Lockdown 6

Ni-te hong liam zela lockdown 3 bangle a bei kuan hong hita mai hi. Vaihawmten aban bang hon chi paipih di uam, tukal tawpin hon puang nawn ding uh hiven. Huchi kawmkal ah ei kiangnai North East sunga dingin Tripura state leh Assam khopi Guwahati ah hii kai hong tam guih mawka, mundang a le muhkhiaknailouh a omlai diam ah. Green zone hi, muhkhiak omlou chihte chu a bitlai dana ngaih ding ahi phot peuhmah dia. Bang hong chi tou zel diam ah chih hiphot hi.


Tulel a kizang lockdown pen ah, thil tampi a ngeina a hong pai dekta abang hi. Office kong lamlian bang ah parking kitangzoulouin, neukha office toh ki gamla deuha koih ngaita hi. Himahleh pharmacy chihlouh dawr khong a khak baih deuh lai ua, office i tawp chianga bangbang ahiam i leinop chiangin ki lapmanlou sim lam ahi sek hi.  Nitak dak 6 apan zing dak 6 tan curfew ahihmanin office le nitaklam dak 5 khong in kikhak mai sek hi. Tuni in Dibrugarh ah Delhi apan train khat hong tung ding chih ahi a, a passengerte quarantine na dingin sorkal lamin mun bawla na kigingkhin uh ahihdan media lam a muh ding om hi. A gamneite seppih khenkhatin tuh zanni in huai train a hong paite khopi sunga a vakthanglouhna ding ua  lockdown om ding ahi a chi ua, himahleh bangmah omlou ahi ding, office a ngei in ki kai hi.

Kholai khong ging vengvung simta bang mahleh ahitheitan in ki vakvak khollou a, kuapeuh lau leh pilvang chiat chih ding ahi ding. A tangpi in nek leh tak ding leina le hong baihlam deuhta a, sa lam bel buaihuai deuh lai hi. Nga zuak bel inkong ah zingteng in hongpai ua, muh ding omom hi. Nga chi tuamtuam deihtel ding bel om khollou zel hi. Kuva zuak khong omta mahleh pan dukan ki lei leh ki ne nuam nai khollou hi. Dummuam lam khong bel muh ding a om naikei. Thil khenkhat a man a punsak ek khong uh om hihtuak. Mi inn ah ki potnuam nailoua, ei inn ah le mi hong pawt dingin ki deihlaw nai tuanlou hi. Hileng pen beizoklou dingin a hii toh hinkhop dan kisin ding a chihte khong uh a bul kipantou hita mai lou di hia. Bang hongchi pai zel diam ah.

Kum 5 val  paita a seppihte khatin SIP a sum koih ahoihdan hon gengena, a tawpa PF le kineithou hiven chi in ka voluntary PF loha ki cutpen tawpsakin huaizah ding mah khatengin SIP ah ka koih tei hi. Dmat leh i bank account toh ki link ahihmanin kha tengin bank account apan ana ki debit maia, ei buaipih ngailou hi. Tawmchik chik a hawmrual a kihih hiven, ama in zaw PF sangin pungzaw den mah hi. Lockdown hong kipatchilin ngaihtuahna khat ah hong ke vek ding ahi chih omthou mahleh, i sumkoihte va et dingin a password khong ki mangngilh gai a reset khong ngai ding ahihman in “awlin ka hih mai di” i chih touhtouh leh theihlkouh kalin hun tampi na bei khin man hi. A sumpung (investment) lamlam le ki ngaihsak kha khollou, news khong bangle ki en gina peih khollou in ki om ahipen mai ding.

Zanni a password reset a i et mahleh. Karei!

Tam kei lele kum 5 val lam kha tenga  i koih ki kholkhawm bangzahhiam na phasam hiven, huaia a pung teng bei chih phetlouh eisum mahle tampi ana kiam maimah, buaihuai ei. Tua va khak dia lah i mannate pammaih deuh bang. Khatenga tawmchik chika koih, nasepna a i pension tan koih dia hisap a kibawl ahih chianga, dam leh sepna le kum bangzah hiam ki neilai sam hiven, ki mukik zou nalou di hia chih dek  chiangin lah, a company-te bang buaise gai in dingkik zoukei le uh tua i man sanga tamzaw ahihkeileh a vek banga le mantheih mawk chih hong om zel. Mangta lawlaw tukha 17 tan hiam khong thil paidan etna dia koihlai vanglak di hilou di hia.

Tuni, ka computer ag nitaklam dak 03:22 ahita. Train le hong tungta a chi ua, a lauhtuak theilua ua office le khakbaih deuh ngai ding abang.