in gamdang khong toh na teh-a phaphetlou tageet zel ve unchin. Hiai covid19 le politics toh nak kizuih hi na vial e chihton bang om sek maimah abang. TV enlou, newspaper simlou khonga i om lele a nopzawkna khat om abang hi. Chile lah, whatsapp leh youtube lam khong a ki lutkha kha zel. Bangteng hileh tutungin North East lamte lah green veksim, a kai omlou chihbawl a lungmuang lua i hihkhak ding le lauhhuai. Mi teng lah ki testlou, huchi thil hithei le hilou. A symptom kilangloute ana nei seuhsouh bang houh hikha le tuh.. A lehlam ah lah a hitheitana muanmohhuaite test bawl na lak ua tampi mahmah negative a, postitive a muhte uh a dikmah hithei zel. Lockdown kipatnunga lenna, rail khong pailou leh state kikawmtuahna teng kikhak ahihleh hong lutbehna ding omlou a ki bit mahmah ding bang zel. Bang hong chi zel diam ah.
Lockdown 3.0 a chihnung ua kai patni May kha ni 4 ni a gelhding hong phulke sim chia ka patleh, office a buaipih ding tam a paragraph khat gelhzou man. Annual closing of accounts/audit khonga buaitou in ki sunzom man nawnlou pen tuni 7.5.2020 hun awng hong omzek a, i gelhsuk dek leh pai ziahziah kei mawkin, koilam manoh in a hong pai diam ah.
Office khong hong na hanga, nasepdan le buaihuaipi khat ahihna om hi. Hong kei le lah a moh kisuak ding, i hong a lah office sianthouna, staff-te bitna ding khong toh kisai zuih ding a thupiak tamlua, huaite va hihkim sipsip theih ding banglou. A van ding bangle muhzohlouh pawl om. A kimloupi a honglou ding chia va khaktheih lah hi zellou. A kal a ki omkha geigoi ahipen mai. Mohpuakna ei lutung a hon nga uh tuh ahi peuhmah. A hunchiam khong om ahihna ah pute’n lah annual closing zohbaih ding deih kisa in i dinmun hon dong den uh, huai kia va buaipih theih le lah hizel lou. Office i hon hon hial chianga, a hong dianglut thei lah omom in nna tuamtuam le tama hong tam zel. Bosste ban ah ei tunglam a office a Dept. chiat in adeih uh, sep ding, lockdown sunga business honglutlouh thu etc khong hon gen chiat chianga ua tampi hong pha venvon. Staff kimkhat khong lel toh office hon ding chih hi a, a kai ding leh kailou ding kuakua chih bang le bawl haksapi hi nalai.
A kailoute inn a nasem chihdan himahleh inn a sepna di uh vanzat nei le uh le a zangthei na di uam ah. Mobile khong a hihtheih le tampi om di chu hia. A kailoute in a mail uh a check gige ua mobile a available a a om di uh chihtan khong ki genthei lel hi. Nna va pe taktak lele a septheih di uh le gingta khollou a ki hi diam, iplah khak dekdek pawl bang omthei hi. Mi kitamlou ahihmana a feldeuh, inn a semthei dite lah office mah a ki poimoha a kai dia koih hong ngai zel. A kailou dia i koihte bang inn a ompeihlou uh ahi diam, a hong kai thouthou chiang ua va nohkik dan lah omlou bang zel. Record a koih dia a kai leh kailou ding list i bawla amau i hilh nak leh a hong kaikai chu amau risk himai chih a koih mai ngai sim hi.
Kuamah hiai hii vei hong omkei henla, bangmah chi omkei leh bel a buai om hetlou ding hi zel. A vei bang hong om zenzen lelah office kaiziaka kaikha khong hon chi mawk le uh a mohkhuk ek theih hi zel. Hichia a hong kai souhsouh ua le a mihing kidaihlou lam kihi a, tunglam ate deih teng ki hihkim zoulou hi zomah, buaihuai pi khat chu ahi aka. Ei ate ban ah auditor pa bang a upa lam, teksia hita ahihmanin sorkal lamte’n kholai a pawtkhelou dia kum a bikhiah un huamkha ahih ziak ahi ngei dia, office a audit bawl dia a hong pawtkhiak ding sapna lai gelhthohin hon pia in hon chi. Ama ngaihtuahna a om hi ding ana ki hisap tei sam ahihman in “na naute hon sawl inla, amau a hong check ding ua, a zohfel khit chiang un nang kiang ah kon thon di uh. Huchia na lungtun leh final print bawlin na inn ah kong pai di ua, huchi in i sign ding uh” chih mai ngai.
Huai dana i koihleh zanni nitaklam in amah mah, lai piaklouhin office ah hong vaklut khaukhau zel a, a zi in amau inn a sign dia ka va pai ding uh lemsalou houh a diam ah chihsim in a om a. A sign dingin le na office uah ka hong pai mai ding chi zomah. Tulai chu a tangpi a kuamahin inn a lengla le deihlou, mi inn a le va pawtut tuanlou a ki omsim vek ahi sima. Zana pan khong in office lam whatsapp a muhdan in office khenkhat in sign in hon zou panpanta ua, enle tuni khonga sign theih dia kiman sawm ding i chihleh lawmpa ana utlou deuh a May ni 9 ni a sign ding lunggulh hihtuak hi. Huai dia ei dateline lah May ni 8 a hih chianga zekai deuh di hong bang zel. Bangteng hileh tuzing in anaute kiang ah na et di teng uh tuni mahin engai unla, zingchiang (ni 8) in sign i ding uh ka ki chi ua, huaidan a nna hon sep sung ua, hun awng kinei a hiai hon kisunzom thei dan ahi. Zing chiangin a ki sign zou na diam ah..
Chih khong hi.
No comments:
Post a Comment