Pung Hulhul

Bay of Bengal a pingpei hatkhokheng, Amphan a chih uh, om ziaka Assam leh NE state tuamtuam a vuah zuk chihtaka zu dia a puan uh hong tangtung ahi ngei ding. Tuni vuah zu tiptip ging office a room apan i zak leh tuklai ding mah hong bangta in lunglen bang hong huai dek a bang.  Neulai khonga a vuahzuk gamlak vakin laia luigei khonga i omkhak chia luitui luangging, kawt nilhnelh kawma lam kul leh nal zawt ahihkeileh pichingte le vakkhe theiloua inom un, kanpuak kang, naupangin vuahthuak chih khong leh adangdang phawkin hong omthei dek hi. Kholum hehu bang le hong dai in nuam thokhat chih ding hi. May kha bang le a beidek lam hinawnta ahihmanin tuktui luan hun le hithouta mah ding hi.

Dibrugarh khosunga nullahte bangle lockdown sungin ana bawlhoih man sim vekua, Mancotta Road ngial bang a lampi le zausotlua abang hi. A demnuamte a dia demna ding om mahleh district sorkal inle nna hoihtaka sem himah ei. Vanman pawng punsak ek chih bang om khollou in gam ukzou uhi. Kholai a ngeina bangzou chiah naikei mahleh thawmhau huailua hinawnlou hi. Himahleh thil thak khat, mitengin a mihinpihte uh huphulh leh ginmohna khat toh enchiat, huaidan a paitoutou ding hileh hong kilawm hi. Phualpi lamin kalnawn chia lenna khong lengsak ding, rail bang le paisak pahta ding chih thu khong hong om zomah. Tua lockdown omdan a gam khat va omdet theih himawklou ding ahih chia, sorkal lamin le decision lak haksa simsim a tuah touhtouh uh ngai ding abang. Sanitize in bit huntawk chichi mahleh uh tulaitaka lenna hiam rail hiama khualzin ding i ngaihtuah leh phurhuai nai hetlou abang.

Hii leng pen kam zok ding banglou in ani ni in a vei pung toutou laia, Assam ah le pung hulhul, Dibrugarh bang ah le khat hong om vehvahta chih ahi. A nuamlou nawn bel ei state, ei khopi Lamka mahmaha 10 val omta a chih uh zak ahi. A kai om a chih uleh lah va gintaklouh mawk dan lah om ken chin. Manipur population etin ei district sanga kai tamzaw omtheihna dia ginhuaizaw bang le om mahleh, mundanga pana hong paite toh hong tungkhawm chihdan ahihmanin  thil hitheilou ahikei. Nekzonna toh kisai a polam a omkhia le kitamin a gam le ki gamlek gawpta ahihna ah hithei mah hi. Huaiziakin i gam, eilak ah le hiai hii kai omta dana ngaih ding mah hi ding hi. A kaite teksia leh natna tuamtuam vei ahihkhol kei nak u leh hong damsiang pah ding un lamen hang.

Thuthang leh thuleng lah tam, i gal zak dana Lamka khong ah lockdown rule ngeingaihlou pawl bang omom hileh kilawmin lah a thudik tak theilou i hihmanin va genluat ngam ahi kei zel. A vaihawmte khong le eite mah ki hi a, kitheihsiamtuahna khat le om ahi maithei. Hiai hiileng toh kisai kia hilouin i tulai khovel ah ngeina tuamtuamte zatkim theih hinawn kei mahleh va nutsiat theih le hi khollou pawl bang na om zela, huaite in sorkal dan bangle hon zuinuamlou sak  leh a kikal, dinmun lakloh sim khata ki om houh ahi diam ah. Gam dan taka etin lockdown toh kisaia sorkal thupiakte zuihlouh dan bohsiatna ahi ding hi. Covid19 i gam hong tungta chia poma dan bang le hoihtaka zuihsawm in om theile a kuapeuh a dia thil hoihzaw chu hi peuhmah ding hi.

Sepna lam khong ah le kivenna dia panlak dingdan a chihte uh hihtheih dandan ki hihtou sam hi. Ei sepna a thusuahte banah phualpi, state, district vaihawmte thusuahte le zuih ding chih khong hi sawnsawn lai hi. A tomin genle, staff kimkhat zanga nna hoihtaka office a pai ding, a nasemte hi in a customer hileh office a kuapeuh a bit ding uh deihna a chihtheih ding. Tulel a om lockdown a kaihsau pen uh tukha tawpa bei ding hiven, huai khit bang thu a hong om nawn diam ana ngak di hilou di hia. A dam hi hauh phot peuhmah le a dandan hong om mai ding hi.

[22.05.2020, Dibrugarh]