Loutul Veh 2

Dena ka gelh pen zoubaih lua ka diam ah, dak 5 le a ging nai kei ka chi. Pai dia lah hichiah nailou ahihman in hiai PART 2 ahi mai di chu. Bang lam hon manoh diam ah.. Ken le tutan a thei nailou lai ka hi. Houlua chia a sim peihlou a om lelah amau thu, ana sim peih ana sim om zenzen leh lah hoih hi pakhat zel chi d'u chu.

Loutul Veh

March 10, 2020 ahi a, ka ofis kompiutal ah nitaklam dak 4:11 ahihdan ki lang hi. Buai vengvung kala, tuni vaite HOLI ni ahihman ofis le thawl mahmah in customer le omlou a, sun a nekding takngial le ki mulou ahihman in gil bang kial sim mai hi. Huchi dinmun ah nasep ding tampi om mahleh sep kithawlawp huailou ahihman in ka blog a lut a ka khodak leh post thak a omlouhna sawtta mahmah hi. Blog ana tulsim a bang mai a, loutul veh houh hileng kilawm chih lamlam a hong lut hi.

LUNGHIHMOH DING OMLOU

1.      Simlei lunta, phungchinna,
Hunte in bangtan daih ding
Chih kitheilou hi.
Suah leh sih ni khat chi a ngaihmuang
I nunnop laitak in vasa thangawk bang
Pekkhiat zohlouh awktheih hi.

Nidanglai Naupang

Kholai bawng-ek, sial-ek lak phalvaka,
Vasanou nekding sialkum, tangkum tou.
Sunkam kal’ innuai leivui mut in thai,
Puchil mankhia nungtawn letlet sak,
Taw mawngnai nuh dia a utlou vau.

MI KHAT

A dam, a nungta mihing peuhmah in dinmun, hihna khat nei chiat in mi poimoh khat i hi vek hi. Mihingten mipoimoh deuh bang omsak in ei leh ei i poimohna kitheilou in kingaihsiat hun  i neithei sek hi.  Mihing a khatpeuh in hihtheih, bawltheih lam i neih chiat mah bang in siamlouh lam leng i nei chiat hi. Thil hihtheizaw deuh leh hihtheilouzaw deuh chih a om ban ah hihthei zenpi a hihnuamlou, hih peihlou leh hihtheilou napi a hihnuam mahmah chih bang le om ding hi. Hihthei ding hizen pi a mahni a kimuanna neihlouhman a hihtheilou chihbang leng om ding a; kimuang mahmah lah hihthei tuan mahmahlou chih bang le omthei ding hi.

Ka Pen Drive' Mang

HP company bawl, 4 GB, silver rong pen drive neuchik  khat nei hi ve’ng. Sun a office’ computer a ka thuah botkhe khalou in nitaklam a ka paisan khak ton om a; a khen chiang in lah puanak sakhau a i kuah, sakhau sunga a ompih dang sum ahiam, romol ahiam, chabi ahiam i lakkhiak chiang in amah leng ana pawtkhe tei in a zing khong in office a tutna gei peuh, gari sung peuh ah muhkik hun om a, kum khat/nih sumang den thei taktaklou dia ki ngaihna omsim hi. Ahihhang in lungsim khat ah, neulua ahihman in “a hichih chih mawk leh mang taktak khong di hiveh aw” chihna om veve a motor chabi peuh toh i khaikhawm netnat le lah a pen drive khaina hoih chiahlou ahihman in “mangzaw kha in the” chi in a om masakna, sakhau sung mah tungkik thou hi.

KAPNEIKHAI-TE' KHUA

Selam khua leh Mizoram Government (nuai a Environment & Forest Dept.-te) buaina thu facebook group tuamtuam a kigelh vengvung a, sorkal lubawkte kampau leh gamtat zia apan nam leh pau ziak khong a Selam khote musit uh hi a ngaihna khong om in hiai buaina tungtang facebook group tuamtuam ah kinialna tam hi. Sorkal lam mohsa a Selam panpih pawl leh sorkal panpih pawl kinialna group tuamtuam a omte ka na sim sekna a Selam khomin a hong gingin chiang in neulai a ka lawm ngaih mahmah Kapneikhaite pemna khua hi in ka hon thei thak hi. Himahleh hiai buaina thu gensawm hizawlou in Selam buaina ziak a neulai hun phawkthak leh a kisaikha bangbang hiam neukha gen zek ding chi i hi.

VAN MANG ZON

Van khat peuh tunung chiang a hong poimoh ding ahihkei leh i deihlaite i kemhoih tangpi hi. Huchia van i kephoihluat  khenkhat i deih hun, i poimoh hun a hong om a i zon chiang in ki muzou nawn hetlou chih om nuam mahmah hi. I koihna hi a i theihna teng i zon nunga mulou, gintakna teng zong in mu tuanlou. A khen chianga kua hiam in ana la, ana peimang etc ding peuh a muangmoh in kingoh theih hi. Kingoh khelh ahih chiang in ngoh a omte bang lungkim dek suailou chih hong omthei nawn hi.

HUN KIDANG

By Ginpu Guite on Tuesday, October 22, 2013 at 6:29pm

Tuni a ka gelh, LA A SUAK THEI DIAM AH..Internet era la deuh ding na saknop ua leh ZOLMA chiang a sak dia a kaih na na ki bawl mai ding uh ahi di CHU. A vual teng syllable 9 vek a kibawl ahi a, a kaih bawldan lemlou khong a om diam ah. A kaih khong na na bawl zenzen u leh a gelh/phuak kha PHUALVA chih ding ahi. Na na bawl kei ua le chu a thu ki khek lai kha ding ahi VE :D TUAH KHAKKHAK KI GELHSUK MAI AHIHNA AH KI ENTHAK LEH HELNOP AHIAM KHEK UTNA BANG OMTHEI CHIH THU AH.

KEI

A tun sung mimbang piang
A nunnuam nuamlou om diam
A nei-ahau, nek-leh-dawn niang-leh-tai
A zawng daipam a kuamah peuh
A lungawi, nunnuam den lou
A hang khat om ding hi

Vaite Toh Nasep

I gam a sepna muvek theilou i hihman in mundang a vaite khong toh semkhawm pawl ki om hi. Nekzonna, inkuan  vakna ding a va sem i hihna ah sep taktak  mah ngai a,  nasemte’n nikhat a khovaklai a hun tampen a zatna mun uh a nasepna uh ahi. Nikhat a dakkal giat bang vaite toh nasem a omkhawm uh chihna ahi. Vaite chihchiang in India gam ah  -  South, North, West leh East lam ah atuam chiat uhi. Atuam chiat ahihna u’ah a vekpi un (generalize) vaite ahuchi uh, akhachi uh chihtheihlouh ding hi. India Mal-suah ei omna deuh a office nasepna ah Bengali tam deuh ding in a gintakhuai a abanah Assamese, Bihari, Oriya chih khong leh Marwari, Sardarji, South Indian etc khong le a omzek thou ding. A vekpi ua kibang chihtheih khollouh ding i chihhang in sahkhua leh culture kibang ahihna u’ah thil etdan leh nasepdan ah eipawl toh teh in amaute kibangzaw uhi.

Khua Lumdeuh Hia Le?

Zite khualzin uh ahih chianga, ka tangvalpa uh mehhuan siam sa khollou ka diam ah, zannitak in office kai tawp inn tungphet kisilkhia in anhuanin ka naih hi. Kuamah le omlou hiven chi in, puanak silhlou khekholtom kia teng in anhuanin ah ka lut hi. Anhuanin lianlou ahihman in fan a omkei a, electric bill bang hong sanglaw venvon sim mawk ahihchiang in anhuanin a kivuah exhaust fan leng ka pei kei hi. Fridge sung a bawm tuamtuam sunga lehkha, polyethene khong a kituamte ka etleh anteh, manta, begul etc ana vuai leh muat gawp sim nemnom geuh ua,  gotuaite bang mel-et in a polam teng ana vom sim gemgam maimah uhi. Pammaih sa in huan theihtheih huan ding chi in ka ban lakkhiak a, a sia teng ka pai hi.

Va hetkha Sese

Hichi'n a chi uh a ka. Lawmte khat Shillong-a a laizil lai in piangthak hi. A pianthak khit chiang a zu bang ngawl in hoihtak a om sawm hih tuak hi. A inluahna gei a Mizoram tangval khat in luah tei ahi ding a. Huai in le lawmpa inveng ahih bok u toh, a zu dawn lai-a a omdan khong ana thei law sam ahi ding. Ahihkeileh ana iplah gu ten le ahi kha ding.

PAIHTE COMPUTER

Paihte Computer chih na muh chiang in na lungsim ah bang a hong lut masa pen diam ka thei kei. Kum 20 khong paita in Aizawl a Lengzem monthly neitupa U Vanneihtluanga gelh Paihte Computer chih magazine khat ah ka sim kha hi. Mikangte khat toh a ki hou khakna a computer a zatdan khong uh a gente in amah chou kha lua in a bil hong puaklek ahihtuak a, huai apan amah le computer lunglut, khoih ve ut a, abangmah theilou pi Calcutta a lengsuk, va zong tawm in khat va leikhia; huai computer a khoihdan, nak buaipih lua ahihman a invengte leh lawmte khong in a computer kia buaipih a kithuahpih tak le hi nawnlou a sak dan khong uh humorous deuh a agelhna ahi.

THEIHLOUH DOT

Nasepna Guwahati khopi a kisuan join khin, sep ding assignment hon pe fel nailou uh ahih man a sep ding om khollou, tuni (19.1.2012) IT Room a computer awng khat a ka tut leh ka phone hong ging ka lak leh "Pu Vangai tang lamte magazine hong zuak ing a, nang inn a lah ana omlou chin a" hon chi hi. Amah kua ahiam chih ka dot leh ka tute khat, Guwahati a om ana hi a, Dodong (ka tapa) toh inn a om ahihdan khong a hon hilh hi. A Vangaitang lam magazine' zuak zanhal a Pa Thangte in a ka muhkhak sa, a bu a Rs400/- chih kigelh hiven, "Bangzah a na zuak uh eita?" chia ka dot leh "Rs200/- ka chih uh ahi a, a tamzaw le piak theih" chi in hon dawng hi.

LIANSEN’ NGAIH, EH!

Kha bangzah hiam paita in 2010 kum Malaysia a  Zomi National Day (a banner ua a kitak dan) lopna a lasakna youtube ah ka maikhe kha a, net speed hoih gige lou online a ngaih buaihuai chia ban download a ka ngaih leh khat Liansen in Gam Leh Minam  Tawi Sang Ve Ni, a sak ana hi a. Tangvalnou khat, Biak Tung toh tu zihziah kawma unplugged music a asak uh ahi hi. Hiai la a sakdan tuam hiauhiau in Lengtongte’ (Lia Leh Taangte Lengtong-II a) sak valval sangin hoihzaw sa in hon hip sim pah abang mawk hi.

KIHOUNA LAM LEH EITE

I Laisiangthou in lei, mei toh na teh hial in zatsiam ding ahihdan nasa takin gena, i pupate bang in lah kamsiam in siallei a sang a na chi zozen zel uhi. Taksan louh vual ahi kei. Mihing i pau chiangin awbawm apan ging i bawl pen i lei in gennei dingin na gingsak zel hi a chi uh. Huai ging pen kampau i chi thei ding. Kampau pen mihing khat-le-khat kitheihsiamna ding, ngaihtuahna leh omdan (kammal zat mai ding ka thei kei, feeling cihna a ka zat ahi) kihilh, kitheihtuahna dinga a kihouna (communication) poimoh mahmah ahih manin ngaih poimoh a siam leng sawm ding a kiphamoh ana hi law ngut hi.

VANGSIATNA, NATNA ETC

Vangsiatna, natna leh sihna chihte mihing in deihtelna a i tel theih hilou ahih i thei tek hi. Sihna pen kuapeuh tunga tung ngeingei ding ahihlai in adangte bel tungthei, tunglou thei leh kiven theih ahihna tan om hi. Mihingte’ hiaite tunga thuneitu hilou i hihmanin bangchi tukin deihlou in tunsaklouh sawm in kiveng lele a hong tung thou thei ahihna om gige hi maimah hi.

DOTLOUH PU’ ADVICE

NASEPNA LAM ah 2001 kumin Guwahati apan Aizawl ah hon suan uhi. Aizawl a ka role ding Guwahati a ka nasep toh kibang hetlou chihphet louh kisai le kisai kha hetlou ahi hi. Huchi ahihna ah Guwahati a pan ka pai dek kuanin nidanga seppih ngei ka pute, experience ana neisa, khat le nih kianga va pai-in a advice uh ka va ngen hi. Khatpa kianga ka va gen chiangin hon advice ding theilou a diam om net-nut sim hi. A room ah ama rank kibatpih mah South India lamte khat na om hiven; huai in “Do what a normal person would do and do not do what a normal person would not do” hon chi gaih mawk hi.

VAITE' NEIHLOUH

VAITE NEIHLOUH i neih tampi om hi. Vaite kia hilou sapte khong leh khovel a nam tuamtuamin a neihlouh i neih tam mahmah ding hi. Huaite i gen seng zenzen kei dinga nek-le-tak lam toh kisai neukha chik i gen zual ding. Zing leh nitak a ann i nek chiangin vaite neihlouh leh neklouh a lim mahmah nek ding tampi nei i hihmanin, limsa lua gilmul kivang zenin  i ne thei hi. Pu Whoami bangin ei mehlim deuh a mehni khua a “Zomi hih nak nop khana tel ei” a chihni tam dingin ka gingta sim hi.